SKM Update: రైతులతో బుధవారం కేంద్రం కీలక భేటీ.. కథ క్లైమాక్స్ చేరిందా?

సాగు చట్టాలపై రైతుల చేస్తోన్న ఉద్యమం క్లైమాక్స్‌కు వచ్చిందా? రేపు జరగబోయే సమావేశంలో ఇది తేలే అవకాశం ఉంది.

రైతులతో కేంద్రం కీలక భేటీ

దాదాపు ఏడాది కాలంగా సాగు చట్టాల రద్దుపై రైతులు చేస్తోన్న పోరాటానికి రేపు ముగింపు దొరకనుందా? ఈ విషయంపై బుధవారం మధ్యాహ్నం కేంద్రంతో సంయుక్త కిసాన్ మోర్చ (ఎస్‌కేఎమ్)కు చెందిన ఐదుగురు సభ్యుల కమిటీ సమావేశం కానుంది. రైతుల ముందు కేంద్రం ఐదు ప్రతిపాదనలు పెట్టనుందని సమాచారం. 

ప్రతిపాదన..

కనీస మద్దతు ధర (ఎమ్‌ఎస్‌పీ)పై కేంద్రం తన అభిప్రాయాన్ని స్పష్టం చేసేందుకు సిద్ధంగా ఉంది. ఎమ్‌ఎస్‌పీపై చట్టపరమైన గ్యారెంటీ ఇవ్వడంపై ఓ కమిటీని ఏర్పాటు చేస్తామని ఇప్పటికే కేంద్ర ప్రకటించింది. ఈ కమిటీలో రైతుల సంఘాలు, ప్రభుత్వ అధికారులు సహా రాష్ట్ర ప్రతినిధులు ఉండనున్నారు.

రైతులపై పెట్టిన కేసులను కూడా ఉపసంహరించుకుంటామని ప్రభుత్వం హామీ ఇచ్చింది.

ప్రభుత్వం చేసిన ప్రతిపాదనలపై పంజాబ్‌కు చెందిన 90 శాతం మంది రైతులు సంతృప్తి వ్యక్తం చేసినట్లు సమాచారం.

రేపే తేలనుంది..

" మేం ఆందోళన విరమిస్తేనే మాపై కేసులను ఉపసంహరిస్తామని ప్రభుత్వ ప్రతిపాదన చెబుతోంది. కానీ దీనిపై మాకు స్పష్టత లేదు. కేసులు వెనక్కి తీసుకునే ప్రక్రియ వెంటనే మొదలు పెట్టాలి. ఆందోళన విరమించడంపై రేపు మధ్యాహ్నం 2 గంటలకు జరగబోయే సమావేశం తర్వాత నిర్ణయం తీసుకుంటాం.                                             "

-సంయుక్త కిసాన్ మోర్చా

" మా డిమాండ్లకు అంగీకరిస్తున్నాం.. ఆందోళన విరమించాలని ప్రభుత్వం చెబుతోంది. కానీ ప్రభుత్వ ప్రతిపాదనలు స్పష్టంగా లేవు. ఈ ప్రతిపాదనలపై మాకున్న ఆందోళనలు రేపు మధ్యాహ్నం జరగబోయే సమావేశంలో తొలిగే అవకాశం ఉంది. మా ఆందోళన ఎక్కడికి వెళ్లదు.. మేమూ ఎక్కడికి వెళ్లం.                                               "

-రాకేశ్ టికాయత్, బేకేయూ నేత 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి