Adilabad Tiger News: ఆదిలాబాద్ జిల్లాలో పులుల సంచారంతో ఉపాధి కోల్పోతున్న రైతులు

Tigers In Adilabad: ఆదిలాబాద్‌లో సంచరిస్తున్న పులులు ప్రజల ఉపాధికి ఆటంకం కలిగిస్తున్నాయి. పులి భయంతో పనులు చేయడానికి ఎవరూ సాహసించడం లేదు.

ఆదిలాబాద్ జిల్లాలో పులుల సంచారంతో ఉపాధి కోల్పోతున్న రైతులు

Source : ABP Desam

Tiger In Adilabad District: ఇదిగో పులి అంటూ ఉంటే ప్రజల నోటికాడ కూడు పోతోంది. కొన్ని వారాల నుంచి ఉపాధి లేక చాలా మంది కూలీలు ఇబ్బంది పడుతున్నారు. ముమ్మరంగా పొలం పనులు సాగే టైంలో పులుల సంచారం కడుపు కొడుతోందని వాపోతున్నారు. వెంటనే అధికారులు సరైన చర్యలు తీసుకోవాలని వేడుకుంటున్నారు. ఉమ్మడి ఆదిలాబాద్ జిల్లాలో పులుల సంచారం, ప్రజల సమస్యలపై ABP దేశం గ్రౌండ్ రిపోర్ట్.

ఉమ్మడి ఆదిలాబాద్ జిల్లాలో పెద్దపులుల సంచారం ప్రజలకు కునుకు లేకుండానే కాదు కడుపు మాడ్చేస్తోంది. రోజుకో ప్రాంతంలో పశువులపై దాడి చేయడంతో ప్రజలు బెదిరిపోతున్నారు. పనులు చేయించడానికి ఎవరూ సాహసించడం లేదు. రిస్క్ ఎందుకులే అని పనులు మానుకుంటున్నారు. నిర్మల్ జిల్లా సారంగాపూర్, అడెల్లి తండా, కుంటాల మీదుగా మహబూబ్ ఘాట్ దాటి మామడ అటవీ ప్రాంతంలోకి ప్రవేశించింది. అక్కడ భుర్కరేగడి అటవి ప్రాంతంలో ఎద్దుపై దాడి చేసింది. అక్కడే విశ్రాంతి తీసుకొని పెంబి తాండలోకి  ఎంట్రీ ఇచ్చింది. అక్క వంకతుమ్మ సరిహద్దు ప్రాంతంలో సంచరిస్తూ మరో ఎద్దును హత మార్చింది.  

ఆదిలాబాద్ జిల్లా ఉట్నూర్ మండలంలోని నాగపూర్, చీమనాయక్ తండ సరిహద్దు మీదుగా చాందోరి, రాజుగుడా ప్రాంతంలో ప్రజలకు కనిపించింది. అక్కడ ఎద్దుపై దాడి చేసి వెళ్లిపోతున్న పులిని స్థానిక ప్రజలు, రైతులు, కూలీలు చూశారు. వారంతా భయాందోళనకు గురై అటవీ శాఖాధికారులకు సమాచారం అందించారు. తర్వాత నార్నూర్ మండలంలోని చోర్ గావ్ సమీపంలోని పత్తి చేనులో పశువును హతమార్చింది. ట్రాక్ కెమెరాలకి కూడా చిక్కింది. తర్వాత రోజు పూనాగూడా సమీపంలో కనిపించింది. అక్కడి నుంచి మహారాష్ట్రకు చేరుకుంటుందని అధికారులు భావిస్తున్నారు. 

"జానీ" అనే మగ పులి ఆడ పులి కోసం వెతుకుతోందని అధికారులు చెబుతున్నారు. ఆ రెండు కలిసి పిల్లలు పుట్టి అవి వేట నేర్చుకునే వరకు పులులు ఆ ప్రాంతంలోనే ఉంటాయని అంటున్నారు. పులుల సంచారంతో గ్రామస్తులు బెంబేలెత్తిపోతున్నారు. ఏదో చోట పశువులపై దాడి చేస్తుందన్న సమాచారంతో భయపడి పోతున్నారు. ఎప్పుడు ఎటువైపు నుంచి వచ్చి దాడి చేస్తుందో అర్థం కావడం లేదంటూ వాపోతున్నారు. 

చాందోరి, రాజుగూడా, చోర్ గావ్ సమీపంలో పులి సంచారంచి పశువులపై దాడి చేయడంతో పత్తి చేలల్లో పని చేస్తున్న వారంతా ఇళ్లకు పరుగులు తీశారు. పంటచెలల్లో ఉన్న పశువులు, మేకలను ఇళ్ళ వద్దకు తీసుకువచ్చారు. అసలే పత్తి సీజన్.. పత్తి ఏరి అమ్ముకుంటే తప్ప పూట గడవదు. ఇలాంటి టైంలో పులి సంచారంతో నిరుపేద రైతులు ఉపాధి కోల్పోతున్నారు. 
పత్తి ఏరడానికి కూలీలు దొరకడం లేదని,  రైతులు కూలీలకు చెల్లించాల్సిన కూలీ కూడా చెల్లించలేకపోతున్నామని ఆవేదన వ్యక్తం చేస్తున్నారు మరికొందరు రైతులు. పులి భయంతో వణికిపోతూ.. కూలీలేవరూ పత్తి ఏరడానికి రావడం లేదని వాపోతున్నారు. పులిని వేరే ప్రాంతానికి పంపించగలిగితే తమ పత్తి తీసి అమ్ముకోవచ్చని అంటు్నారు. కూలీలకు కూలీ చెల్లించవచ్చని పలువురు ఏబీపీ దేశంతో వివరించారు.

పులి పశువులపై దాడి చేసి హతమార్చే సమయంలో ఉన్న ప్రత్యక్ష సాక్షులు ఏబిపీ దేశంతో మాట్లాడారు. పులి ఎటువైపు నుంచి ఎలా వచ్చింది? ఎలా దాడి చేసింది అప్పుడు ఆ సమయంలో వారంతా ఏం చేశారనే విషయాలను వివరించారు. తాము వ్యవసాయ పనుల్లో నిమగ్నమై ఉండగా హఠాత్తుగా ఎటువైపు నుంచి వచ్చిందో పులి పశువులపై దాడి చేసిందని అన్నారు. పశువుల అరుపులతో ఉలిక్కిపడి చూసేసరికి పులి ఉందని తెలిపారు. భయపడి తామూ కేకలు వేశామన్నారు. పులి అక్కడి నుంచి వెళ్లిపోయినా పనులు ఆపేసి ఇళ్లకు వెళ్లిపోయామన్నారు. 

అటవీశాఖ అధికారులు కూడా పులి సంచరించే ప్రాంతాల్లో ప్రజలకు అవగాహన కల్పిస్తున్నారు. పులికి ఎలాంటి హాని చేయొద్దని చెబుతున్నారు. కొన్ని రోజుల పాటు వ్యవసాయ పనులు వాయిదా వేసుకోవాలని సూచిస్తున్నారు. రైతులు, కూలీలు పత్తి ఏరడానికి వెళ్లొద్దని, చీకటి పడక ముందే ఇంటికి చేరుకోవాలని హితవు పలుకుతున్నారు. పులుల మధ్య ఇరుక్కుపోయిన జనాలు ఉపాధిని కోల్పోతున్నామని వాపోతున్నారు.