Toyota Hiluxకు గట్టి పోటీ.. Mahindra Scorpio N Pickupలో ఇవన్నీ ఉంటాయా?
Mahindra Scorpio N Pickup ఆగస్టు 14న అరంగేట్రం చేయనుంది. 2023 Global Pik Up కాన్సెప్ట్ ఆధారంగా రూపొందిన ఈ పికప్లో 4WD, డీజిల్ ఇంజిన్ & అధునాతన ఫీచర్లు ఉండనున్నాయి.
Mahindra Scorpio N Pickup Price And Features Telugu: మహీంద్రా స్కార్పియో N పికప్ ట్రక్ గురించి ఎట్టకేలకు అధికారిక ప్రకటన వచ్చింది. ఈ కొత్త లైఫ్స్టైల్ పికప్ ట్రక్ను ఆగస్టు 14న ఆవిష్కరించనున్నట్లు (లాంచ్ కాదు) కంపెనీ ప్రకటించింది. ఈ పికప్ లుక్పై 40 సెకన్ల టీజర్ కూడా రిలీజ్ చేసింది.
2023లో ప్రదర్శించిన Global Pik Up కాన్సెప్ట్ ఆధారంగా ఈ ఉత్పత్తి మోడల్ను రూపొందించారు. ఇప్పటివరకు ఈ పికప్పై ఎన్నో అంచనాలు ఉన్నాయి. ఇప్పుడు మహీంద్రా అధికారికంగా టీజర్ విడుదల చేయడంతో ఆసక్తి మరింత పెరిగింది.
టీజర్లో కనిపించిన డిజైన్
ముందు భాగంలో L ఆకారంలో LED DRLలు కనిపిస్తున్నాయి. వీటి మధ్య సన్నని LED హెడ్ల్యాంప్లను అమర్చారు. బంపర్కు ఇరువైపులా నిలువుగా అమర్చిన LED ఫాగ్ ల్యాంప్లు ఉన్నాయి. గ్రిల్పై ఉన్న Twin Peaks లోగోకు దిగువన ఫ్రంట్ కెమెరాను అమర్చారు.
ఈ కెమెరా కారణంగా పికప్లో 360 డిగ్రీల కెమెరా సిస్టమ్ ఉండే అవకాశం ఉంది. 2026 Scorpio Nలో అందిస్తున్న 540 డిగ్రీల కెమెరా సెటప్ను కూడా ఇందులో ఇవ్వొచ్చనే అంచనాలు ఉన్నాయి. గ్రిల్కు హెక్సాగనల్ డిజైన్ ఇచ్చారు.
డబుల్ క్యాబిన్తో పికప్
సైడ్ ప్రొఫైల్ను పరిశీలిస్తే ఇది డబుల్ క్యాబిన్ లేఅవుట్తో వస్తుందని టీజర్ స్పష్టం చేస్తోంది. వెనుక భాగంలో పొడవైన లోడ్ బెడ్ ఉంటుంది. టెయిల్గేట్పై పెద్ద ‘mahindra’ అక్షరాలను పొందుపరిచారు.
వెనుక LED టెయిల్ ల్యాంప్లు C ఆకారంలో ఉన్నాయి. మొత్తం డిజైన్లో SUV తరహా స్టైలింగ్తో పాటు పికప్ ట్రక్కు అవసరమైన రగ్గడ్ లుక్ కనిపిస్తోంది.
ఇంటీరియర్లోనూ ప్రత్యేకత
క్యాబిన్లో పెద్ద పోర్ట్రెయిట్ తరహా సెంట్రల్ టచ్స్క్రీన్ కనిపించింది. మూడు స్పోక్ల స్టీరింగ్ వీల్ను అందించారు. ఇది మహీంద్రా Vision T ప్రోటోటైప్ను పోలి ఉంటుంది.
డిజిటల్ డ్రైవర్ డిస్ప్లే, డ్యూయల్ జోన్ క్లైమేట్ కంట్రోల్ కోసం రోటరీ నాబ్లు & డ్రైవ్ మోడ్ సెలెక్టర్ కూడా టీజర్లో కనిపించాయి. BE 6, XEV 9e వంటి మోడళ్లలో డిజిటల్ కంట్రోల్కు ఎక్కువ ప్రాధాన్యం ఇచ్చారు. అయితే, Scorpio N పికప్లో ఫిజికల్ కంట్రోల్లు & డిజిటల్ కంట్రోల్లను కలిపి అందించనున్నట్లు తెలుస్తోంది.
