టాటా సియెర్రా vs కియా సెల్టోస్‌ మధ్య స్పీడ్‌ టెస్ట్‌.. ఏ కారు గెలిచింది?
టాటా సియెర్రా & కియా సెల్టోస్‌ డీజిల్‌ ఆటోమేటిక్‌ పనితీరు ఎలా ఉంది? 0-100 కి.మీ. వేగం, రోలింగ్‌ యాక్సిలరేషన్‌, పవర్‌, టార్క్‌ & ధరల పూర్తి వివరాలు.
Tata Sierra vs Kia Seltos diesel AT: మిడ్‌సైజ్‌ SUVలలో డీజిల్‌ ఇంజిన్‌తో వస్తున్న మోడళ్లు ఇప్పుడు చాలా తక్కువగా ఉన్నాయి. ఈ విభాగంలో టాటా సియెర్రా & కియా సెల్టోస్‌ ప్రత్యేకంగా నిలుస్తున్నాయి. రెండింటికీ డీజిల్‌ ఇంజిన్‌తో పాటు ఆటోమేటిక్‌ గేర్‌బాక్స్‌ ఉంది. ఈ రెండు SUVల మైలేజీని గత కథనంలో పోల్చాం. ఇప్పుడు, యాక్సిలరేషన్‌లో ఏ కారు మెరుగ్గా ఉందో చూద్దాం.
టాటా సియెర్రాలో 1.5 లీటర్‌ డీజిల్‌ ఇంజిన్‌ ఉంది. ఇది 118hp పవర్‌ & 280Nm టార్క్‌ను ఇస్తుంది. కియా సెల్టోస్‌లో 1.5 లీటర్‌ డీజిల్‌ ఇంజిన్‌ ఉంటుంది. ఇది 116hp పవర్‌ & 250Nm టార్క్‌ను అందిస్తుంది.
అంటే పవర్‌లో సియెర్రా 2hp ముందుంది & టార్క్‌లో ఏకంగా 30Nm ఎక్కువగా ఉంది. సియెర్రా డీజిల్‌ ఆటోమేటిక్‌ వెర్షన్‌, మాన్యువల్‌ వెర్షన్‌ కంటే 20Nm అధిక టార్క్‌ను అందిస్తుంది.
రెండు SUVలలోనూ 6-స్పీడ్‌ టార్క్‌ కన్వర్టర్‌ ఆటోమేటిక్‌ గేర్‌బాక్స్‌ ఉంది. రెండు కార్లలోనూ వేరియబుల్‌ జ్యామెట్రీ టర్బోచార్జర్‌ ఉంటుంది. ఇది టర్బో ల్యాగ్‌ను తగ్గించి పవర్‌ డెలివరీని మెరుగుపరుస్తుంది.
టైర్ల విషయంలో.. సియెర్రాకు 19 అంగుళాల వీల్స్‌ ఉన్నాయి. సెల్టోస్‌లో 18 అంగుళాల వీల్స్‌ ఉన్నాయి.
ఇది కూడా చదవండి: BaaS కింద ఎలక్ట్రిక్‌ కారును కొంటే కిలోమీటర్‌కు ఎంత ఖర్చువుతుంది? భారత్‌లో BaaS EVల పూర్తి లిస్ట్ ఇదే!
0-100 కి.మీ. వేగం
ఆగి ఉన్న స్థితి నుంచి 100 కి.మీ. వేగాన్ని అందుకునే టెస్ట్‌లో కియా సెల్టోస్‌ స్వల్ప ఆధిక్యం సాధించింది. సియెర్రా 100 కి.మీ. వేగాన్ని అందుకోవడానికి 13.37 సెకన్లు తీసుకుంది. సెల్టోస్‌ మాత్రం 13.17 సెకన్లలోనే ఈ వేగాన్ని అందుకుంది.
20 కి.మీ. వేగాన్ని చేరడంలోనూ సెల్టోస్‌దే ఆధిక్యం. సెల్టోస్‌ 1.36 సెకన్లలో 20 కి.మీ. వేగాన్ని అందుకోగా, సియెర్రా 1.44 సెకన్లు తీసుకుంది.
