Actress Bhavana: ఆమె ఆవేదన అక్షర రూపంలో... అయిదేళ్ల మౌనం తరువాత తొలిసారి స్పందించిన భావన

భావన మీనన్... తనపై జరిగిన అఘాయిత్యంపై తొలిసారి స్పందించింది.

Written By : ABP Desam | Edited By: harithac | Updated at : 11 Jan 2022 12:03 PM (IST)

Actress Bhavana responds to sexual harassment five years later Actress Bhavana: ఆమె ఆవేదన అక్షర రూపంలో... అయిదేళ్ల మౌనం తరువాత తొలిసారి స్పందించిన భావన

(Image credit: Instagram)

భావన మీనన్ మలయాళ నటి అయినా అనేక తెలుగు సినిమాల్లోనూ నటించింది. మహాత్మ సినిమాలో శ్రీకాంత్ పక్కన నటించి మంచి పేరు తెచ్చుకుంది. సరిగ్గా అయిదేళ్ల క్రితం ఆమెను కిడ్నాప్ చేసి కారులోనే లైంగిక వేధింపులకు పాల్పడ్డారు కొంతమంది దుర్మార్గులు. ఆ ఘటన జరిగిన తరువాత భావన మౌనం వహించింది. ఆ ఘటన గురించి ఎక్కడా మాట్లాడలేదు. ప్రియుడిని పెళ్లి చేసుకుంది. అయిదేళ్ల తరువాత ఇప్పుడు సోషల్ మీడియాలో తొలిసారి తనపై జరిగిన అఘాయిత్యంపై స్పందించింది. ఆమె తన బాధకు, ఆవేదనకు అక్షర రూపం ఇచ్చింది.

ఆవేదన అక్షర రూపంలో....
‘ఇది అంత సులువైన ప్రయాణం కాదు. బాధితురాలి నుంచి బతికి బట్టకట్టిన మనిషిగా చేసిన ప్రయాణం. అయిదేళ్లుగా నాపై జరిగిన దాడికి సంబంధించిన బాధ, బరువు నా పేరును, నా గుర్తింపును అణిచివేసేలా చేశాయి. నేరం చేసింది నేను కానప్పటికీ నన్న అవమానించడానికి, నోరువిప్పకుండా చేయడానికి, ఒంటరిని చేసేందుకు చాలా ప్రయత్నాలు జరిగాయి. అలాంటి సమయంలో నాకు అండగా కొంతమంది ముందుకు వచ్చారు. అప్పుడే నాకర్ధమైంది న్యాయం కోసం జరిగే పోరాటంలో నేను ఒంటరిని కానని. న్యాయం గెలవడం కోసం, తప్పు చేసిన వారికి శిక్ష పడేలా చేయడం కోసం, మరెవరికీ ఇలాంటి కష్టాలు రాకుండా ఉండడం కోసం నేను నా ప్రయాణాన్ని కొనసాగిస్తాను. ఈ ప్రయాణంలో నాకు తోడుగా నిలబడిన వారందరికీ ధన్యవాదాలు’ అని రాసుకొచ్చింది భావనా.

2017లో కొచ్చిలో షూటింగ్ నుంచి తిరిగొస్తుండగా భావనపై దాడి జరిగింది. ఆమె కారును దారి మళ్లించి, మరో వ్యాన్ లోకి మార్చి కొంతమంది లైంగికంగా వేధించారు. దీనికి మలయాళ నటుడు, నిర్మాత దిలీప్ కుమార్ కారణమని ఆరోపణలు ఉన్నాయి. అతనితో పాటూ మరో అయిదుగురు కిరాయి గూండాలపై కేసు నమోదైంది.