In Pics: కుమార్తెతో కలిసి మంత్రి నారాయణ పర్యటన, విజయవాడ వరద ప్రాంతాల్లో కీలక సూచనలు

Vijayawada News: విజయవాడలో వరద ప్రభావం తగ్గాక ప్రభుత్వం వివిధ రకాల సహాయ చర్యలను వేగవంతం చేస్తోంది. తాజాగా మంత్రి నారాయణ వీటిని పరిశీలించారు

విజయవాడ వరద ప్రాంతాల్లో మంత్రి నారాయణ పర్యటన

విజయవాడలో వరద ప్రభావిత ప్రాంతాల్లో మంత్రుల పర్యటన కొనసాగుతోంది. జరుగుతున్న సహాయక చర్యలను వారు దగ్గరుండి పర్యవేక్షిస్తున్నారు.

విద్యాధర పురం, జక్కంపూడి, కుందా వారి ఖండ్రికలో వరద ప్రభావిత ప్రాంతాల్లో మున్సిపల్ శాఖ మంత్రి నారాయణ, ఆయన కుమార్తె సింధూర పర్యటించారు.

అధికారులతో కలిసి జక్కంపూడి, వైఎస్సార్ కాలనీ తో పాటు బుడ మేరు ప్రవహించే మార్గాన్ని పరిశీలించారు.

ఆయా ప్రాంతాల్లో వరద తగ్గిన చోట సాయంత్రానికి పారిశుద్ధ్యం సాధారణ స్థితికి తీసుకురావాలని మంత్రి ఆదేశాలు జారీ చేశారు.

బుడమేరు ప్రవాహానికి ఉన్న ఆటంకాలను అధిగమించడంపై అధికారులకు మంత్రి సూచనలు చేశారు.

ఈ సందర్భంగా పొంగూరు నారాయణ మాట్లాడుతూ.. ‘‘10 రోజులపాటు సీఎంతో పాటు మంత్రులు, అధికారులు కష్టపడి వరద ప్రాంతాలను సాధారణ స్థితికి తీసుకువచ్చారు.

కొన్ని చోట్ల మినహా దాదాపు అన్ని ప్రాంతాల్లో వరద తగ్గిపోయింది. ఐదు ప్రాంతాల్లో సాయంత్రానికి సాధారణ పరిస్థితి తీసుకొస్తాం.

మున్సిపల్, పంచాయతీ రాజ్ శాఖల సమన్వయంతో పారిశుద్ధ్యం మెరుగుపరుస్తాం. 10 వేల మంది పారిశుద్ధ్య కార్మికులు విధుల్లో ఉన్నారు.

బుడమేరు ఉండాల్సిన విస్తీర్ణం కంటే చాలావరకూ కుచించుకుపోయింది. ఆపరేషన్ బుడమేరు ద్వారా ప్రజలకు ఇబ్బంది లేకుండా యాక్షన్ ప్లాన్ రూపొందిస్తాం’’ అని నారాయణ అన్నారు.

మరోవైపు, రాష్ట్రంలో భారీ వర్షాలు వరదల వల్ల జరిగిన నష్టంపై రాష్ట్ర సచివాలయంలో ఏర్పాటు చేసిన ఛాయాచిత్ర ప్రదర్శనను కేంద్ర బృందం పరిశీలించింది.

జరిగిన నష్టాన్ని ఫోటో ఎగ్జిబిషన్ ఫోటోల ద్వారా రాష్ట్ర ప్రభుత్వ ప్రత్యేక ప్రధాన కార్యదర్శి అరవింద్ కుమార్, సమాచార పౌర సంబంధాల శాఖ ప్రత్యేక కమిషనర్ హనుమంతరావు వివరించారు.

అనంతరం రాష్ట్ర ప్రభుత్వ ప్రధాన కార్యదర్శి ఆధ్వర్యంలో ఏర్పాటుచేసిన సమావేశంలో కేంద్ర బృందం పాల్గొంది. వర్షాలు వరదలు ద్వారా వివిధ శాఖలకు ఏర్పడ్డ నష్టాన్ని పవర్ పాయింట్ ప్రజెంటేషన్ ద్వారా అధికారులు వివరించారు.

సమావేశం అనంతరం జిల్లాలకు వెళ్లి క్షేత్రస్థాయిలో జరిగిన నష్టాన్ని పరిశీలించడానికి కేంద్ర బృందం వెళ్లింది.