Telangana BJP: తెలంగాణలో ఇకపై పోరు కాంగ్రెస్ Vs బీజేపీ మాత్రమే - రోడ్ మ్యాప్ రెడీ చేసిన హైకమాండ్ - ఇక కమలం దూకుడేనా?
Nitin Nabin instructions to Telangana BJP: తెలంగాణ బీజేపీ నేతలకు హైకమాండ్ స్పష్టమైన దిశానిర్దేశం చేసింది. కాంగ్రెస్ వర్సెస్ బీజేపీ అన్నట్లుగా రాజకీయం మార్చుకోవాలని స్పష్టం చేసింది.
Telangana Congress vs BJP Opposition: ఢిల్లీలో జరిగిన కీలక భేటీలో తెలంగాణ బీజేపీ నేతలకు పార్టీ అధిష్ఠానం అత్యంత స్పష్టమైన, పదునైన దిశానిర్దేశం చేసింది. బీజేపీ తెలంగాణ వ్యవహారాల పర్యవేక్షకులు, సీనియర్ నేతల సమక్షంలో జరిగిన ఈ సమావేశంలో రాబోయే రోజుల్లో రాష్ట్రంలో పాటించాల్సిన రాజకీయ వ్యూహంపై కేంద్ర నాయకత్వం దిశానిర్దేశం చేసింది. ప్రధానంగా బిఆర్ఎస్ ఖాళీ చేసిన ప్రతిపక్ష స్థానాన్ని బీజేపీ సంపూర్ణంగా ఆక్రమించాలని, రాష్ట్రంలో ఇకపై ఏ రాజకీయ పోరాటమైనా కేవలం కాంగ్రెస్ వర్సెస్ బీజేపీ అనే రీతిలోనే సాగాలని అత్యున్నత స్థాయి సందేశమిచ్చారు.
బిఆర్ఎస్ స్థానాన్ని గుప్పిట్లోకి తీసుకోవడమే లక్ష్యం
తెలంగాణలో పదేళ్ల పాటు అధికారంలో ఉండి, విపక్షంలోకి వెళ్లాక బిఆర్ఎస్ ఎదుర్కొంటున్న సవాళ్లను అనుకూలంగా మార్చుకోవాలని అధిష్ఠానం భావిస్తోంది. ప్రతిపక్ష పాత్ర పోషించడంలో బిఆర్ఎస్ ఎక్కడైతే వెనకబడుతుందో లేదా విఫలమవుతోందో, ఆ ఖాళీని బీజేపీ తక్షణమే భర్తీ చేయాలని నిర్ణయించింది. ప్రజాపోరాటాల్లో బిఆర్ఎస్కు ఎలాంటి రాజకీయ మైలేజ్ దక్కకుండా చూస్తూ, కాంగ్రెస్ ప్రభుత్వాన్ని ప్రశ్నించే ఏకైక, నిజమైన ప్రతిపక్ష శక్తి కమల దళమేననే భావనను పబ్లిక్ డొమైన్లోకి బలంగా తీసుకెళ్లాలని సూచించింది.
గ్యారెంటీలు, హామీల నెరవేర్పడంపై నేరుగా కాంగ్రెస్పై దాడి
రాష్ట్రంలో కాంగ్రెస్ ప్రభుత్వం అధికారంలోకి వచ్చి నెలలు గడుస్తున్నా.. ఆరు గ్యారెంటీలు, రైతు రుణాలు, నిరుద్యోగ భృతి, మహిళా పథకాల అమలులో క్షేత్రస్థాయిలో వస్తున్న అసంతృప్తిని ఆయుధంగా మలుచుకోవాలని పిలుపునిచ్చారు. కాంగ్రెస్ ఇచ్చే హామీల గ్యారెంటీ ఉత్తుత్తిదే అని, ప్రధాని నరేంద్ర మోదీ మార్క్ సంక్షేమ పథకాలే శాశ్వతమని ప్రజల్లోకి తీసుకెళ్లాలని స్పష్టం చేశారు. విద్యార్థులు, రైతులు, చేతివృత్తుల వర్గాలు ఎదుర్కొంటున్న సమస్యలపై నిరంతరం రోడ్లపైకి వచ్చి పోరాటాలు చేయడమే ఏకైక మార్గమని స్పష్టం చేశారు.
