Bhagavad Gita: అనవసర విషయాల గురించి బాధపడుతున్నారా - గీతలో కృష్ణుడు ఏం చెప్పాడో తెలుసా!

Bhagavad Gita:  బాధలో ఉన్నప్పుడు చిన్న మాట స్వాంతన చేకూర్చుతుంది. దుఃఖంలో కూరుకుపోయినప్పుడు ఓ చిన్న మాట అంతులేని ఓదార్పునిస్తుంది.  ఎందుకీ జీవితం అనిపించినప్పుడు ఓ చిన్న సూక్తి ఎందుకు జీవించాలో చెబుతుంది. చెప్పాలంటే సమస్యలు లేని జీవితం ఉంటుందా, బాధలేని మనిషి ఉంటారా... కానీ సమస్యకైనా, బాధకైనా, దిగులుకైనా, దఃఖానికైనా అన్నింటికీ సమాధానం భగవద్గీత. 

సాక్షాత్తూ శ్రీ కృష్ణ భగవానుడు అర్జునుడికి ఉపదేశించిన జీవిత సారాంశమే భగవద్గీత. కురుక్షేత్ర సంగ్రామంలో తన సోదరులని, బంధువులని, గురువులని, స్నేహితులని చూసి, హృదయం వికలమై.. రాజ్యం కోసం వారిని నేను వధించలేనని బాధపడిన అర్జునుడికి చెప్పిన బ్రహ్మజ్ఞానం భగవద్గీత. దీనిని మతగ్రంధంగా పూజించే గ్రంధంగా భావించరాదు.. మనిషిగా బతకడానికి కావాల్సిన సూత్రాలు అందించే  అందించిన గ్రంధం. ఇందులో కొన్ని శ్లోకాల సారాంశం తెలుసుకున్నా చాలు. అలాంటి కొన్ని శ్లోకాలు మీకోసం.... 

శ్లోకం
అశోచ్యానన్వశోచస్త్వం ప్రజ్ఞావాదాంశ్చ భాషసే|
గతాసూనగతాసూంశ్చ నానుశోచన్తి పణ్డితాః||

భావం: దుఃఖింప తగని వారిని గూర్చి దుఃఖించుట అనుచితం. ఆత్మానాత్మ వివేకులు, అనిత్యములైన శరీరం గురించి కానీ, నిత్యం-శాశ్వతం అయిన ఆత్మ గురించి కానీ దుఃఖించరాదు.

శ్లోకం
దేహినోऽస్మిన్యథా దేహే కౌమారం యౌవనం జరా|
తథా దేహాన్తరప్రాప్తిర్ధీరస్తత్ర న ముహ్యతి ||

భావం: శరీరానికి బాల్యం, యవ్వనం, ముసలితనం ఎలాగో..జీవుడికి మరొక దేహమును పొందడం కూడా అంతే. అందుకే ఈ విషయంపై ధీరులు మోహం పెంచుకోరు

Also Read: భగవద్గీత మొత్తం చదవలేదా అయితే ఈ శ్లోకాలు గుర్తుపెట్టుకోండి చాలు!

శ్లోకం
వాసాంసి జీర్ణాని యథా విహాయ నవాని గృహ్ణాతి నరోऽపరాణి|
తథా శరీరాణి విహాయ జీర్ణా- న్యన్యాని సంయాతి నవాని దేహీ

భావం: చిరిగిన వస్త్రాలు విడిచి నూతన వస్త్రాలు ఎలా ధరిస్తారో అలాగే  ఆత్మ(జీవాత్మ) జీర్ణమైన శరీరమును వదలి కొత్త శరీరాన్ని ధరిస్తుంది

శ్లోకం
నైనం ఛిన్దన్తి శస్త్రాణి నైనం దహతి పావకః|
న చైనం క్లేదయన్త్యాపో న శోషయతి మారుతః||

భావం:ఆత్మ నాశనము లేనిది, ఆత్మను శస్త్రములు చేధించలేవు, అత్మ అగ్నిలో దహనం కాదు, ఆత్మ నీట్లో తడవదు, వాయువు ఆపేయలేదు.. అందుకే ఆత్మకు నాశనం లేదు

శ్లోకం
జాతస్య హి ధ్రువో మృత్యుర్ధ్రువం జన్మ మృతస్య చ|
తస్మాదపరిహార్యేऽర్థే న త్వం శోచితుమర్హసి|| 

భావం: పుట్టినవానికి మరణము తప్పదు. మరణించిన వానికి జన్మము తప్పదు. అనివార్యమగు ఈ విషయమును గూర్చి శోకింపతగదు.