40 కి.మీ. వేగం అందుకోవడనికి సెల్టోస్‌ 3.11 సెకన్ల సమయం తీసుకుంది. సియెర్రా 3.53 సెకన్లు తీసుకుంది. 60 కి.మీ. స్పీడ్‌ కోసం కూడ రెండు కార్ల మధ్య వ్యత్యాసం చాలా తక్కువగా ఉంది. సెల్టోస్‌ 5.81 సెకన్లు, సియెర్రా 5.93 సెకన్లు తీసుకున్నాయి.
80 కి.మీ. వేగాన్ని సెల్టోస్‌ 9 సెకన్లలో చేరుకుంది. సియెర్రాకు 9.31 సెకన్లు పట్టింది. మొత్తంగా చూస్తే.. 0-100 కి.మీ. పరీక్షలో సెల్టోస్‌ 0.20 సెకన్ల ఆధిక్యంతో విజయం సాధించింది.
ఇది కూడా చదవండి: మూడు స్క్రీన్లు, కొత్త బ్యాటరీ, AI ఫీచర్లు.. Mahindra BE 6 Sporteqలో అన్నీ ప్రత్యేకతలే!
తక్కువ బరువే కారణమా?
పవర్‌ & టార్క్‌లో సియెర్రా స్పష్టంగా ముందున్నప్పటికీ, వేగంలో సెల్టోస్‌ ముందుండడనికి ప్రధాన కారణం దాని తక్కువ బరువుగా చెప్పవచ్చు. తక్కువ బరువు కారణంగా ఇంజిన్‌ తన శక్తిని మరింత సమర్థంగా ఉపయోగించగలుగుతుంది.
ఈ పరీక్ష సమయంలో ఉష్ణోగ్రత 27 డిగ్రీల సెల్సియస్‌గా ఉంది.
రోలింగ్‌ యాక్సిలరేషన్‌లో మారిన ఫలితం
కారు కదులుతున్న సమయంలో వేగాన్ని పెంచే పరీక్షలో రెండు SUVల ఫలితాలు భిన్నంగా ఉన్నాయి. 20-80 కి.మీ. వేగం పరీక్షలో, మూడో గేర్‌లో కిక్‌డౌన్‌ ఉపయోగించగా సెల్టోస్‌ 7.72 సెకన్లలో పరీక్షను పూర్తి చేసింది. సియెర్రా 7.97 సెకన్లు తీసుకుంది. దీంతో సెల్టోస్‌ 0.25 సెకన్ల ఆధిక్యంలో నిలిచింది.
అయితే 40-100 కి.మీ. వేగం పరీక్షలో సియెర్రా తన సత్తా చూపించింది. నాలుగో గేర్‌లో కిక్‌డౌన్‌ ఉపయోగించినప్పుడు సియెర్రా కేవలం 9.42 సెకన్లలో పరీక్షను పూర్తి చేసింది. సెల్టోస్‌ 10.04 సెకన్లు తీసుకుంది. దీంతో సియెర్రా ఏకంగా 0.62 సెకన్ల ఆధిక్యం ప్రదర్శించింది.
దేని ధర ఎంత?
టాటా సియెర్రా ధరలు రూ.15.99 లక్షల నుంచి రూ.21.29 లక్షల వరకు ఉన్నాయి. కియా సెల్టోస్‌ ధరలు రూ.15.32 లక్షల నుంచి రూ.21.82 లక్షల వరకు ఉన్నాయి. ప్రారంభ ధర విషయంలో సెల్టోస్‌ రూ.67,000 తక్కువగా ఉండగా, టాప్ వేరియంట్‌ ధరలో సియెర్రా రూ.53,000 తక్కువగా ఉంది.
మొత్తంగా చూస్తే, 0-100 కి.మీ. వేగం పరీక్షలో కియా సెల్టోస్‌ స్వల్ప తేడాతో గెలిచింది. తక్కువ బరువు దీనికి ప్రధానంగా కలిసొచ్చింది. అయితే 40-100 కి.మీ. రోలింగ్‌ యాక్సిలరేషన్‌లో టాటా సియెర్రా తన అధిక పవర్‌ & టార్క్‌తో స్పష్టమైన పెర్ఫార్మెన్స్‌ ఇచ్చింది. కాబట్టి, డైలీ డ్రైవింగ్‌లో చురుకుదనం కోరుకునేవారికి సెల్టోస్‌, వేగంగా ఓవర్‌టేక్‌ చేయడంలో ఎక్కువ పవర్‌ కోరుకునేవాళ్లకు సియెర్రా మంచి ఆప్షన్లు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
