Omicron Variant: 'ఒమిక్రాన్‌'పై ప్రస్తుత వ్యాక్సిన్లు పనిచేయవా? నిపుణులు ఏమంటున్నారు?

కరోనా కొత్త వేరియంట్‌పై వ్యాక్సిన్లు సమర్థంగా పనిచేస్తాయా? అనేది ప్రస్తుతం పెద్ద సందేహం. మరి దీనిపై నిపుణులు ఏమంటున్నారు.

ఒమిక్రాన్‌పై వ్యాక్సిన్లు పనిచేస్తాయా?

దక్షిణాఫ్రికాలో వెలుగుచూసిన కరోనా కొత్త వైరస్‌పై భారత్‌లోనూ తీవ్ర ఆందోళన నెలకొంది. అయితే ఈ ఒమిక్రాన్ కొత్త వేరియంట్‌పై ప్రస్తుతం ఉన్న వ్యాక్సిన్లు సమర్థంగా పనిచేయలేవని చాలామంది నిపుణులు చెబుతున్నామాట. అయితే ఈ విషయంపై ఎయిమ్స్ చీఫ్ డా. రణ్‌దీప్ గులేరియా కీలక వ్యాఖ్యలు చేశారు.

" కొత్త వేరియంట్​​ స్పైక్ ప్రోటీన్​లో 30కిపైగా మ్యుటేషన్లు ఉన్నాయి. ఈ స్పైక్​ ప్రోటీన్లే రోగి కణాల్లోకి చొచ్చుకెళ్లి, వైరస్​ వ్యాప్తికి కారణమవుతాయి. స్పైక్​ ప్రోటీన్​ శక్తిని తగ్గించేందుకు చాలా టీకాలు యాంటీబాడీలను ఉత్పత్తి చేస్తాయి. స్పైక్​ ప్రోటీన్లలో మ్యుటేషన్లు పెరిగిపోతే టీకాల సామర్థ్యం తగ్గిపోతుంది. స్పైక్ ప్రోటీన్ల ఎక్కువగా ఉండటం వల్ల రోగనిరోధక శక్తి నుంచి తప్పించుకునే సామర్థ్యం వైరస్​కు లభిస్తుంది.                                        "

-డా. రణ్‌దీప్ గులేరియా, ఎయిమ్స్ చీఫ్

ఆందోళన అవసరమా?

ప్రస్తుత కరోనా వ్యాక్సిన్లు వైరస్‌పై సమర్థంగా పని చేస్తున్నట్లు అధ్యయనాలు వెల్లడిస్తున్నాయి. కానీ కరోనా కొత్త వేరియంట్‌ ఒమిక్రాన్‌పై వ్యాక్సిన్లు ఏ మేరకు పనిచేస్తాయో చూడాలి. ఒమిక్రాన్​పై ప్రస్తుత వ్యాక్సిన్ల సామర్థ్యాన్ని పరిశీలించాల్సిన అవసరం ఉందని గులేరియా స్పష్టం చేశారు.

వైరస్​ వ్యాప్తి, రోగనిరోధక శక్తిపై కొత్త వేరియంట్​ పోరాడే తీరుపైనే భవిష్యత్​ కార్యాచరణ ఆధారపడి ఉంటుందని గులేరియా అన్నారు. ప్రస్తుతానికి ఒమిక్రాన్​ వేరియంట్​ను భారత్​లో గుర్తించలేదని, ఐఎన్​ఎస్​ఏసీఓజీ తాజా పరిస్థితులను పర్యవేక్షిస్తోందని స్పష్టం చేశారు. అయితే అంతర్జాతీయ ప్రయాణికులు, ముఖ్యంగా కొవిడ్​ కేసులు అనూహ్యంగా పెరిగిన దేశాల నుంచి వచ్చే ప్రజలతో జాగ్రత్తగా ఉండాలని హెచ్చరించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి