Sasikala Meets Rajinikanth: తమిళనాడు రాజకీయంలో కొత్త ట్విస్ట్.. శశికళ కొత్త పార్టీ పెడుతున్నారా?

తమిళనాడు మాజీ సీఎం జయలలిత నెచ్చెలి శశికళ.. సూపర్‌స్టార్ రజనీకాంత్‌తో భేటీ అయ్యారు.

రజనీకాంత్‌తో శశికళ భేటీ

తమిళనాడులో కొత్త రాజకీయ పార్టీ రానుందా? అన్నాడీఎంకే బహిష్కృత నేత తమిళనాడు మాజీ సీఎం జయలలిత నెచ్చెలి వీకే శశికళ కొత్త పార్టీ పెట్టబోతున్నారా? ఈ రోజు తమిళ రాజకీయాల్లో కొత్త ట్విస్ట్ ఎదురైంది. సూపర్​స్టార్​ రజనీకాంత్​ను శశికళ ఆయన నివాసంలో కలిశారు. అసలు ఈ అనూహ్య పరిణామానికి కారణమేంటి?

ఇంటికి వెళ్లి..

రజనీకాంత్​, ఆయన సతీమణి లతా రజనీకాంత్​తో శశికళ ఈరోజు ఆయన నివాసానికి వెళ్లి మాట్లాడారు. అయితే ఇందులో ఎలాంటి రాజకీయ కోణం లేదని శశికళ వర్గీయులు చెబుతున్నారు. దాదాసాహెబ్​ ఫాల్కే అవార్డు అందుకున్నందుకు గానూ రజినీకాంత్​ను శశికళ శుభాకాంక్షలు తెలియజేశారని తెలిపారు. రజనీకాంత్ ఆరోగ్యం గురించి అడిగి తెలుసుకున్నట్లు పేర్కొన్నారు.

Former AIADMK leader VK Sasikala met with actor Rajinikanth and his wife Latha at his residence in Chennai. pic.twitter.com/8SGNT2y8M1

— ANI (@ANI) December 7, 2021

అంతేనా..

శశికళ పార్టీ స్థాపించే అవకాశం ఉందంటూ ఊహాగానాలు వినిపిస్తున్నాయి. ఇలాంటి తరుణంలో రజనీకాంత్‌తో ఆమె భేటీ కావడం ప్రాధాన్యం సంతరించుకుంది. అన్నాడీఎంకే నుంచి బహిష్కరణకు గురైనప్పటికీ తిరిగి వచ్చేందుకు శశికళ ప్రయత్నించినట్లు సమాచారం. అయితే ఇందుకు పార్టీ పెద్దలు ఒప్పుకోలేదు. బహిరంగంగానే శశికళకు వ్యతిరేకంగా వ్యాఖ్యలు చేశారు.

మొదటి నుంచి ఆమెను దూరం పెడతున్న పార్టీ ఇప్పుడు ఆమెకు అన్ని దారులు మూసివేసేలా చర్యలు చేపట్టింది. కార్యనిర్వహక కమిటీ సభ్యులు పార్టీ నిబంధనలలో కీలక మార్పులు చేశారు. పార్టీ సమన్వయకర్త, జాయింట్​ కోఆర్డినేటర్​ స్థానాలకు సింగిల్​ ఓటు విధానాన్ని తప్పనిసరి చేస్తూ బైలాస్​ను సవరించారు. అంటే.. పదవులు రెండు అయినా.. ఒకే ఓటు వేయాల్సి ఉంటుంది. దీంతో ఆ పదవుల్లో కొనసాగుతున్న పన్నీర్​సెల్వం​, పళనిస్వామి స్థానాలను మరింత సుస్థిరం చేశారు.

కొత్త పార్టీ..

అన్నాడీఎంకేలో స్థానం దక్కే పరిస్థితులు లేకపోయేసరికి శశికళ కొత్త పార్టీ పెట్టే ఆలోచన చేస్తున్నట్లు కొంతమంది చెబుతున్నారు. అయితే ఇందులో ఏమాత్రం నిజముందో తెలియాల్సి ఉంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి