Did Dhoni Ruin Yuvraj Singh’s Career? | యువరాజ్ కెరీర్‌ను ధోనీ నాశనం చేశాడా? | ABP Desam

టీమిండియా స్టార్ ప్లేయర్స్ మహేంద్ర సింగ్ ధోనీ ( Mahendra Singh Dhoni ), యువరాజ్ సింగ్ ( Yuvraj Singh ) మధ్య ఉన్న సంబంధంపై ఎప్పుడూ ఏదో ఒక చర్చ జరుగుతూనే ఉంటుంది. ముఖ్యంగా ధోనీ వల్లే తన కొడుకు కెరీర్ నాశనమైందని యువీ తండ్రి యోగ్‌రాజ్ సింగ్ తరచూ ఆరోపిస్తుంటారు. అయితే, ఈ వివాదానికి అప్పటి చీఫ్ సెలెక్టర్ సందీప్ పాటిల్ తాజాగా ఫుల్ స్టాప్ పెట్టారు. 

తాజాగా ఒక ఇంటర్వ్యూలో మాట్లాడిన సందీప్ పాటిల్, యోగ్‌రాజ్ ఆరోపణల్లో నిజం లేదని తేల్చి చెప్పారు. "యువరాజ్ సింగ్‌ను జట్టు నుంచి తప్పించాలని ధోనీ ఎప్పుడూ కోరలేదు. సెలెక్షన్ మీటింగ్‌లలో కానీ, పర్యటనల్లో కానీ ధోనీ ఎన్నడూ టీమ్ సెలెక్షన్‌లో జోక్యం చేసుకోలేదు. జట్టు ఎంపిక విషయంలో అతనికి సెలెక్షన్ కమిటీపై పూర్తి నమ్మకం ఉండేది" అని పాటిల్ స్పష్టం చేశారు. ఒక తండ్రిగా యోగ్‌రాజ్ ఆవేదనను అర్థం చేసుకోవచ్చని, కానీ దానికి ధోనీని నిందించడం సరికాదని ఆయన పేర్కొన్నారు.

అంతేకాకుండా, ప్రస్తుత హెడ్ కోచ్ గౌతమ్ గంభీర్‌తో తనకున్న విభేదాల గురించి కూడా పాటిల్ ఆసక్తికర విషయాలు పంచుకున్నారు. తాను చీఫ్ సెలెక్టర్‌గా ఉన్న సమయంలో గంభీర్‌ను తప్పించి శిఖర్ ధావన్‌ను ఎంపిక చేయడంతో, గంభీర్ తనపై ఆగ్రహం పెంచుకున్నాడని వెల్లడించారు. అప్పటి నుంచి గంభీర్ తనతో మాట్లాడటం మానేశాడని, కలిసినా కనీసం పలకరించేవాడు కాదని పాటిల్ చెప్పారు. గంభీర్ ఏ విషయాన్నైనా అంత త్వరగా మర్చిపోడని, ఎవరినీ అంత సులభంగా క్షమించడని ఆయన వ్యాఖ్యానించారు.