దూసుకుపోతున్న ఎలక్ట్రిక్ స్కూటర్లు - జూన్ సేల్స్లో TVS నంబర్ వన్; Bajaj, Ather, Vida జోరు
జూన్ 2026లో భారత ఎలక్ట్రిక్ స్కూటర్ మార్కెట్లో 1.93 లక్షల యూనిట్లు అమ్ముడయ్యాయి. TVS అగ్రస్థానంలో నిలవగా, బజాజ్, Ather, Vida, Ola మధ్య గట్టి పోటీ కంటిన్యూ అవుతోంది.
Electric scooter sales in June 2026: జూన్ 2026లో దేశవ్యాప్తంగా మొత్తం 1,93,495 ఎలక్ట్రిక్ స్కూటర్లు డెలివరీ అయ్యాయి. ఇది గత ఏడాదితో పోలిస్తే 75 శాతం వృద్ధిని నమోదు చేయడమే కాకుండా, మార్చి 2026లో నమోదైన రికార్డు అమ్మకాలకు కేవలం 5,891 యూనిట్ల దూరంలో నిలిచింది. మే నెలతో పోలిస్తే జూన్లో 12 శాతం అధిక అమ్మకాలు నమోదవడం, ఎలక్ట్రిక్ స్కూటర్లకు పెరుగుతున్న ఆదరణకు అద్దం పడుతోంది.
ఏ కంపెనీ ఎన్ని స్కూటర్లు అమ్మింది?
జూన్ నెలలో TVS Motor Co మరోసారి ఎలక్ట్రిక్ స్కూటర్ మార్కెట్లో అగ్రస్థానాన్ని నిలబెట్టుకుంది. కంపెనీ మొత్తం 46,999 యూనిట్లను విక్రయించి 24 శాతం మార్కెట్ వాటాను సొంతం చేసుకుంది. గత ఏడాదితో పోలిస్తే TVS అమ్మకాలు 76 శాతం పెరిగాయి. మార్చి 2026 తర్వాత కంపెనీకి ఇదే రెండో అత్యధిక నెలవారీ అమ్మకాలుగా నిలిచింది. ఇటీవల 10 లక్షల ఎలక్ట్రిక్ టూ వీలర్ విక్రయాల మైలురాయిని కూడా TVS అధిగమించింది.
TVSకు అత్యంత సమీప పోటీదారుగా ఉన్న బజాజ్ ఆటో జూన్లో 43,234 చేతక్ ఎలక్ట్రిక్ స్కూటర్లను విక్రయించింది. గత ఏడాదితో పోలిస్తే కంపెనీ అమ్మకాలు 80 శాతం పెరిగాయి. దీంతో బజాజ్ 22 శాతం మార్కెట్ వాటాను సొంతం చేసుకుంది. అలాగే 8 లక్షల ఎలక్ట్రిక్ టూ వీలర్ విక్రయాల మైలురాయిని దాటిన మూడో భారతీయ కంపెనీగా బజాజ్ నిలిచింది.
ఇది కూడా చదవండి: టాటా సియెర్రా EV వేరియంట్లలో పవర్ట్రెయిన్ ఆప్షన్లు ఇవే.. మీ అవసరానికి సరిపడే కాంబినేషన్ ఏది?
బెంగళూరుకు చెందిన Ather Energy కూడా జూన్లో అద్భుతమైన ఫలితాలు నమోదు చేసింది. కంపెనీ 31,188 యూనిట్లను విక్రయించి 16 శాతం మార్కెట్ వాటాను సాధించింది. గత ఏడాదితో పోలిస్తే అమ్మకాలు 95 శాతం పెరిగాయి. కుటుంబ అవసరాలను దృష్టిలో పెట్టుకుని రూపొందించిన Rizta స్కూటర్కు లభిస్తున్న భారీ ఆదరణ కంపెనీ విక్రయాలకు ప్రధాన బలంగా నిలిచింది. ఇప్పటికే Rizta స్కూటర్ 3 లక్షలకుపైగా అమ్మకాల మైలురాయిని దాటింది.
ప్రపంచంలోనే అతి పెద్ద టూ వీలర్ తయారీ సంస్థ Hero MotoCorpకు చెందిన Vida బ్రాండ్ కూడా వేగంగా ఎదుగుతోంది. జూన్లో Vida 21,792 ఎలక్ట్రిక్ స్కూటర్లను విక్రయించి 175 శాతం వార్షిక వృద్ధిని నమోదు చేసింది. కంపెనీ మార్కెట్ వాటా 11 శాతానికి చేరుకుంది. ఈ ఏడాది తొలి ఆరు నెలల్లోనే Vida అమ్మకాలు గత ఏడాది మొత్తం అమ్మకాలలో 94 శాతానికి చేరుకోవడం విశేషం.
ఒకప్పుడు మార్కెట్లో అగ్రస్థానంలో ఉన్న Ola Electric ప్రస్తుతం ఐదో స్థానంలో కొనసాగుతోంది. జూన్లో కంపెనీ 16,144 యూనిట్లను విక్రయించింది. గత ఏడాదితో పోలిస్తే అమ్మకాలు 22 శాతం తగ్గినా, వరుసగా ఐదో నెల కూడా నెలవారీ వృద్ధిని నమోదు చేసింది. ప్రస్తుతం Ola మార్కెట్ వాటా 8 శాతంగా ఉంది.
ఇది కూడా చదవండి: Ather 450Xలో మూడు కొత్త కలర్ ఆప్షన్లు - మీ టైమ్ సేవ్ చేసే కొత్త ఛార్జర్ కూడా లాంచ్
Greaves Electric Mobility కూడా జూన్లో 10,928 Ampere ఎలక్ట్రిక్ స్కూటర్లను విక్రయించి 152 శాతం వార్షిక వృద్ధిని నమోదు చేసింది. కొత్త Magnus Neo మోడల్కు లభిస్తున్న మంచి స్పందన కంపెనీ విక్రయాలను పెంచింది.
River Mobility 4,391 యూనిట్లతో 214 శాతం వృద్ధిని నమోదు చేసి టాప్ స్టార్టప్లలో ఒకటిగా నిలిచింది. అలాగే Bgauss 3,916 యూనిట్లు, E-Sprinto Green Energy 1,878 యూనిట్లు, Simple Energy 1,365 యూనిట్లతో టాప్-10 జాబితాలో చోటు దక్కించుకున్నాయి.
ఈ ఏడాది జనవరి నుంచి జూన్ వరకు దేశవ్యాప్తంగా మొత్తం 9,70,611 ఎలక్ట్రిక్ టూ వీలర్లు అమ్ముడయ్యాయి. ఇది గత ఏడాదితో పోలిస్తే 53 శాతం అధికం. జూన్ నెలలో టాప్-6 కంపెనీలు కలిపి 1,70,285 యూనిట్లను విక్రయించి మొత్తం మార్కెట్లో 88 శాతం వాటాను సొంతం చేసుకున్నాయి. టాప్-10 కంపెనీలను కలిపితే మార్కెట్ వాటా 94 శాతానికి చేరుకుంది. మిగిలిన 165కుపైగా కంపెనీలు కేవలం 6 శాతం మార్కెట్ వాటా కోసం పోటీ పడుతున్నాయి.
పెట్రోల్ ధరల పెరుగుదలతో ఎలక్ట్రిక్ స్కూటర్లపై ప్రజల ఆసక్తి మరింత పెరుగుతోంది. ఢిల్లీలో అమల్లోకి వచ్చిన కొత్త EV Policy 2.0 కూడా ఈ విభాగానికి మరింత ఊతమివ్వనుంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