విబేధాలకు స్వస్తి - నాయకులంతా ఏకతాటిపైనే!
గత కొంతకాలంగా తెలంగాణ బీజేపీలోని అంతర్గత విభేదాలు, విమర్శలపై కేంద్ర నాయకత్వం చాలా సీరియస్గా ఉన్నట్లు తెలుస్తోంది. ఎంపీలు, ఎమ్మెల్యేలు, ఎమ్మెల్సీలు మరియు రాష్ట్ర కమిటీ సభ్యులందరూ వ్యక్తిగత ఎజెండాలను పక్కనబెట్టి ఒకే టీమ్గా పనిచేయాలని క్లాస్ తీసుకున్నారు. బహిరంగ వ్యాఖ్యలు చేయడం లేదా ఒకరిపై ఒకరు అసంతృప్తి వ్యక్తం చేయడం ఏమాత్రం సహించేది లేదని, సమష్టి నాయకత్వంతో కాంగ్రెస్ సర్కార్కు వ్యతిరేకంగా పోరాడితేనే అధికార పీఠం సాధ్యమవుతుందని తేల్చిచెప్పారు.
కేవలం హైదరాబాద్ నగర పరిధిలోనే కాకుండా గ్రామీణ స్థాయిలో, గ్రామ పంచాయతీ స్థాయి నుండి పోలింగ్ బూత్ స్థాయి వరకు పార్టీ నెట్వర్క్ను పునర్నిర్మించాలని ఆదేశించారు. రాబోయే గ్రేటర్ ఎన్నికలను సెమీఫైనల్స్గా పరిగణించి ప్రచారం నిర్వహించాలని పేర్కొన్నారు. బూత్ అధ్యక్షుల వ్యవస్థను బలోపేతం చేస్తూ, ప్రతి ఇంటికీ మోదీ సంక్షేమ ఫలాలు మరియు రాష్ట్ర కాంగ్రెస్ వైఫల్యాలను చేరవేసే విధంగా కేడర్ను సమాయత్తం చేయాలని చెప్పారు. ముస్లిం ఓటు బ్యాంక్ రాజకీయం, మత ఆధారిత రిజర్వేషన్ల అంశాలపై కాంగ్రెస్ చేస్తున్న విధానాలను గట్టిగా నిలదీయాలని నేతలకు నిర్దేశించారు. హిందూ సనాతన సంప్రదాయాలను, రాష్ట్ర రక్షణను ప్రాధాన్యంగా తీసుకుంటూనే.. కేంద్రం నుండి తెలంగాణకు ఇచ్చిన ఎయిమ్స్, కాజీపేట వ్యాగన్ తయారీ యూనిట్, ఎలివేటెడ్ కారిడార్లు, జాతీయ రహదారుల నిధుల వివరాలను ప్రజలకు బలంగా వివరించాలని నిర్ణయించారు.
తెలంగాణ రాజకీయాల్లో రాబోయే మార్పులు
ఢిల్లీ వేదికగా జరిగిన ఈ భేటీ తర్వాత తెలంగాణ బీజేపీ తన వ్యూహాన్ని పూర్తిగా మార్చబోతోంది. రాబోయే రోజుల్లో రేవంత్ రెడ్డి సర్కార్ లక్ష్యంగా బీజేపీ నిర్వహించబోయే ధర్నాలు, ఆందోళనలు మరింత తీవ్రరూపం దాల్చనున్నాయి. బిఆర్ఎస్ను గతం గా, కాంగ్రెస్ను వైఫల్యం గా చిత్రీకరిస్తూ.. బీజేపీ మాత్రమే 'భవిష్యత్తు' అనే నరేటివ్ను బలంగా తీసుకెళ్లడం ద్వారా 2028 శాసనసభ ఎన్నికలకు బలమైన పునాది వేసుకోవాలన్నదే ఈ కమల వ్యూహం వెనుక ఉన్న అసలు ఉద్దేశం.
టాప్ హెడ్ లైన్స్
ట్రెండింగ్ వార్తలు
