ప్రధానితో సీఎం భేటీతోపాటు ఇవాళ్టి ఏపీ అప్‌డేట్స్‌ ఇవే

ప్రధాన మంత్రితో సీఎం జగన్ భేటీ కానున్నారు. రాష్ట్రంలో ఉన్న పరిస్థితులు వివరిస్తూనే... ఆర్థికంగా ఆదుకోవాలని వేడుకోనున్నారని తెలుస్తోంది.

ప్రతీకాత్మక చిత్రం

నేడు ప్రధానితో సీఎం భేటీ 

ఏపీ సీఎం జగన్ మోహన్ రెడ్డి నేడు ఢిల్లీలో ప్రధాని మోదీతో భేటీ కానున్నారు. రెండురోజుల పర్యటన కోసం ఢిల్లీ వెళ్లిన సీఎం జగన్ ఈ మధ్యాహ్నం ప్రధాని మోదీతో భేటీ కానున్నారు . 

నెల్లూరు లో మూడురోజుల పర్యటనకు చంద్రబాబు 

టీడీపీ అధినేత చంద్రబాబు మూడు రోజుల పర్యటన కోసం చంద్రబాబు నెల్లూరు వెళ్లనున్నారు. ఈ రోజు సింగరాయ కొండ , కందుకూరులో రోడ్ షో ,పబ్లిక్ మీటింగ్‌ల్లో ఆయన పాల్గొననున్నారు. ఈ నెల 31వరకూ ఆయన నెల్లూరు పర్యటనలోనే గడపనున్నారు. ఈ సందర్భంగా జిల్లాకు చెందిన పలువురు కీలకనేతలకు చంద్రబాబు దిశా నిర్దేశం చెయ్యనున్నారు . 

తిరుమల చేరుకున్న సుప్రీం కోర్ట్ చీఫ్ జస్టిస్ 

మంగళవారం నాడు ఏపీ చేరుకొన్న సుప్రీం కోర్ట్ చీఫ్ జస్టిస్ ధనుంజయ వై.చంద్రచూడ్ ఈరోజు తిరుమల శ్రీవారి దర్శనం చేసుకోనున్నారు ఈరోజు రేపు ఆయన తిరుమలలోనే బసచేయనున్నారు. ఈ నేపథ్యంలో టీటీడీ అధికారులు ప్రత్యేక ఏర్పాట్లు చేశారు . 

తిరుమల భక్తులకు మాస్క్ తప్పనిసరి : టీటీడీ చైర్మన్ 

కోవిడ్ వ్యాప్తి మళ్ళీ కనిపిస్తున్న నేపథ్యంలో తిరుమల భక్తులకు మాస్క్ తప్పనిసరి చేశారు టీటీడీ అధికారులు. ఈ మేరకు టీటీడీ చైర్మన్ వైవీ సుబ్బారెడ్డి ఒక ప్రకటన జారీ చేసారు . 

జనవరి 3 నుంచి పింఛన్‌ వారోత్సవాలు 

వృద్దులకు ,వితంతువులకు ,దివ్యంగులు సహా ఇతరులకు ప్రభుత్వం ఇస్తున్న సామాజిక పెన్షన్ లను 2500 నుంచి 2750కు పెంచుతున్న నేపథ్యంలో జనవరి 3 నుంచి వారోత్సవాలు చేయబోతుంది ఏపీ ప్రభుత్వం . సీఎం జగన్ స్వయంగా వీటిని జనవరి 3న రాజమండ్రిలో ప్రారంభించనున్నారు . 

SI దరఖాస్తుల గడువు 18 వరకూ పొడిగింపు 

411 SI పోస్టులకు నోటిఫికేషన్ జారీ చేసిన పోలీస్ శాఖ అభ్యర్థుల నుంచి దరఖాస్తులకు గడువుతేదీని జనవరి 18 వరకూ పొడిగించింది. ముందుగా జనవరి 1 వరకే గడువు అని చెప్పినా ప్రస్తుతం ఆ గడువును పొడిగిస్తున్నట్టు ఒక ప్రకటన జారీ చేసింది . 

రాజమండ్రి,విశాఖ పర్యటనకు సోము వీర్రాజు 

ఏపీ బీజేపీ అధ్యక్షుడు సోము వీర్రాజు నేడు రాజమండ్రిలో పర్యటించనున్నారు . ఎయిర్‌పోర్టులో రాష్ట్రపతి ద్రౌపది ముర్మును కలవనున్న ఆయన అనంతరం విశాఖ బయలుదేరి వెళతారు . 

నారా లోకేష్ పాదయాత్ర అధికార ప్రకటన నేడే 

టీడీపీ జాతీయ ప్రధాన కార్యదర్శి నారా లోకేష్ పాదయాత్ర తేదీలను టీడీపీ నేడు అధికారికంగా ప్రకటించనుంది . జనవరిలో సంక్రాంతి తరువాత లోకేష్ తన పాదయాత్ర  ప్రారంభించనున్నారు.