Vanama Raghava: వనమా రాఘవకు 14 రోజుల రిమాండ్... రామకృష్ణను బెదిరించినట్లు అంగీకరించిన రాఘవ... ఏఎస్పీ రోహిత్ రాజ్ వెల్లడి

పాల్వంచలో కుటుంబం ఆత్మహత్య ఘటనలో అరెస్టైన వనమా రాఘవకు కోర్టు 14 రోజుల జ్యుడిషియల్ రిమాండ్ విధించింది. రామకృష్ణను బెదిరించినట్లు వనమా రాఘవ ఒప్పుకున్నాడని పోలీసులు తెలిపారు.

వనమా రాఘవేంద్రరావు

భద్రాద్రి కొత్తగూడెం జిల్లా పాల్వంచలో రామకృష్ణ కుటుంబం ఆత్మహత్య కేసులో అరెస్టైన వనమా రాఘవను పోలీసులు కొత్తగూడెం మెజిస్ట్రేట్‌ ముందు హాజరుపరిచారు. వనమా రాఘవకు కోర్టు 14 రోజుల జ్యుడిషియల్‌ రిమాండ్‌ విధించింది. అనంతరం అతడిని పోలీసులు భద్రాచలం సబ్‌ జైలుకు తరలించారు. అంతకుముందు వనమా రాఘవ అరెస్టుపై ఏఎస్పీ రోహిత్ రాజ్‌ మీడియాతో మాట్లాడారు. రాఘవపై మొత్తం 12 కేసులు నమోదు చేశామని చెప్పారు. రామకృష్ణను బెదిరించినట్లు వనమా రాఘవ అంగీకరించినట్లు ఏఎస్పీ తెలిపారు. 

రామకృష్ణ కుటుంబం ఆత్మహత్య

జనవరి 3వ తేదీన పాల్వంచకు చెందిన నాగ రామకృష్ణ ఇద్దరు చిన్నారులు, భార్యతో సహా ఆత్మహత్య చేసుకున్నారు. భార్య, పిల్లలపై పెట్రోల్‌ పోసి నిప్పంటించుకున్నారు. ఈ ఘటనలో రామకృష్ణ, శ్రీలక్ష్మి, సాహిత్య అక్కడికక్కడే మృతిచెందారు. పెద్ద కుమార్తె సాహితీ చికిత్స పొందుతూ ఆస్పత్రిలో మృతి చెందింది. రామకృష్ణ బావమరిది జనార్దన్‌ ఫిర్యాదుతో పాల్వంచ పోలీస్ స్టేషన్ కేసు నమోదు చేశారు.

గతంలో నమోదైన కేసులపై కూడా విచారణ

అయితే ఆత్మహత్యకు ముందు రామకృష్ణ సూసైడ్ నోట్, సెల్ఫీ వీడియో తీసుకున్నారు. ఈ వీడియో కొత్తగూడెం ఎమ్మెల్యే కుమారుడు వనమా రాఘవపై ఆరోపణలు చేశారు. తన ఆత్మహత్యకు ఆర్థిక ఇబ్బందులతో పాటు ఇతర ఉన్నాయని వీడియోలో చెప్పారు. రాఘవ, సూర్యవతి, మాధవి కారణంగానే ఆత్మహత్య చేసుకుంటున్నామని తెలిపారు. ఈ సూసైడ్ ఘటన బయటకు రాగానే వనమా రాఘవ పరారీలో ఉన్నాడు. అతడి కోసం 8 ప్రత్యేక బృందాలను గాలించాయి. శుక్రవారం రాత్రి వనమా రాఘవను అదుపులోకి తీసుకున్నామని ఏఎస్పీ తెలిపారు. దమ్మపేట మండలం మందలపల్లి వద్ద రాఘవను అరెస్టు చేశామన్నారు. ఈ కేసులో బాధితుల నుంచి లభించిన ఆధారాలను సీజ్‌ చేసి కోర్టుకు సమర్పించామన్నారు. వనమా రాఘవపై గతంలో నమోదైన కేసులపై కూడా విచారణ చేస్తామని తెలిపారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి