మేము రాజకీయంగా నష్టపోతాం

డీలిమిటేషన్‌ను అంగీకరించం: రేవంత్ సంచలన వ్యాఖ్యలు

చెన్నైలో జరిగిన డీలిమిటేషన్ సమావేశంలో తెలంగాణ సీఎం రేవంత్ రెడ్డి కీలక వ్యాఖ్యలు చేశారు. డీలిమిటేషన్‌ను అడ్డుకోకపోతే తెలంగాణలో రాజకీయంగా కాంగ్రెస్ నష్టపోతుందన్నారు. బీజేపిని ఈ విషయంలో ముందుకు వెళ్లకుండా అడ్డుకోవాల్సిందేనని స్పష్టం చేశారు. కేంద్రానికి మంచి ఆదాయం ఇస్తున్న రాష్ట్రాలను ఇబ్బందులకు గురిచేయడం సరికాదన్నారు.

ప్రస్తుతం దేశం పెద్ద సవాల్‌ను ఎదుర్కొంటోందని, బీజేపీ జనాభా విధానాన్ని కొనసాగిస్తోందని రేవంత్ అన్నారు. డీలిమిటేషన్ దక్షిణాది రాష్ట్రాల రాజకీయ కుదింపుగా మారుతుందని ఆయన ఆందోళన వ్యక్తం చేశారు. కేంద్రం దక్షిణాది రాష్ట్రాల అభిప్రాయం తీసుకుని, నియోజకవర్గాల పునర్విభజన చేపట్టాలని రేవంత్ సూచించారు. దేశమంటే అన్ని రాష్ట్రాల కలయిక అని, నియోజకవర్గాల పెంపుపై మన అభిప్రాయాలను పంచుకోవాలని అన్నారు.ఈ విషయంలో దక్షిణాది రాష్ట్రాలు ఐక్యంగా పోరాడాలని పిలుపునిచ్చారు. డీలిమిటేషన్‌పై అందరినీ ఏకతాటిపైకి తీసుకురావడానికి తమిళనాడు సీఎం స్టాలిన్‌ చేసిన ప్రయత్నానికి ప్రత్యేక అభినందనలు తెలిపారు. ప్రజలను భాగస్వామ్యం చేసేందుకు త్వరలోనే ఒక భారీ బహిరంగ సభను నిర్వహిస్తానని రేవంత్ రెడ్డి ప్రకటించారు.