Sri Lanka Crisis: శ్రీలంక అధ్యక్షుడు గొటబాయకు ఊరట- వీగిపోయిన అవిశ్వాస తీర్మానం

Sri Lanka Crisis: శ్రీలంక అధ్యక్షుడు గొటబాయ రాజపక్సపై ప్రతిపక్షాలు పెట్టిన అవిశ్వాస తీర్మానం వీగిపోయింది.

శ్రీలంక అధ్యక్షుడు గొటబాయకు ఊరట- వీగిపోయిన అవిశ్వాస తీర్మానం

Sri Lanka Crisis:  శ్రీలంక అధ్యక్షుడు గొటబాయ రాజపక్సకు ఊరట లభించింది. ఆయనపై ప్రతిపక్షాలు ప్రవేశపెట్టిన అవిశ్వాస తీర్మానం పార్లమెంటులో మంగళవారం వీగిపోయింది.

119 ఓట్లు

తమిళ్ నేషనల్ అలయెన్స్ (టీఎన్‌ఏ) సభ్యుడు ప్రతిపాదించిన ఈ తీర్మానానికి వ్యతిరేకంగా 119 మంది ఎంపీలు ఓటు వేశారు. దీంతో ఈ తీర్మానం వీగిపోయినట్లు స్థానిక మీడియా తెలిపింది. రాజపక్సపై అసంతృప్తిని వ్యక్తం చేస్తూ చర్చించేందుకు వీలుగా పార్లమెంటు స్టాండింగ్ ఆర్డర్స్‌ను సస్పెండ్ చేయాలని ఈ తీర్మానం కోరింది. ఈ తీర్మానానికి అనుకూలంగా కేవలం 68 మంది ఎంపీలు ఓటు వేశారు. 

రెండు నెలలు

మరోవైపు వచ్చే రెండు నెలలు అత్యంత కఠినమైన పరిస్థితులు శ్రీలంక ప్రజలు ఎదుర్కోబోతున్నారని కొత్త ప్రధాని రణిల్ విక్రమసింఘే తెలిపారు. ఆర్థిక సంక్షోభం నుంచి దేశాన్ని రక్షించడమే తన లక్ష్యమన్నారు.

1. The next couple of months will be the most difficult ones of our lives. I have no desire to hide the truth and to lie to the public. Although these facts are unpleasant and terrifying, this is the true situation. #SriLankaEconomicCrisis

— Ranil Wickremesinghe (@RW_UNP) May 16, 2022

" దేశంలో పెట్రోల్‌ నిల్వలు నిండుకున్నాయి. ప్రస్తుతం ఒక్కరోజుకు సరిపడా నిల్వలు మాత్రమే ఉన్నాయి. దిగుమతులకు చెల్లించడానికి మన దగ్గర సరిపడా డాలర్లు లేవు. అయితే అందుకు అవసరమైన అమెరికా డాలర్లను బహిరంగ మార్కెట్‌ నుంచి సేకరిస్తాం.                                               "

-     రణిల్ విక్రమసింఘే, శ్రీలంక ప్రధాని

మరో రెండు నెలలపాటు శ్రీలంకలో సంక్షోభం వెంటాడనున్నట్లు నిపుణులు అంచనా వేస్తున్నారు. దేశం తీవ్ర సంక్షోభంలో కూరుకుపోవడానికి కారణమైన రాజపక్స కుటుంబం గద్దె దిగాలంటూ దేశవ్యాప్తంగా జరిగిన ఆందోళనలు హింసాత్మకంగా మారాయి. దీంతో ప్రధానమంత్రి మహింద రాజపక్స తన పదవికి రాజీనామా చేశారు. అనంతరం అధ్యక్షుడు గొటబాయ రాజపక్స సూచన మేరకు రణిల్‌ విక్రమ సింఘే ప్రధానమంత్రిగా బాధ్యతలు స్వీకరించారు.