Infosys: మీది గ్రాడ్యుయేషన్ అయిందా? ఇన్ఫోసిస్ సంస్థ గుడ్‌న్యూస్, భారీగా ఉద్యోగాలు

గ్లోబల్ గ్రాడ్యుయేట్ హైరింగ్ ప్రోగ్రాం కింద దాదాపు 55 వేల మంది ఫ్రెషర్స్‌ను సంస్థలో నియమించుకుంటున్నట్లు ఇన్ఫోసిస్ ప్రకటించింది.

ఇన్ఫోసిస్ (ప్రతీకాత్మక చిత్రం)

దేశంలోనే రెండో అతి పెద్ద ఐటీ కంపెనీ అయిన ఇన్ఫోసిస్ సంస్థ శుభవార్త చెప్పింది. గ్లోబల్ గ్రాడ్యుయేట్ హైరింగ్ ప్రోగ్రాం కింద తాము 2022 ఆర్థిక సంవత్సరంలో ఏకంగా 55 వేల మంది ఫ్రెషర్స్‌ను నియమించుకుంటున్నట్లుగా బుధవారం ప్రకటించింది. ఈ విషయాన్ని ఇన్ఫోసిస్ ముఖ్య ఆర్థిక అధికారి నిలంజన్ రాయ్ ప్రకటించారు. ఈ ఆర్థిక సంవత్సరం మూడో త్రైమాసికంలో కంపెనీ రూ.5,809 కోట్ల లాభాలు గడించినట్లు ప్రకటించిన సంగతి తెలిసిందే.

నైపుణ్యాలు ఉన్న ఉద్యోగులు, అభివృద్ధికి అధిక ప్రాధాన్యం ఇచ్చి అందుకు అనుగుణంగా ఇన్ఫోసిస్ తన పెట్టుబడులను కొనసాగిస్తోందని నిలంజన్ రాయ్ తెలిపారు. అందులో భాగంగానే గ్లోబల్ గ్రాడ్యుయేట్ హైరింగ్ ప్రోగ్రాం కింద దాదాపు 55 వేల మంది ఫ్రెషర్స్‌ను సంస్థలో నియమించుకుంటున్నట్లు వెల్లడించారు. తాజా ప్రకటనతో కొత్తగా డిగ్రీ పూర్తి చేసి బయటికి వచ్చేవారికి, లేదా ఉద్యోగం కోసం ఎదురుచూస్తున్నవారికి శుభవార్త వినిపించినట్లయింది.

గతేడాది డిసెంబరు నాటికి ఇన్ఫోసిస్‌లో మొత్తం ఉద్యోగులు 2,92,067 మంది కాగా.. అంతకుముందు త్రైమాసికంలో 2,79,617 మంది ఉన్నారు. అదే 2020 డిసెంబరులో ఉద్యోగుల సంఖ్య 2,49,312గా ఉంది.

ఇన్ఫోసిస్ సీఈవో, ఎండీ సలీల్ పరేఖ్ మాట్లాడుతూ.. కంపెనీ ఉద్యోగుల ప్రతిభను ప్రోత్సహించడంపై దృష్టి సారిస్తామని తెలిపారు. “తాజా ప్రోగ్రాం కింద, మేము వినియోగదారుల ప్రతి అవసరాన్ని తీర్చడానికి పని చేస్తాం. అందుకోసం మా ఉద్యోగులకు మరింత నైపుణ్యం చేకూరేలా దృష్టి పెడతాం. దీంతో పాటు ఉద్యోగుల సంక్షేమం కూడా మా ప్రాధాన్యంలో ఉంటుంది.’’ అని సలీల్ పరేక్ అన్నారు.

డిసెంబర్ 31తో ముగిసిన మూడో త్రైమాసికం ఫలితాలను ఇన్ఫోసిస్ బుధవారం ప్రకటించింది. దాని ఏకీకృత నికర లాభం ఏడాదికి 11.8 శాతం చొప్పున పెరిగి రూ.5,197 కోట్ల నుంచి రూ.5,809 కోట్లకు చేరుకుంది. అంతేకాకుండా, ఇన్ఫోసిస్ సంస్థ తన ఆదాయ వృద్ధి మార్గదర్శకాలను 19.5-20 శాతానికి పెంచింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి