Raksha Bandhan 2024: రాఖీ కట్టించుకుంటే రోడ్డున పడాల్సిందే - రక్షాబంధన్ వేడుకలకు వీళ్లంతా దూరం!

The Unseen Side of Raksha Bandhan: ఆగష్టు 19 సోమవారం రక్షాబంధన్. సోదర - సోదరి బంధానికి ప్రతీకగా జరుపుకునే ఈ వేడుకకు కొందరు దూరం..దానివెనుక కారణాలెన్నో..

Image Credit: Pixabay

Source : Pixabay

Raksha Bandhan 2024 : శ్రావణమాసంలో ముఖ్యమైన పండుగల్లో  రక్షా బంధన్ ఒకటి. సోదరుడు - సోదరి బంధానికి ప్రతీకగా నిలిచే ఈ వేడుకను కులం, మతం, ప్రాంతాలకు అతీతంగా జరుపుకుంటారు. యుగయుగాలుగా ఆచరిస్తున్న ఈ పండుగ హిందువులకు చాలా ప్రత్యేకం. ఆ రోజు తమ సోదరుల చేతికి రాఖీ కట్టాల్సిందే అని సోదరీమణులు భావిస్తే..ఎంతదూరం అయినా వెళ్లి సోదరితో రాఖీ కట్టించుకోవాలని సోదరుడు అనుకుంటారు. వెళ్లే అవకాశం లేనివారు రాఖీని పంపించే ఏర్పాట్లు చేస్తుంటారు. ఇంత ఘనమైన ఈ పండుగను కొన్ని ప్రాంతాల్లో అస్సలు జరుపుకోరు. మరికొందరు సోదరులకు కాకుండా కర్రలకు రాఖీలు కడుతుంటారు...వీని వెనుక ప్రచారంలో ఉన్న కథలెన్నో...

రాఖీ కట్టించుకుంటే రోడ్డున పడాల్సిందే!

ఉత్తరప్రదేశ్ సంభాల్ జిల్లా  బైనిపూర్ చాక్ లో రక్షాబంధన్ వేడుక అస్సలు జరుపుకోరు. ఎప్పుడూ జరుపుకోలేదా..కొత్తగా మానేశారా అంటే.. మూడు దశాబ్ధాల క్రితం రాఖీపండుగ జరుపుకున్నారట కానీ ఆ తర్వాత వద్దుబాబోయ్ అని వదిలేశారట. దీనివెనుక ప్రచారంలో ఉన్న కథ ఏంటంటే.. ఆ  గ్రామంలో ఉండే ఓ జమిందార్ కి కుమారులున్నారు...ఓ రాఖీ పండుగ రోజు ఓ పేదింటి అమ్మాయిలను తీసుకొచ్చి రాఖీ కట్టించుకున్న జమిందార్ పిల్లలు ఏం కావాలో కోరుకోమన్నారట. వాళ్లు ఏకంగా..ఆస్తి కావాలని అడిగారట. మాటతప్పని జమిందార్ ఆస్తి మొత్తం రాసిచ్చేసి రోడ్డున పడ్డాడు....ఆ తర్వాత పూర్తిగా ఆ ఊరికే దూరమైపోయారట. అప్పటి నుంచి రాఖీ కట్టించుకునే సంప్రదాయానికి ఫుల్ స్టాప్ పెట్టేశారట బైనిపూర్ గ్రామస్తులు..
 
ప్రాణాలు తీసిన రక్షా బంధన్  

ఉత్తరప్రదేశ్ సంభాల్ జిల్లా గున్నార్ లోనూ ఈ వేడుక జరుపుకోరు. రెండు దశాబ్ధాల క్రితం ఓ యువతి తన సోదరుడికి రాఖీ కట్టింది..ఆ తర్వాత కొన్ని గంటలకే ఆ యువకుడు చనిపోయాడు. రాఖీ వల్లే ఇదంతా జరిగిందనే భావనలో..అప్పటి నుంచి ఈ వేడుక జరుపుకోవడం మానేశారు.  ఇదంతా మూఢనమ్మకం అని కొట్టిపడేసిన కొందరు ఆ తర్వాత కూడా రాఖీ పండుగ జరుపుకున్నారట. అప్పుడు కూడా వివిధ రకాల ప్రమాదాల్లో కొందరు మృత్యువాతపడ్డారు. అందుకే ఆ గ్రామంలో రాఖీ పండుగ అంటే శాపంగా భావిస్తారు. గున్నార్ మాత్రమే కాదు..గోండా జిల్లాలోని బికంపూర్ జగత్ పూర్వా అనే గ్రామం సహా యూపీలో చాలా గ్రామాల్లో రక్షాబంధన్ ఉండదు.. 

కర్రలకు రాఖీ 

యూపీలో హార్పూర్ జిల్లా లో దాదాపు 60 గ్రామాల ప్రజలు కర్రలకు రాఖీలు కడతారు.  17వ తరానికి చెందిన రాజు మహారాణా ప్రతాప్ కాలంలో ఈ సంప్రదాయం పాటించేవారట..అందుకే గ్రామస్తులు అదే అనుసరిస్తున్నారు. అప్పట్లో యుద్ధంలో పాల్గొనే సైనికులకు రాఖీ కట్టేవారట.. కానీ ఆ తర్వాత వారి ఆయుధాలకు రక్ష కట్టడం ప్రారంభించారట. అందికే సైనకులకు గుర్తుగా కర్రలకు రాఖీ కడుతుంటారు ఈ గ్రామస్తులు. 

రక్షా బంధన్ వీరికి శాపం

యూపీ మీరట్ లో సురానా అనే గ్రామంలో కూడా రాఖీ పండుగ జరుపుకోరు.  12వ శతాబ్దంలో రాఖీ పండుగ రోజునే మహ్మద్ ఘోరీ ఆ గ్రామంపై  దండెత్తి అందర్నీ చంపేశాడు. కేవలం ఓ మహిళ, ఆమె ఇద్దరు పిల్లలు మాత్రమే బతికారు. ఆ రోజు వాళ్ల చేతికి రాఖీ లేదు.. ఆ తర్వాత రాఖీ పండుగకు ఆ ఇద్దరు పిల్లలో ఒకరు రాఖీ కట్టించుకుంటే..ఆ తర్వాత దివ్యాంగుడు అయిపోయాడట. అప్పటి నుంచి రాఖీ తమకు కలసిరాదు అనేది గ్రామస్తుల నమ్మకం. అందుకే అక్క రక్షాబంధన్ వేడుక జరుపుకోరు.  

గమనిక:  సోషల్ మీడియాలో అందుబాటులో ఉన్న సమాచారం ఆధారంగా రాసిన కథనం ఇది. దీనిని ఎంతవరకూ విశ్వశించాలి అనేది పూర్తిగా మీ వ్యక్తిగతం.