Indian Citizenship: భారత పౌరసత్వానికి ఐదేళ్లలో 6 లక్షల మంది టాటా!

2015 నుంచి 2019 మధ్య ఆరు లక్షల మంది భారత పౌరసత్వాన్ని వదులుకున్నట్లు కేంద్రం వెల్లడించింది.

భారత పౌరసత్వాన్ని వదులుకున్న 6 లక్షల మంది

గత ఐదేళ్లలో ఆరు లక్షల మంది భారత పౌరసత్వాన్ని వదులుకున్నట్లు కేంద్రం ప్రకటించింది. ఈ మేరకు లోక్‌సభలో కేంద్ర హోం శాఖ సహాయ మంత్రి నిత్యానంద్ రాయ్ తెలిపారు.

విదేశీ వ్యవహారాల మంత్రిత్వ శాఖ లెక్కల ప్రకారం 1,33,83,718 మంది భారతీయులు విదేశాల్లో నివసిస్తున్నారని ఆయన తెలిపారు. కొత్తగా 4,177 మందికి భారత పౌరసత్వం ఇచ్చినట్లు వెల్లడించారు.

2015 నుంచి 2019 మధ్య వీరంతా తమ పౌరసత్వాన్ని వదులుకున్నట్లు నిత్యానంద్ రాయ్ తెలిపారు.

2015లో 1,41,656 మంది, 2016లో 1,44,942 మంది, 2017లో 1,27,905 మంది, 2018లో 1,25,130 మంది, 2019లో 1,36,441 మంది తమ పౌరసత్వాన్ని వదులుకున్నారు.

సీఏఏ చట్టం..

కేంద్ర ప్రభుత్వం తీసుకువచ్చిన సీఏఏ చట్టం వల్ల భారత్‌కు చెందిన కొంతమంది పౌరుల్లో ఆందోళన నెలకొందని ఇటీవల సర్వేలో తేలింది.

2014 డిసెంబర్ 31కి ముందు బంగ్లాదేశ్, అఫ్గానిస్థాన్, పాకిస్థాన్‌ల నుంచి వలస వచ్చిన హిందువులు, జైనులు, బౌద్ధులు, సిక్కులు, క్రైస్తవులు, పార్శీలకు పౌరసత్వం ఇవ్వాలని పౌరసత్వ సవరణ చట్టాన్ని తీసుకువచ్చింది కేంద్రం. అయితే దీని వల్ల అసోంకు వచ్చిన చాలా మందికి పౌరసత్వం లభిస్తుందని, ఆ కారణంగా రాష్ట్ర జనాభా స్వరూపమే మారిపోతుందని ఆరోపిస్తూ ఈశాన్య రాష్ట్రాల ప్రజలు ఆందోళన చేస్తున్నారు. సీఏఏను రద్దు చేయాలని డిమాండ్ చేస్తున్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి