లక్కీడ్రాలో అదిరిపోయే గిఫ్ట్‌లు, ఈ యువకుల ఆలోచన అదుర్స్

లక్కీ డ్రా లాంటి స్కీముల్లో బహుమతులు కారు, రిఫ్రిజిరేటర్, బైక్, గోల్డ్ కాయిన్ లాంటి గిఫ్టులు ఆఫర్ చేస్తుంటారు. కానీ, మంచిర్యాల జిల్లాలో వినూత్నంగా వీరు ఆలోచించారు. లక్కీ డ్రాలో గెలుపొందితే.. గొర్రె పొట్టేలు, మేక, నాటు కోడి, భారీ మద్యం బాటిల్స్ ను ఇస్తున్నారు. రాబోయేది దసరా సీజన్.. తెలంగాణ వ్యాప్తంగా ఈ పండుగకు ముక్కా, చుక్కా ఉండాల్సిందే. అందుకే ఆ దిశగానే ఆలోచించారు ఆ ఊరోళ్లు. బంపర్ లక్కీ డ్రా పెట్టి మరీ వీటిని ఇవ్వాలని నిర్ణయం తీసుకున్నారు. మంచిర్యాల జిల్లాలోని బోయపల్లి గ్రామస్తులు దసరా పండగ కోసం లక్కీ డ్రా ప్రవేశపెట్టారు. దాంట్లో పార్టిసిపేట్ చేయడాలంటే రూ.100కు ఒక కూపన్ కొనాలి. నవరాత్రి ఉత్సవాల సందర్భంగా అక్టోబరు 10న డ్రా తీస్తారు. ఆ డ్రాలో పేర్లు వచ్చిన వారికి విభిన్నమైన గిఫ్టులు ప్రకటించారు. 

మొదటి బహుమతి గొర్రెపొట్టేలు, రెండవ బహుమతి మేక, మూడవ బహుమతి - జానీవాకర్ ఫుల్ బాటిల్, నాలుగో బహుమతి టీచర్స్ ఫుల్ బాటిల్, ఐదో బహుమతి బ్లాక్ డాగ్ ఫుల్ బాటిల్, ఆరో బహుమతి 100 పైపర్స్ ఫుల్ బాటిల్, ఏడు, ఎనిమిదో బహుమతి నాటుకోడి పుంజు, తొమ్మిది, పదో బహుమతి నాటుకోడి పెట్ట.. ఇలా బహుమతులు ప్రకటించడంతో జనం పెద్ద ఎత్తున ఎగబడుతున్నారు. రెండు రోజుల్లోనే దాదాపు 50 శాతం కూపన్స్ అమ్ముడుపోయినట్లు నిర్వాహకులు మాసాడి శశివర్థన్, మాసాడి విజయ్ కుమార్ తెలిపారు.