Rajahmundry Medico Priyanka: మీకు ఆడపిల్లలు లేరా? సీఎం, డిప్యూటీ సీఎం పట్టించుకోకపోవడం దారుణం: ప్రియాంక తండ్రి వెంకటేష్

చావుబతుకుల మధ్య ఉన్న కుమార్తె ప్రియాంక పరిస్థితిపై ఆమె తండ్రి వెంకటేష్ ఆవేదన వ్యక్తం చేశారు. ఏపీ ప్రభుత్వం స్పందించకపోవడంపై తీవ్ర ఆగ్రహం వ్యక్తం చేశారు.

ప్రియాంక తండ్రి వెంకటేష్ ఆవేదన

Source : X.com

Show Quick Read

Key points generated by AI, verified by newsroom

• ప్రియాంక తండ్రి, ప్రభుత్వం పట్టించుకోవడం లేదని ఆవేదన చెందారు.
• రాజమండ్రిలో కారు ఢీకొనడంతో ప్రియాంక చావుబతుకుల మధ్య ఉంది.
• ఎస్పీ ప్రకారం, ఇది ఉద్దేశపూర్వక హత్యాయత్నం, సాధారణ ప్రమాదం కాదు.

హైదరాబాద్: రాజమండ్రిలో జరిగిన ప్రమాదంలో తీవ్రంగా గాయపడి ఐసీయూలో ప్రాణాలతో పోరాడుతున్న మెడికో ప్రియాంక తండ్రి వెంకటేష్ ఏపీ ప్రభుత్వంపై ఆగ్రహం వ్యక్తం చేశారు. తన కుమార్తె పరిస్థితిపై కూటమి ప్రభుత్వం ఏం పట్టించుకోవడం లేదన్నారు. రాజమండ్రి ప్రకాష్ నగర్ పోలీస్ స్టేషన్‌కు వచ్చిన ఆయన విలేకరులతో మాట్లాడుతూ, తన కుమార్తె ప్రస్తుతం చావుబతుకుల మధ్య కొట్టుమిట్టాడుతోందని కన్నీరుమున్నీరయ్యారు. మెడిసిన్ ర్యాంక్ సాధించిన ప్రతిభావంతురాలైన తమ బిడ్డకు ఇలాంటి దారుణ పరిస్థితి వస్తుందని ఎన్నడూ ఊహించలేదని, తమ జీవితం అంధకారంగా మారిపోయిందని ఆవేదన చెందారు.

రాష్ట్ర ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్, హోంమంత్రి వంగలపూడి అనిత ఇప్పటివరకు ఈ ఘటనపై స్పందించకపోవడం, బాధితురాలి పరిస్థితిని పట్టించుకోకపోవడం దారుణమన్నారు. ప్రతి వారం, ప్రతి నెలా హైదరాబాద్ వచ్చే నాయకులు తమ బిడ్డ ఆరోగ్యం గురించి కనీసం సమాచారం తెలుసుకోలేరా అని ప్రశ్నించారు. నిన్నటి వరకు ప్రభుత్వం తరఫున ఎవరూ పట్టించుకోలేదని, స్థానిక రాజమండ్రి ఎమ్మెల్యే ఫోన్ చేసి మాట్లాడారని తెలిపారు. తన కుమార్తెకు ఈ పరిస్థితి కలిగించిన నిందితులను కఠినంగా శిక్షించాలని, నడిరోడ్డుపై ఉరితీయాలని ఆయన డిమాండ్ చేశారు.

ప్రమాదం వివరాలు
ఆగస్టు 3వ తేదీ రాత్రి రాజమండ్రిలోని ఏవీ అప్పారావు రోడ్డులో ఉన్న ప్రసాదిత్య మాల్ (AV Mall) సమీపంలో ఈ ఘటన జరిగింది. బాధితురాలు: రాజమండ్రి జీఎస్‌ఎల్ (GSL) మెడికల్ కాలేజీలో డెర్మటాలజీ విభాగాంలో పీజీ (వైద్య విద్య) ద్వితీయ సంవత్సరం చదువుతున్న డాక్టర్ ప్రియాంక.

ప్రమాదం ఎలా జరిగింది
 సినిమా చూసి స్కూటీపై బయటకు వస్తున్న ప్రియాంక, ఆమె స్నేహితుడిని, మద్యం మత్తులో అతివేగంగా కారు నడుపుతూ వచ్చిన ఇద్దరు యువకులు (సూరవరపు దస్వంత్, ఆండ్రూ జోసెఫ్) బలంగా ఢీకొట్టారు. స్కూటీ కిందపడిపోగా, కారును ప్రియాంకపై నుంచి అలాగే పోనిచ్చారు.

తలకు తీవ్ర గాయాలవ్వడంతో ప్రియాంకను మెరుగైన వైద్యం కోసం హైదరాబాద్‌లోని కిమ్స్ (KIMS) ఆసుపత్రికి తరలించారు. అక్కడ వెంటిలేటర్‌పై చికిత్స అందిస్తున్నారు. ఆమె పరిస్థితి విషమంగా ఉందని డాక్టర్లు తెలిపారు. అయితే బ్రెయిన్ డెడ్ అయిందేమోనని టెస్టులు చేయాలని డాక్టర్లు భావించారు కానీ, సోడియం లెవెల్స్ అసాధారణంగా ఉండటంతో టెస్టులు చేయలేదు. 

ప్రకాష్ నగర్ పోలీసులు సీసీటీవీ ఫుటేజ్ ఆధారంగా నిందితులను అరెస్ట్ చేసి, హత్యాయత్నం (Section 308 BNS), డ్రంక్ అండ్ డ్రైవ్ కేసులు నమోదు చేశారు. కోర్టు వారికి 14 రోజుల రిమాండ్ విధించింది.

ప్రియాంక ప్రమాద ఘటనపై తూర్పుగోదావరి జిల్లా ఎస్పీ కీలక ప్రకటన

రాజమండ్రిలో మెడికో ప్రియాంకపై జరిగిన దాడి సాధారణ రోడ్డు ప్రమాదం కాదని, నేరపూరిత కక్షతో కూడిన క్రిమినల్ చర్య అని తూర్పుగోదావరి జిల్లా ఎస్పీ వి స్పష్టం చేశారు. ప్రియాంకను ఉద్దేశపూర్వకంగానే హత్య చేసేందుకు యత్నించారన్న తీవ్ర ఆరోపణలతో నిందితులపై కఠినమైన సెక్షన్ల కింద కేసులు నమోదు చేసినట్లు వెల్లడించారు. ఈ ఘటన జరిగిన కొన్ని గంటల్లోనే పోలీసు బృందాలు రంగంలోకి దిగి అన్ని రకాల కీలక ఆధారాలను సేకరించాయని తెలిపారు. ప్రమాదం సమయంలో ప్రియాంకతో పాటు ద్విచక్రవాహనంపై ఉన్న ఆమె స్నేహితుడు ఉమేష్ స్టేట్‌మెంట్ కూడా నమోదు చేసినట్లు చెప్పారు.

షాపింగ్ మాల్ ప్రాంగణంలో ప్రియాంక, ఆమె స్నేహితుడు, నిందితుల మధ్య వాగ్వాదం జరిగినట్లు ఆధారాలు లభించాయి. ఆ తర్వాత నిందితులు తమ కారుతో ఉద్దేశపూర్వకంగానే వారి వాహనాన్ని మూడుసార్లు బలంగా ఢీకొట్టినట్లు తెలిపారు. సీసీటీవీ ఫుటేజ్, ఘటనకు సంబంధించిన వీడియోలను క్షుణ్ణంగా పరిశీలిస్తే నిందితులు కావాలనే ప్రియాంకపైకి కారును పోనిచ్చి హత్యకు యత్నించినట్లు స్పష్టమైన ఆధారాలు లభించాయని ఎస్పీ వెల్లడించారు. ఈ కేసులో నిందితులను ఇప్పటికే అరెస్ట్ చేసి, రిమాండ్‌కు తరలించామని పేర్కొన్నారు.

మరిన్ని చదవండి

మెడికల్ స్టూడెంట్ ప్రియాంక పరిస్థితి అత్యంత విషమం.. నిందితులను ఉరితీయాలని తండ్రి డిమాండ్

కారులో విషం ఇంజెక్షన్ తీసుకుని మెడికో ఆత్మహత్య - హైదరాబాద్ ఓఆర్ఆర్ పై ఘటన