Karnataka New CM DK Shivakumar: సీఎల్పీ నేతగా డీకే శివకుమార్ ఎన్నిక ఏకగ్రీవం.. జూన్ 3న కర్ణాటక సీఎంగా ప్రమాణం

Karnataka CLP Leader Karnataka New CM | డీకే శివకుమార్ కర్ణాటక కాంగ్రెస్ లెజిస్లేచర్ పార్టీ (CLP) నేతగా ఏకగ్రీవంగా ఎన్నికయ్యారు. తనను ఎన్నుకున్న ఎమ్మెల్యేలు, నేతలకు ఆయన కృతజ్ఞతలు తెలిపారు.

కర్ణాటక CLP నేతగా డీకే శివకుమార్ ఏకగ్రీవ ఎన్నిక

బెంగళూరులోని విధానసౌధలో జరిగిన కాంగ్రెస్ లెజిస్లేచర్ పార్టీ (CLP) సమావేశంలో డీకే శివకుమార్ శాసనసభా పక్ష నాయకుడిగా ఏకగ్రీవంగా ఎన్నికయ్యారు. ఈ సందర్భంగా ఆయన మాట్లాడుతూ.. తనపై నమ్మకం ఉంచి ఏకగ్రీవంగా ఎన్నుకున్న పార్టీ అధిష్టానానికి, తోటి శాసనసభ్యులకు, నాయకులందరికీ హృదయపూర్వక కృతజ్ఞతలు తెలియజేశారు.

రాష్ట్ర ప్రజలకు అంకితభావం, నిజాయితీ, బాధ్యతాయుతమైన లక్ష్యంతో సేవ చేయడానికి తాము ఎల్లప్పుడూ కట్టుబడి ఉంటామని ఈ సందర్భంగా ఆయన స్పష్టం చేశారు. సిఎల్‌పి నాయకుడిగా ఎన్నికైన అనంతరం, డీకే శివకుమార్ సీనియర్ నేత సిద్ధరామయ్య మరియు పార్టీకి చెందిన ఇతర ముఖ్య నేతలతో కలిసి రాజ్‌భవన్‌కు వెళ్లారు.

అక్కడ కర్ణాటక గవర్నర్ థావర్ చంద్ గెహ్లాట్‌ను సంయుక్తంగా కలసి, రాష్ట్రంలో ప్రభుత్వాన్ని ఏర్పాటు చేయడానికి అవసరమైన సంఖ్యా బలం తమకు ఉందని తెలియజేస్తూ అధికారికంగా ప్రభుత్వాన్ని ఏర్పాటు చేయడానికి లేఖ సమర్పించారు.

తమ నాయకత్వంలో ఏర్పడబోయే నూతన కాంగ్రెస్ ప్రభుత్వం కర్ణాటకలోని గొప్ప ప్రజల ప్రయోజనాలను కాపాడటమే పరమావధిగా పనిచేస్తుందని డీకే శివకుమార్ భరోసా ఇచ్చారు. రాష్ట్రంలోని ప్రతి ఒక్క పౌరుడి సంక్షేమాన్ని చూస్తూ, కర్ణాటక సర్వతోముఖాభివృద్ధిని సాధించడమే లక్ష్యంగా తమ ప్రభుత్వం పూర్తి అంకితభావంతో ముందుకు సాగుతుందని ధీమా వ్యక్తం చేశారు.

జూన్ 3వ తేదీన సాయంత్రం 4 గంటల 5 నిమిషాలకు కర్ణాటక నూతన సీఎంగా ప్రమాణ స్వీకారం చేయడానికి డీకే శివకుమార్‌ను గవర్నర్ థావర్ చంద్ గెహ్లాట్ ఆహ్వానించారు. లోక్‌ భవన్ వద్ద బుధవారం సాయంత్రం డీకే శివకుమార్ నేతృత్వంలో కొత్త ప్రభుత్వం ఏర్పాటు కానుంది. ఆయనతో పాటు కొందరు మంత్రులు ప్రమాణస్వీకారం చేయనున్నారు.