Janasena Formation Day: గిరిజనుల మధ్య జనసేన ఆవిర్భావ దినోత్సవం - పవన్ కల్యాణ్ ప్రత్యేక కార్యక్రమం
Pawan Kalyan: జనసేన 13వ ఆవిర్భావ దినోత్సవ వేడుకలను గిరిజన గడ్డపై జరుపుకోవాలని పార్టీ అధినేత పవన్ కళ్యాణ్ నిర్ణయించారు. సామాన్యుడికి అండగా ఉండాలనే పార్టీ ఆశయానికి అనుగుణంగా ఈ నిర్ణయం తీసుకున్నారు.
Janasena 13th Formation Day: జనసేన పార్టీ 13వ ఆవిర్భావ దినోత్సవ వేడుకలను ఈసారి అత్యంత వినూత్నంగా, గిరిజన గడ్డపై జరుపుకోవాలని పార్టీ అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ నిర్ణయించారు. సామాన్యుడికి అండగా ఉండాలనే పార్టీ ఆశయానికి అనుగుణంగా, పాడేరు నియోజకవర్గంలోని గిరిజన గ్రామాల మధ్య ఈ వేడుకలను శనివారం నిర్వహించనున్నారు. తొలుత ఓనూరు జంక్షన్ వద్ద పార్టీ జెండాను ఆవిష్కరించి, అడవి బిడ్డల సమస్యలను ప్రత్యక్షంగా తెలుసుకునేందుకు పవన్ కళ్యాణ్ సిద్ధమయ్యారు.
ఈ పర్యటనలో భాగంగా ఏజెన్సీ ప్రాంతాల్లో మౌలిక సదుపాయాల కల్పనపై పవన్ కళ్యాణ్ ప్రత్యేక దృష్టి సారించనున్నారు. ముఖ్యంగా ప్రధానమంత్రి జన్ మన్, ఉపాధి హామీ పథకాల ద్వారా చేపట్టిన రహదారి నిర్మాణ పనులను ఆయన క్షేత్రస్థాయిలో పరిశీలిస్తారు. ఓనూరు జంక్షన్ నుంచి నందిగరువు గ్రామం వరకు నిర్మించిన 2.4 కిలోమీటర్ల కొత్త రహదారిని ఆయన స్వయంగా కాలి నడకన సందర్శించి, పనుల నాణ్యతను తనిఖీ చేస్తారు. అడవితల్లి బాట కార్యక్రమం ద్వారా పూర్తయిన రోడ్లను గిరిజనులకు అంకితం చేస్తూ ఆయన ప్రారంభిస్తారు.
గిరిజనం మధ్య జనసేన ఆవిర్భావ దినోత్సవ కార్యక్రమం
— JanaSena Party (@JanaSenaParty) March 13, 2026
• ప్రధానమంత్రి జన్ మన్ (అడవితల్లి బాట) ద్వారా నిర్మించిన రోడ్ల పరిశీలన
• నిర్మాణం పూర్తయిన రహదారుల ప్రారంభోత్సవం
•పాడేరు నియోజకవర్గం, నందిగరువు గ్రామ ప్రజలతో శ్రీ @PawanKalyan గారి మాటా-మంతి
•గిరిపుత్రులతో కలసి మధ్యాహ్న… pic.twitter.com/JekJVkHNmD
నందిగరువు గ్రామానికి చేరుకున్నాక, స్థానిక గిరిజనులతో మాటా-మంతి కార్యక్రమంలో పవన్ కళ్యాణ్ పాల్గొంటారు. గిరిపుత్రుల కష్టనష్టాలను, ఏజెన్సీ ప్రాంతాల్లో విద్య, వైద్యం, రవాణా సౌకర్యాల స్థితిగతులను నేరుగా అడిగి తెలుసుకుంటారు. పార్టీ అధికారంలోకి వచ్చిన తర్వాత గిరిజన ప్రాంతాల అభివృద్ధికి తీసుకుంటున్న చర్యలను వారికి వివరించడంతో పాటు, వారి నుంచి అందే వినతులపై తక్షణమే స్పందించేలా అధికారులకు ఆదేశాలు ఇవ్వనున్నారు.
పవన్ కళ్యాణ్ గిరిజనులతో కలిసి మధ్యాహ్న భోజనం చేస్తారు. ఆడంబరాలకు దూరంగా, అడవి బిడ్డలతో కలిసి పంక్తి భోజనం చేయడం ద్వారా వారిలో ఒకరిగా మమేకం కావాలని ఆయన ఆకాంక్షిస్తున్నారు. కేవలం రాజకీయ వేడుకగా కాకుండా, అట్టడుగు వర్గాల జీవన ప్రమాణాలను మెరుగుపరిచే ఒక సేవా కార్యక్రమంగా జనసేన ఆవిర్భావ దినోత్సవాన్ని ఆయన తీర్చిదిద్దారు. పార్టీ శ్రేణులు కూడా తమ తమ గ్రామాల్లో ఇదే స్ఫూర్తితో వేడుకలు జరుపుకోవాలని పిలుపునిచ్చారు.
టాప్ హెడ్ లైన్స్
ట్రెండింగ్ వార్తలు
