Sowmya Janu: రోడ్డుపై నటి రచ్చ - హోమ్ గార్డును బూతులు తిడుతూ వీరంగం

Sowmya Janu: పలు సినిమాల్లో క్యారెక్టర్ ఆర్టిస్టుగా నటించిన సౌమ్య జాను.. తాజాగా బంజారా హిల్స్ రోడ్డుపై వీరంగం సృష్టించింది. రాంగ్ రూటులో రావడం మాత్రమే కాకుండా హోమ్ గార్డ్‌పై విరుచుకుపడింది.

Image Credit: Sowmya Janu/Instagram

Sowmya Janu: ట్రాఫిక్ పోలీసుల దగ్గర సెలబ్రిటీలు రచ్చ చేయడం, దానికి సంబంధించిన వీడియో సోషల్ మీడియాలో వైరల్ అవ్వడం తరచుగా జరుగుతూనే ఉంటాయి. ఇక తాజాగా మరో నటి కూడా తాను తప్పు చేసిందే కాకుండా పోలీసులపై సీరియస్ అయ్యింది. దానికి సంబంధించిన వీడియో సోషల్ మీడియా చక్కర్లు కొట్టింది. అయితే ఈ విషయంలో తన తప్పు ఏం లేదని చెప్పడానికి మీడియా ముందుకు వచ్చింది నటి. తనే సౌమ్య జాను. ఇన్‌స్టాగ్రామ్‌లో వీడియోలతో, సినిమా, సీరియల్స్‌లో చిన్న చిన్న పాత్రలతో ప్రేక్షకులను అలరిస్తూ ఉంటుంది సౌమ్య. ప్రస్తుతం బంజారా హిల్స్ రోడ్లపై సౌమ్య చేసిన రచ్చ సోషల్ మీడియాలో వైరల్‌గా మారింది.

అసభ్యంగా తిట్టింది..

బంజారా హిల్స్‌లో తప్పు రూటులో రావడమే కాకుండా ట్రాఫిక్ పోలీసులు ఆపి ప్రశ్నించగా.. ఎంతమంది అలా రావడం లేదంటూ వారిపైకే సీరియస్ అయ్యింది సౌమ్య. ఫిబ్రవరీ 24న జాగ్వార్ కారులో బంజారా హిల్స్ వైపు డ్రైవ్ చేస్తూ వచ్చింది సౌమ్య జాను. అక్కడ రాంగ్ రూటులో వెళ్తున్న తనను ఆపి ప్రశ్నించిన ట్రాఫిక్ హోమ్ గార్డుపైనే విరుచుకుపడింది. రాంగ్ రూటులో డ్రైవ్ చేయడం కరెక్ట్ కాదని చెప్తున్న హోమ్ గార్డును అసభ్యంగా తిట్టడంతో పాటు తనపై సౌమ్య చేయి కూడా చేస్తుందని వార్తలు వినిపిస్తున్నాయి. ఇక తను ఒక సెలబ్రిటీ కావడంతో హోమ్ గార్డ్‌తో సౌమ్య గొడవపడుతున్న వీడియో తీసి సోషల్ మీడియాలో వైరల్ చేశారు నెటిజన్లు.

కామన్ మ్యాన్ పరిస్థితి ఏంటి..?

ఇక ఈ ఘటన జరిగిన రెండురోజుల తర్వాత ఈ విషయంపై మాట్లాడడానికి సౌమ్య.. మీడియా ముందుకు వచ్చింది. రాంగ్ రూటులో వెళ్లడం తప్పు అని ఒప్పుకోకుండా తాను ఒక అర్జెంట్ పని మీద వెళ్తున్నానని తనను తాను సమర్ధించుకుంది. ఒక సెలబ్రిటీగా తనకే ఇలా జరిగితే.. కామన్ మ్యాన్ పరిస్థితి ఏంటి అంటూ చట్టాన్ని కించపరిచినట్టుగా మాట్లాడింది. అంతే కాకుండా తప్పు తనేది అయినా కూడా తనను ఆపిన హోమ్ గార్డ్‌పై కేసు నమోదు చేస్తానంటూ వార్నింగ్ ఇచ్చింది. ఇప్పటికీ తనను పోలీసులు ప్రశ్నించడానికి పిలవలేదని బయటపెట్టింది. రాంగ్ రూటులో సౌమ్య వెళ్లిన వీడియో మాత్రమే కాకుండా తన ఇంటర్వ్యూ వీడియోలు కూడా సోషల్ మీడియాలో వైరల్ అవుతున్నాయి. తప్పు చేసి కూడా ఇలా తనను తాను సమర్ధించుకోవడం ఏంటి అంటూ నెటిజన్లు తనపై విమర్శలు కురిపిస్తున్నారు.

మొదటిసారి కాదు..

సౌమ్య జాను పేరు సోషల్ మీడియాలో వైరల్ అవ్వడం ఇదేమీ మొదటిసారి కాదు. చాలా సినిమాల్లో హీరోలకు చెల్లెలిగా, హీరోయిన్స్‌కు ఫ్రెండ్‌గా నటించి మెప్పించింది సౌమ్య. అయితే ఒకప్పుడు క్యాస్టింగ్ కౌచ్ వల్ల తను ఇండస్ట్రీలో ఇబ్బందులు ఎదుర్కున్నానని చెప్పి షాకిచ్చింది. అంతే కాకుండా శ్రీ రెడ్డి తరహాలోనే తను కూడా దగ్గుబాటి అభిరామ్‌పై ఆరోపణలు చేసింది. అభిరామ్ తనను ఏడిపించాడని, తన వల్ల చాలా ఇబ్బందులు ఎదుర్కున్నానని వ్యాఖ్యలు చేసి సెన్సేషన్ క్రియేట్ చేసింది. ఇప్పుడు రాంగ్ రూటులో రావడం మాత్రమే కాకుండా రోడ్డుపై రచ్చ చేసి మరోసారి వార్తల్లో నిలిచింది.