Also Read: భగవద్గీత - సక్సెస్ ఫుల్ పర్సన్ కావాలంటే మీలో ఏ ల‌క్ష‌ణాలు ఉండాలో తెలుసా?

శ్లోకం
కర్మణ్యేవాధికారస్తే మా ఫలేషు కదాచన|
మా కర్మఫలహేతుర్భూర్మా తే సఙ్గోऽస్త్వకర్మణి|| 

భావం:కర్మలను ఆచరించుట యందే నీకు అధికారము కలదు కాని, వాని ఫలితముపైన లేదు. నీవు కర్మఫలమునకు కారణము కారాదు. అట్లని కర్మలను చేయుట మానరాదు.

శ్లోకం
దుఃఖేష్వనుద్విగ్నమనాః సుఖేషు విగతస్పృహః|
వీతరాగభయక్రోధః స్థితధీర్మునిరుచ్యతే|| 

భావం: దుఃఖములు కలిగినప్పుడు దిగులు చెందనివాడును, సుఖములు కలిగినప్పుడు స్పృహ కోల్పోనివాడును, రాగము, భయము, క్రోధము పోయిన వాడును, స్థితప్రజ్ఞుడు అంటారు

శ్లోకం
ధ్యాయతో విషయాన్పుంసః సఙ్గస్తేషూపజాయతే|
సఙ్గాత్సఞ్జాయతే కామః కామాత్క్రోధోऽభిజాయతే|| 

భావం:విషయవాంఛలను గూర్చి సదా మననము చేయువానికి రాగమధికమై, అది కామముగా మారి చివరకు క్రోధమగును. క్రోధం వల్ల అవివేకము కలుగును. దీనివలన జ్ఞాపకశక్తి నశించి దాని ఫలితంగా బుద్ధిని కోల్పోయి అధోగతి చెందుతారు

శ్లోకం
ఏషా బ్రాహ్మీ స్థితిః పార్థ నైనాం ప్రాప్య విముహ్యతి|
స్థిత్వాస్యామన్తకాలేऽపి బ్రహ్మనిర్వాణమృచ్ఛతి|| 

భావం: ఆత్మజ్ఞానపూర్వక కర్మానుస్టారము, బ్రహ్మప్రాప్తిసాధనము కలిగిన జీవుడు సంసారంలో పడకుండా సుఖైక స్వరూపమైన ఆత్మప్రాప్తిని చెందగలడు. 

Also Read : ఈ రెండు పరిస్థితుల్లో నిర్ణయం తీసుకోవద్దని భగవద్గీత చెబుతోంది!

గీతోపదేశంలో శ్రీకృష్ణుడు అస్త్రశస్త్రాల విశేషాల గురించి చెప్పలేదు. వాటిని ఎలా సంధించాలో వివరించలేదు. యుద్ధ వ్యూహాలు నేర్పించలేదు. శత్రువులను సంహరించే మెలకువలనూ నేర్పలేదు. ఈ విషయాలన్నింటిలో తనకు తానే సాటి అయిన అర్జునుడిని ఆవహించిన మాయను తొలగించి రణరంగంలోకి దిగేలా బోధించాడు. ‘నీకు నిర్దేశించిన కర్మలను నువ్వు చేయడమే సరైనది. దేనినీ చేయకపోవడం కన్నా నీ ధర్మాన్ని అనుసరించి పని చేయడమే ఉత్తమం. ఏ పనీ చేయకుండా ఉంటే శరీర నిర్వహణ కూడా ముందుకు కొనసాగదు’. అని బోధించాడు. అది రణరంగంలో అర్జునుడికి మాత్రమే కాదు..మనిషిగా జన్మించిన ప్రతి ఒక్కరికీ వాసుదేవుడు బోధించిన పాఠం భగవద్గీత.