Chit Fund Cheat: చిట్టీలపై పేరుతో ఘరానా మోసం... రూ.5.6 కోట్లు మోసం చేసిన మహిళ... లబోదిబోమంటున్న బాధితులు

నమ్మి చిట్టీలు కడితే ఘరానా మోసానికి పాల్పడింది ఓ మహిళ. సుమారు రూ.5.6 కోట్లు బాధితులకు ఇవాల్సి ఉందని పోలీసులు ప్రాథమికంగా నిర్థారించారు.

చిట్టీల పేరుతో ఘరానా మోసం(ప్రతీకాత్మక చిత్రం)

చిట్టీల పేరుతో కోట్ల రూపాయలు ఘరానా మోసానికి పాల్పడింది  ఓ మహిళ. విషయం తెలుసుకున్న బాధితులు లబోదిబోమంటున్నారు. సుమారు రూ.5.60 కోట్ల మేర మోసానికి పాల్పడినట్లు తెలుస్తోంది. ఏపీలోని ప్రకాశం జిల్లా చినగంజాం పంచాయతీలోని సోపిరాలలో ఈ ఘటన చోటుచేసుకుంది. పోలీసుల తెలిపిన వివరాలు ప్రకారం సోపిరాలకు చెందిన పోలకం ఝాన్సీలక్ష్మి, వెంకటస్వామి భార్యభర్తలు. వెంకటస్వామి మిలటరీలో పనిచేసి రిటైర్ అయ్యారు. తర్వాత అగ్నిమాపక శాఖలో కానిస్టేబుల్‌గా విధులు నిర్వహించి కొన్నేళ్ల క్రితం మృతి చెందారు. ఝాన్సీలక్ష్మి సుమారు 25 ఏళ్లుగా సోపిరాలలో ఉంటూ చిట్టీ పాటలు నిర్వహిస్తున్నారు. ఆమెపై నమ్మకంతో రూ. లక్ష, రూ.2 లక్షలు, రూ. 5 లక్షలు, రూ. 10 లక్షల చొప్పున చిట్టీలు పాడేవారు. ఆ మహిళ సుమారు రూ.5.60 కోట్లు  మేర చెల్లించాల్సి ఉంది.

హైదరాబాద్ లో ఆస్తులు 

కొన్ని నెలలుగా ఆ మహిళ బాకీలు చెల్లించడం లేదు. ఇటీవల తన ఇంటిని సైతం ఝాన్సీలఙ్మీ అమ్మేసింది. చిట్టీల నగదుతో హైదరాబాద్, చీరాల పట్టణాల్లో విలువైన భవనాలు, ఇళ్ల స్థలాలను కొనుగోలు చేసినట్లు పోలీసులు తెలిపారు. చిట్టీ పాటలు పాడిన వారికి డబ్బులు చెల్లించకపోవడం, అప్పులు తీసుకున్నవారికి ఇవ్వకుండా తిప్పుకుంటూ వస్తున్నారు. డబ్బు తిరిగి చెల్లించాలని బాధితులందరూ గట్టిగా నిలదీయడంతో అసలు విషయం బయటపడింది. డబ్బును కుటుంబ సభ్యులు, బంధువులకు ఇచ్చినట్టు ఝాన్సీలక్ష్మీ చెప్పుకొచ్చింది.

పోలీసులకు ఫిర్యాదు

చివరికి మోసపోయామని తెలుసుకున్న బాధితులు తమకు న్యాయం చేయాలని కోరుతూ చినగంజాం పోలీసులను శనివారం ఆశ్రయించారు. బాధితుల ఫిర్యాదు మేరకు కేసు నమోదు చేసి దర్యాప్తు చేస్తున్నట్టు పోలీసులు తెలిపారు. ఇప్పటివరకు సేకరించిన వివరాల ప్రకారం మహిళ సుమారు 5 కోట్లకు పైగా కుచ్చుటోపి పెట్టినట్లు తెలుస్తోంది.