Pekamedalu Movie: జూలైలో పేకమేడలు... సీతక్క చేతుల మీదుగా 'బూమ్ బూమ్ లచ్చన్న' విడుదల

Telangana Minister Seethakka: తెలంగాణ మంత్రి సీతక్క చేతుల మీదుగా 'పేకమేడలు' సినిమా నుంచి 'భూమ్ భూమ్ లచ్చన్న' సాంగ్ రిలీజ్ అయ్యింది. ఈ సందర్భంగా జూలైలో సినిమాను విడుదల చేయనున్నట్లు తెలిపారు.

'పేకమేడలు' సాంగ్ విడుదల చేసిన సీతక్క... సినిమా హీరో హీరోయిన్లు అనూష కృష్ణ, వినోద్ కిషన్

'నా పేరు శివ', 'అంధగారం' వంటి కోలీవుడ్ హిట్ సినిమాలతో తెలుగు ప్రేక్షకులకు సైతం సుపరిచితుడైన నటుడు వినోద్ కిషన్. ఇప్పుడు ఆయన హీరోగా తెలుగులో ఓ సినిమా రూపొందుతోంది. 'ఎవరికీ చెప్పొద్దు' సినిమాతో విజయాన్ని అందుకున్న క్రేజీ యాంట్స్ ప్రొడక్షన్స్ సంస్థ నిర్మిస్తున్న చిత్రమిది. 'ఎవరికీ చెప్పొద్దు' హీరో, 'బాహుబలి'తో నటుడిగా పేరు తెచ్చుకున్న రాకేష్ వర్రే దీనికి నిర్మాత. 

వినోద్ కిషన్ సరసన అనూష కృష్ణ కథానాయికగా నటిస్తున్న 'పేకమేడలు' సినిమా టీజర్ కొన్ని రోజుల క్రితం విశ్వక్ సేన్ చేతుల మీదుగా విడుదలైంది. దానికి మంచి స్పందన లభించింది. ఇప్పుడు తెలంగాణ మంత్రి సీతక్క చేతుల మీదుగా ఈ సినిమాలో 'భూమ్ భూమ్ లచ్చన్న' సాంగ్ విడుదల చేశారు. 

'భూమ్ భూమ్ లచ్చన్న...' పాటను ప్రముఖ గాయకుడు మనో ఆలపించారు. 'లక్కు నీ వెంట కుక్క తోక లెక్క ఊపుకుంటూ వచ్చరో లచ్చన్న...' అంటూ సాగే ఈ పాటను భార్గవ్ కార్తీక్ రాయగా... స్మరణ్ సాయి బాణీ అందించారు.

''వినోదాత్మకంగా 'భూమ్ భూమ్ లచ్చన్న' పాటను తెరకెక్కించాం. మంచి కాన్సెప్ట్, కంటెంట్ ఉన్న కథతో సినిమా రూపొందింది. ఈ చిత్రాన్ని జూలైలో విడుదల చేయడానికి సన్నాహాలు చేస్తున్నాం'' అని చిత్ర బృందం పేర్కొంది.

వినోద్ కిషన్, అనూష కృష్ణ జంటగా నటిస్తున్న 'పేకమేడలు' సినిమాలో రితికా శ్రీనివాస్, జగన్ యోగి రాజ్, అనూషా నూతల, గణేష్ తిప్పరాజు, నరేన్ యాదవ్ ఇతర ప్రధాన తారాగణం. 

క్రేజీ యాంట్స్ ప్రొడక్షన్స్ పతాకంపై మీద హీరో రాకేష్ వర్రే నిర్మిస్తున్న ఈ 'పేకమేడలు' చిత్రానికి నీలగిరి మామిళ్ల దర్శకత్వం వహిస్తున్నారు. రచయిత కూడా ఆయనే. హరిచరణ్ కె. ఛాయాగ్రహణం అందిస్తుండగా... స్మరణ్ సాయి సంగీత బాధ్యతలు నిర్వర్తిస్తున్నారు.