Vijayawada Firing Case: విజయవాడలో హైడ్రామా; పోలీసులపైనే కాల్పులకు దుండగుడి యత్నం- ట్రిగ్గర్‌ లాక్ అవ్వడంతో తప్పిన ముప్పు!

Vijayawada Firing Case: విజయవాడ పోలీసు యంత్రాంగం నగరంలోని నేరస్తుల కదలికలపై నిఘా ఉంచేందుకు హోటళ్లు, లాడ్జీలలో తనిఖీలు చేస్తున్నారు.

విజయవాడలో హైడ్రామా; పోలీసులపైనే కాల్పులకు దుండగుడి యత్నం- ట్రిగ్గర్‌ లాక్ అవ్వడంతో తప్పిన ముప్పు!

Source : freepik

Show Quick Read

Key points generated by AI, verified by newsroom

• విజయవాడలోని బాలాజీ హోటల్‌లో అనుమానితుడు పోలీసులపై తుపాకీతో దాడి చేశాడు.
• తుపాకీ ట్రిగ్గర్ లాక్ అవ్వడంతో పెద్ద ప్రమాదం తప్పింది, ఒక పిస్టల్ స్వాధీనం.
• కృష్ణా జిల్లా పామర్రులో 150 మంది పోలీసులతో భారీ కార్డన్ సెర్చ్ నిర్వహించారు.
• సరైన పత్రాలు లేని 30 ద్విచక్ర వాహనాలను పోలీసులు సీజ్ చేశారు.

Vijayawada Firing Case: విజయవాడలో శనివారం తెల్లవారుజామున ఒక్కసారిగా ఉద్రిక్తత చోటు చేసుకుంది. పోలీసులు చేపట్టిన కార్డన్ సెర్చ్‌లో ఊహించని ఘటన చోటుచేసుకుంది. దీంతో ఒక్కసారిగా కలకలం రేగింది. నగరంలోని ప్రముఖ బాలాజీ హోటల్‌లో తనిఖీలు చేస్తున్న పోలీసులపైనే ఒక దుండగుడు తుపాకీతో కాల్పులు జరిపేందుకు ప్రయత్నించడం అందర్నీ షాక్‌కి గురి చేసింది. అదృష్టవశాత్తూ ట్రిగ్గర్‌ లాక్ అయిపోవడంతో బుల్లెట్‌ బయటకు రాలేదు, లేదంటే అక్కడ పెద్ద ప్రాణ నష్టమే జరిగి ఉండేదని పోలీసులు భావిస్తున్నారు. ఈ ఘటనకు సంబంధించిన పూర్తి వివరాలు, జిల్లా వ్యాప్తంగా జరిగిన పోలీసు తనిఖీల అప్‌డేట్స్‌ ఏంటో చూద్దాం. 

బాలాజీ హోటల్‌లో అసలేం జరిగింది?

విజయవాడ పోలీసు యంత్రాంగం నగరంలోని నేరస్తుల కదలికలపై నిఘా ఉంచేందుకు హోటళ్లు, లాడ్జీలలో తనిఖీలు చేస్తున్నారు. అదే సమయంలో అక్కడ ఉన్న ఒక అనుమానిత వ్యక్తిని పోలీసులు ప్రశ్నించేందుకు యత్నించారు. అతను ఒక్కసారిగా తన వద్ద ఉన్న తుపాకీని తీసి పోలీసులపై గురి పెట్టాడు. ట్రిగ్గర్‌ నొక్కేందుకు ప్రయత్నించినప్పటికీ, అది లాక్‌ అయిపోవడంతో పెను ప్రమాదం తప్పింది. 

వెంటనే అప్రమత్తమైన పోలీసులు చాకచక్యంగా వ్యవహరించి  దుండగుడిని లొంగదీసుకున్నారు. అతని వద్ద నుంచి ఒక ప్రమాదకరమైన 9ఎంఎం పిస్టల్, ఐదు రౌండ్ల బుల్లెట్లు స్వాధీనం చేసుకున్నారు. ప్రాథమిక విచారణలో ఆ వ్యక్తి తెలంగాణలోని వరంగల్ జిల్లాకు చెందిన వాడిగా గుర్తించారు. ప్రస్తుతం ఈగల్ టీమ్ పోలీసులు అతడిని అదుపులోకి తీసుకొని విచారిస్తున్నారు. అసలు అతను విజయవాడకు ఎందుకు వచ్చాడు? ఎవరిని లక్ష్యంగా చేసుకున్నాడు? అనే కోణంలో పోలీసులు దర్యాప్తు చేస్తున్నారు. 

పామర్రులో భారీగా కార్డన్ సెర్చ్‌

కృష్ణా జిల్లాలోని పామర్రు ప్రాంతంలో కూడా పోలీసులు పెద్ద ఎత్తున తనిఖీలు నిర్వహించారు. హరిగోపాల్‌ నగర్ కాలనీలో తెల్లవారుజామున నాలుగు గంటల నుంచి సుమారు 150 మంది పోలీసుల బృందం రంగంలోకి దిగింది. డీఎస్పీ ధర్మేంద్ర నేతృత్వంలో జరిగిన ఈ ఆపరేషన్ 11 మంది ఎస్‌ఐలు, ఇతర సిబ్బంది పాల్గొన్నారు. 

పోలీసులు ఇంటింటికీ వెళ్లి నివాసితుల ధ్రువీకరణ పత్రాలను క్షణ్ణంగా పరిశీలించారు. ఈ తనిఖీల్లో సరైన పత్రాలు లేని 30 టూవీలర్స్‌ పోలీసులు సీజ్ చేశారు. ప్రజల రక్షణ కోసమే ఈ తనిఖీలు చేస్తున్నామని, నేర రహిత సమాజం కోసం ప్రతి ఒక్కరూ పోలీసులకు సహకరించాలని అధికారులు కోరుతున్నారు. 

కృష్ణా జిల్లా ఎస్పీ విద్యాసాగర్‌ నాయుడు, ఈగల్‌ ఎస్పీ మహేశ్వర రాజు ఆదేశాల మేరకు ఈ కార్డన్‌ సెర్చ్‌లు నిర్వహిస్తున్నట్టు డీఎస్పీ ధర్మేంద్ర వెల్లడించారు. అనుమానిత వ్యక్తుల కదలికలపై డేగ కన్ను ఉంచామని, శాంతిభద్రతలు విఘాతం కలిగించే వారిపై కఠిన చర్యలు తీసుకుంటామని ఆయన హెచ్చరించారు. విజయవాడలో జరిగిన కాల్పుల ప్రయత్నం ఘటనలో పోలీసులు మరింత అప్రమత్తమయ్యారు. ముఖ్యంగా ఇతర ప్రాంతాల నుంచి వచ్చి హోటళ్లలో బస చేస్తున్న వారి వివరాలపై ప్రత్యేక నిఘా పెంచారు. సామాన్య ప్రజలు కూడా తమ చుట్టు పక్కల ఎవరైనా అనుమానాస్పదంగా కనిపిస్తే వెంటనే డయల్‌ 100 లేదా స్థానిక పోలీసు స్టేషన్‌కు సమాచారం అందించాలనే అధికారులు విజ్ఞప్తి చేస్తున్నారు.