అధునాతన ఫీచర్లకు అవకాశం
2023 Global Pik Up కాన్సెప్ట్ను ఆవిష్కరించిన సమయంలో మహీంద్రా పలు కీలక ఫీచర్లను ప్రకటించింది. ఇందులో Level 2 అటానమస్ డ్రైవింగ్, సెమీ ఆటోమేటిక్ పార్కింగ్, 5G ఆధారిత కనెక్టివిటీ & సన్రూఫ్ ఉన్నాయి. అయితే, ఉత్పత్తి మోడల్ (మార్కెట్లోకి వచ్చే మోడల్)లో వీటిలో ఎన్ని ఫీచర్లు వస్తాయనే విషయంపై ఆగస్టు 14న స్పష్టత వచ్చే అవకాశం ఉంది.
డీజిల్ ఇంజిన్తో 4WD
ఇంజిన్ & గేర్బాక్స్ వివరాలను మహీంద్రా ఇంకా పూర్తిగా వెల్లడించలేదు. గతంలో కంపెనీ తెలిపిన వివరాల ప్రకారం, రెండో తరం ఆల్ అల్యూమినియం mHawk డీజిల్ ఇంజిన్ను ఇందులో ఉపయోగించనున్నారు.
ఈ ఇంజిన్కు 6 స్పీడ్ మాన్యువల్ & 6 స్పీడ్ ఆటోమేటిక్ గేర్బాక్స్ ఎంపికలు ఉండే అవకాశం ఉంది. 4WD సిస్టమ్ కూడా అందించనున్నారు. Normal, Grass-Gravel-Snow, Mud-Rut & Sand వంటి డ్రైవ్ మోడ్లు ఉండనున్నాయి.
కొన్ని అంతర్జాతీయ మార్కెట్లలో Scorpio Nలో ఉపయోగిస్తున్న 2.0 లీటర్ mStallion టర్బో పెట్రోల్ ఇంజిన్ను కూడా పికప్లో అందించే అవకాశం ఉంది.
Scorpio N ప్లాట్ఫామ్ ఆధారంగా
కొత్త పికప్ Scorpio N ప్లాట్ఫామ్పై ఆధారపడి ఉంటుంది. అయితే ఎక్కువ లోడ్ బెడ్ కోసం వీల్బేస్ను పొడిగించారు. తదుపరి తరం లాడర్ ఫ్రేమ్పై ఈ పికప్ను నిర్మించారు.
క్రాష్ టెస్టుల్లో మంచి రేటింగ్ సాధించేలా ఈ ప్లాట్ఫామ్ను రూపొందించినట్లు మహీంద్రా గతంలో తెలిపింది. Global NCAP & Euro NCAP భద్రతా ప్రమాణాలను దృష్టిలో పెట్టుకుని అభివృద్ధి చేసినట్లు వెల్లడించింది.
Toyota Hiluxకు ప్రత్యామ్నాయంగా
Scorpio N పికప్ను Toyota Hilux కంటే అందుబాటు ధరలో ఉండే లైఫ్స్టైల్ పికప్గా తీసుకురావాలని మహీంద్రా భావిస్తోంది. ఆఫ్రోడ్ సామర్థ్యంతో పాటు రోజువారీ వినియోగానికి అనువుగా ఉండేలా దీన్ని రూపొందిస్తున్నారు.
మహీంద్రాకు పికప్ విభాగంలో ఇప్పటికే అనుభవం ఉంది. Bolero Camper & Bolero Pik-Up వంటి వాణిజ్య వాహనాలు మార్కెట్లో ఉన్నాయి. గతంలో ప్రైవేట్ కొనుగోలుదారుల కోసం Scorpio Getaway పికప్ను కూడా విక్రయించింది.
అయితే Scorpio N పికప్ మాత్రం ప్రైవేట్ కొనుగోలుదారులను లక్ష్యంగా చేసుకున్న మరింత ప్రీమియం లైఫ్స్టైల్ ట్రక్గా నిలవనుంది. దీని ధర, ఇంజిన్ వివరాలు, ఫీచర్లు & పూర్తి స్పెసిఫికేషన్లపై ఆగస్టు 14న మరింత స్పష్టత వచ్చే అవకాశం ఉంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
