Kota Srinivasa Rao : డబ్బు కోసం మనిషి ప్రాణాలతో ఆడుకోవద్దు - మరణ వార్తపై కోట శ్రీనివాస రావు సీరియస్

నటుడు కోట శ్రీనివాస రావు ఆరోగ్యంపై పుకార్లు షికార్లు చేస్తున్నాయి. అందులో ఎంత మాత్రం వాస్తవం లేదు. 

నటుడు కోట శ్రీనివాస రావు

నటుడు కోట శ్రీనివాసరావు (Kota Srinivasa Rao) క్షేమంగా ఉన్నారు. ఇంట్లో విశ్రాంతి తీసుకుంటున్నారు. ఆయన ఆరోగ్యం గురించి వాట్సాప్ గ్రూపులు, ఇతర సోషల్ మీడియా మాధ్యమాల్లో పుకార్లు షికారు చేస్తున్నాయి. కోట శ్రీనివాసరావు మృతి చెందారని కొంత మంది పోస్టులు కూడా చేశారు. దాంతో అభిమానులు ఆందోళన వ్యక్తం చేశారు. అయితే, ఆ ప్రచారంలో ఎంత మాత్రం నిజం లేదు. తెలుగు సినిమా జర్నలిస్టులతో ఆయన ఫోనులు కూడా మాట్లాడారు.

కోట ఇంటికి పోలీసులు
తన ఆరోగ్యంపై వస్తున్న వందతులు నమ్మవద్దని కోట శ్రీనివాసరావు స్వయంగా ఓ వీడియో విడుదల చేశారు. సోషల్ మీడియా ప్రచారం ఎంత పని చేసిందంటే...  ఆ వార్త నిజమని నమ్మిన పోలీసులు కూడా ఆయన ఇంటికి వెళ్లారు. నలుగురూ వస్తే బందోబస్తు అవసరం అవుతుందని!

వీడియో విడుదల చేసిన కోట శ్రీనివాస రావు ''తెల్లవారితే ఉగాది. పండగ రోజున ఏం చేద్దామని ఆలోచిస్తున్నాను. ఎవరో సోషల్ మీడియాలో 'కోట దుర్మరణం' అని వేశారట. దాంతో ఉదయం నుంచి ఒక్కటే ఫోనులు. ఇప్పటికి నేను కనీసం 50 ఫోనులు మాట్లాడాను. మా కుర్రాడు కొన్ని ఫోనులు మాట్లాడాడు. వ్యాను వేసుకుని పది మంది పోలీసులు వచ్చారు. పెద్దాయన మరణిస్తే ప్రముఖులు వస్తే సెక్యూరిటీ కావాలని వచ్చామని చెప్పారు. ఇటువంటి  వార్తలు నమ్మవద్దని మనవి చేస్తున్నా'' అని పేర్కొన్నారు. డబ్బు సంపాదించడానికి జీవితంలో చండాలపు పనులు బోలెడు ఉన్నాయని, మనిషి ప్రాణాలతో ఆడుకోవద్దని, ఇటువంటి పనులు అక్కర్లేదని ఆయన సీరియస్ అయ్యారు. 

కోట మృతి వెనుక రాజకీయ అభిమానులు!?
కోట శ్రీనివాసరావు మరణ వార్త ముందుగా వాట్సాప్ గ్రూపుల్లో మొదలైంది. ఫార్వర్డ్ చేసిన సందేశాలను చూసిన కొంత మంది నిజమని నమ్మేశారు. సోషల్ మీడియా పోస్టులు చేశారు. అయితే, ఈ ప్రచారం వెనుక రాజకీయ అభిమానులు ఉన్నట్లు తెలుస్తోంది. కొన్నాళ్ళ క్రితం ఓ చిత్రసీమతో బలమైన సత్సంబంధాలు ఉన్న చెందిన రాజకీయ నాయకుడిపై ఓ ఇంటర్వ్యూలో కోట శ్రీనివాస రావు కామెంట్స్ చేశారు. అది నచ్చని కొందరు ఈ పుకారు పుట్టించి ఉంటారని అనుమానాలు వ్యక్తం అవుతున్నాయి.

'కబ్జా'లో అతిథిగా కోట శ్రీనివాస రావు
ఇప్పుడు కోట శ్రీనివాస రావు వయసు 75 ఏళ్ళు. మునుపటిలా ఆయన ఎక్కువ సినిమాలు చేయడం లేదు. అలాగని, నటనకు విరామం ఇవ్వలేదు. వీలు చేసుకుని మరీ కొన్ని సినిమాలు చేస్తున్నారు. ఉపేంద్ర, సుదీప్ హీరోలుగా గత శుక్రవారం విడుదలైన పాన్ ఇండియా సినిమా 'కబ్జా'లో కోట శ్రీనివాస రావు నటించారు. ఆయనది అతిథి పాత్ర తరహాలో ఉందని ప్రేక్షకులు చెప్పారు. 

ఐదు భాషల్లో నటించిన కోట
తెలుగుతో పాటు తమిళ, మలయాళ, కన్నడ, హిందీ భాషల్లో కూడా కోట శ్రీనివాస రావు నటించారు. ఐదు భాషల్లో సినిమాలు చేసిన అనుభవం ఆయన సొంతం. ఆ మాటకు వస్తే దక్కని (హైదరాబాదీ) భాషలో రూపొందిన 'హైదరాబాద్ నవాబ్స్' సినిమాలో కూడా నటించారు. సుమారు 750 సినిమాల్లో ఆయన నటించారు.