Team India World Record in T20 | ప్రపంచ క్రికెట్ చరిత్రలోనే తొలిసారి: 200 T20I విజయాలతో టీమ్ ఇండియా వరల్డ్ రికార్డ్
ప్రపంచంలో ఏ క్రికెట్ జట్టూ అందుకోలేని ఒక అరుదైన అంకెను భారత క్రికెట్ జట్టు అందుకుంది! ఆస్ట్రేలియా, ఇంగ్లాండ్, చిరకాల ప్రత్యర్థి పాకిస్థాన్... ఎవరి వల్లా కాని అసాధ్యమైన రికార్డును మన టీమ్ ఇండియా చేసి చూపించింది! అంతర్జాతీయ టీ20 క్రికెట్‌లో మొట్టమొదటిసారిగా 200 విజయాలు సాధించిన ఏకైక జట్టుగా నిలిచి ప్రపంచ రికార్డును సరికొత్తగా తిరగరాసింది!
2006లో తొలి టీ20 మ్యాచ్ ఆడిన నాటి నుంచి... ఎంఎస్ ధోనీ సారథ్యంలో 2007 వరల్డ్ కప్ కొట్టడం, ఆ తర్వాత రోహిత్ శర్మ సేన 2024లో సాధించిన విశ్వవిజయం వరకు భారత జట్టు ఆడిన విధానం ఒక అద్భుతం. ఇప్పటివరకు భారత్ మొత్తం 300 అంతర్జాతీయ టీ20 మ్యాచ్‌లు ఆడితే... అందులో ఏకంగా 200 మ్యాచ్‌లలో భారత్‌దే పైచేయి! 83 మ్యాచ్‌లలో ఓటమి ఎదురైనా, 7 టై మ్యాచ్‌లు, మరో 10 మ్యాచ్‌లలో ఫలితం తేలలేదు.
ఈ రికార్డు ఎంత గొప్పదో అర్థం కావాలంటే ప్రత్యర్థి జట్ల సంఖ్యలను గమనించాలి. మన తర్వాతి స్థానంలో ఉన్న పాకిస్థాన్ ఇప్పటివరకు 176 విజయాల దగ్గరే ఆగిపోయింది. అంటే టీమ్ ఇండియా కంటే పాకిస్థాన్ ఏకంగా 24 విజయాల వెనుకంజలో ఉంది! ఇక భారత్ అత్యధికంగా 297 పరుగుల భారీ స్కోరు బాదితే, అత్యల్ప స్కోరు 74 పరుగులుగా నమోదైంది. ఒకవైపు సీనియర్లు వీడ్కోలు పలికినా, కొత్త తరం కుర్రాళ్లు అదే దూకుడును కొనసాగిస్తూ విజయాల పరంపరను ఎక్కడా ఆపలేదు.
అయితే ఈ 200వ విజయం భారత్‌కు అంత తేలిగ్గా రాలేదు. న్యూజిలాండ్‌తో జరిగిన మ్యాచ్‌లో 181 పరుగుల ఛేజింగ్‌లో 70 పరుగులకే 5 వికెట్లు కోల్పోయి భారత్ ఓటమి అంచున నిలిచింది. కానీ అక్కడే మన కుర్రాళ్లు మ్యాచ్‌ను అద్భుతంగా తిప్పికొట్టారు. అద్భుతమైన భాగస్వామ్యంతో మ్యాచ్‌ను చివరి ఓవర్ దాకా లాక్కొచ్చి భారత్‌కు తిరుగులేని విజయాన్ని అందించారు. అలా ఈ చారిత్రక 200వ మైల్‌స్టోన్‌ను భారత క్రికెట్ చరిత్రలో సువర్ణాక్షరాలతో లిఖించారు!
అందుకే ఐసీసీ సైతం 'హిస్టారిక్ మైల్‌స్టోన్.. గోల్డెన్ లెగసీ' అంటూ టీమ్ ఇండియాను కొనియాడింది. టీ20 ఫార్మాట్‌లో భారత్ ఆధిపత్యానికి ఇది నిదర్శనం! మరి 300 మ్యాచ్‌ల్లో 200 విజయాలు సాధించిన మన మెన్స్ టీమ్ ఘనతపై మీరేమనుకుంటున్నారో కింద కామెంట్ చేయండి!
టాప్ హెడ్ లైన్స్
ట్రెండింగ్ వార్తలు
