Sekhar: సినిమాలోనూ తండ్రీ కూతుళ్లుగా... అందరూ వద్దన్నా సరే!

నిజ జీవితంలో తండ్రీ కూతుళ్లు అయిన రాజశేఖర్, శివాని... ఓ సినిమా 'శేఖర్'లోనూ తండ్రీ కూతుళ్లుగా నటించారు.

By: ABP Desam | Updated at : 11 Jan 2022 07:38 AM (IST)

Shivani Rajasekhar in Rajasekhar's Shekar. The latter shares screen with her dad in the movie

'శేఖర్' సినిమాలో రాజశేఖర్, శివానీ రాజశేఖర్

రాజశేఖర్ కథానాయకుడిగా నటించిన తాజా సినిమా 'శేఖర్'కు ఓ స్పెషాలిటీ ఉంది. అందులో ఆయన పెద్ద కుమార్తె శివానీ రాజశేఖర్ కూడా నటించారు. రాజ‌శేఖ‌ర్‌కు కుమార్తె పాత్రలోనే! నిజ జీవితంలో తండ్రీ కూతుళ్లు అయిన వీళ్లిద్దరూ వెండితెరపై కూడా తండ్రీ కూతుళ్లుగా కనిపించనున్నారు. అయితే... శివాని రోల్ పెద్దది ఏమీ కాదు. జస్ట్, ఓ పది రోజులు ఆమె షూటింగ్ చేశారు.

స్క్రీన్ స్పేస్ (నిడివి) తక్కువ కాబట్టి 'శేఖర్'లో ఆ రోల్ చేయవద్దని తనకు కొంత మంది సలహా ఇచ్చారని, దాని గురించి చాలా ఆలోచించానని శివానీ రాజశేఖర్ తెలిపారు. తాను నటించడం వల్ల ఇంపాక్ట్ ఎక్కువ ఉంటుందని ఓకే చేసినట్టు చెప్పుకొచ్చారు. రాజ‌శేఖ‌ర్ గారు, శివాని రియ‌ల్ లైఫ్‌లో తండ్రీ కూతుళ్లు కాబ‌ట్టి... స్క్రీన్ మీద కూడా తండ్రీ కూతుళ్లుగా క‌నిపిస్తే ఆడియ‌న్స్‌కు క‌న్వీన్స్ చేయ‌డం ఈజీగా ఉంటుంద‌ని తీసుకున్న సమష్టి నిర్ణయం ఇదని జీవితా రాజశేఖర్ అన్నారు. సినిమాకు ఆవిడ దర్శకత్వం వహించిన సంగతి తెలిసిందే.

'శేఖర్'... హీరోగా రాజశేఖర్ 91వ సినిమా. సినిమాలో ఆయన పెద్ద కుమార్తె శివాని నటించారు. ఆయన భార్య జీవితా రాజశేఖర్ దర్శకత్వం వహించడంతో పాటు స్క్రీన్-ప్లే సమకూర్చారు. వంకాయలపాటి మురళీకృష్ణ సమర్పణలో బీరం సుధాకర్ రెడ్డి, శివానీ రాజశేఖర్, శివాత్మికా రాజశేఖర్, వెంకట శ్రీనివాస్ బొగ్గరం నిర్మించారు. ప్రస్తుతం నిర్మాణాంతర కార్యక్రమాలు జరుగుతున్నాయి. త్వరలో సినిమాను విడుదల చేయడానికి సన్నాహాలు చేస్తున్నారు. ఆత్మీయ రజన్, 'జార్జ్ రెడ్డి' ఫేమ్ ముస్కాన్, అభినవ్ గోమఠం, రవి వర్మ, శ్రవణ్ రాఘవేంద్ర తదితరులు నటించిన ఈ చిత్రానికి అనూప్ రూబెన్స్ సంగీత దర్శకుడు.