Bone Health : 30 తర్వాత ఎముకలు బలంగా ఉండాలంటే.. డైట్లో తప్పక ఉండాల్సిన సూపర్ ఫుడ్స్ ఇవే
Foods for Strong Bones : వయసు పెరిగే కొద్ది చాలామందికి బోన్స్ వీక్ అవుతాయి. అందుకే 30 దాటగానే ఆహారంలో కొన్ని ఫుడ్స్ చేర్చుకోవాలి. అవేంటో.. వాటివల్ల కలిగే లాభాలు ఏంటో చూసేద్దాం.
- ముప్పై ఏళ్లకే ఎముకలు బలహీనపడుతున్నాయి, పోషకాహారం ముఖ్యం.
- సోయా, ఆకుకూరలు, పాల ఉత్పత్తులు ఎముకలకు బలాన్నిస్తాయి.
- చేపలు, బాదం, చియా సీడ్స్ కాల్షియం, విటమిన్ డి అందిస్తాయి.
- సప్లిమెంట్స్ కోసం వైద్యులను సంప్రదించండి, ఆరోగ్యం జాగ్రత్త.
Diet for Strong Bones After 30 : వయసు పెరిగే కొద్దీ శరీరంతో పాటు ఎముకలు కూడా క్రమంగా బలహీనపడతాయి. ఈ మధ్యకాలంలో 30 ఏళ్ల నుంచే ఈ సమస్యలు పెరుగుతున్నాయి. చాలామంది కీళ్లనొప్పులు, బోన్ ఫ్రాక్చర్ వంటి సమస్యలతో ఇబ్బంది పడుతున్నారు. దీనికి ప్రధాన కారణం కాల్షియం, పోషకాల లోపమే. దీనివల్ల కీళ్ల నొప్పులు, పట్టేసినట్లు ఉండడం, నడవడంలో ఇబ్బంది వంటివి ఎదుర్కొంటారు.
ఎముకలు శరీరానికి ఆధారం. వాటిని బలంగా ఉంచుకోవడానికి సరైన ఆహారం తీసుకోవడం చాలా ముఖ్యం. అందుకే మన డైట్లో కొన్ని ఫుడ్స్ చేర్చుకోవాలని నిపుణులు సూచిస్తున్నారు. దీనివల్ల ఎముకలు చాలా కాలం పాటు బలంగా, ఆరోగ్యంగా ఉంచుకోవచ్చు. మరి బోన్స్ని బలోపేతం చేయడానికి ఎలాంటి ఫుడ్స్ తీసుకుంటే మంచిదో ఇప్పుడు చూసేద్దాం.
సోయా
వెజిటేరియన్స్, నాన్వెజిటేరియన్స్ తినగలిగే ఫుడ్స్లో సోయా ఒకటి. ముఖ్యంగా శాకాహారులు సోయా ఫుడ్స్ ప్రోటీన్ కోసం తీసుకుంటారు. అయితే ఇవి కాల్షియంకి కూడా అద్భుతమైన సోర్స్. టోఫు, సోయా పాలలో మంచి మొత్తంలో ప్రోటీన్, కాల్షియం లభిస్తాయి. ఇవి ఎముకలను బలపరిచి, కండరాలకు మద్దతు ఇవ్వడానికి సహాయపడతాయి. వాటిలో కొలెస్ట్రాల్ ఉండదు. కాబట్టి గుండెకు కూడా మంచివిగా పరిగణిస్తారు.
ఆకుకూరలు..
పాలకూర, క్యాబేజీ, బ్రోకలీ, కాలీఫ్లవర్ వంటి ఆకుకూరల్లో కాల్షియం, ఇతర ఖనిజాలు పుష్కలంగా ఉంటాయి. ఇవి ఎముకల క్షీణతను తగ్గించడంలో సహాయపడతాయి. ఈ కూరగాయలను క్రమం తప్పకుండా తీసుకోవడం వల్ల శరీరంలో ఖనిజ సమతుల్యత మెరుగై.. ఎముక సాంద్రత పెరుగుతుంది.
మిల్క్ పొడెక్ట్స్
పాలు, పాల ఉత్పత్తులు కాల్షియానికి మంచి సోర్స్. పెరుగు, యోగర్ట్ కూడా ఎముకలను బలపరచడమే కాకుండా జీర్ణక్రియను మెరుగుపరుస్తాయి. ప్రతిరోజూ ఒక గ్లాసు పాలు లేదా ఒక గిన్నె పెరుగు తీసుకోవడం వల్ల ఎముకల ఆరోగ్యం గణనీయంగా మెరుగుపడుతుంది.
చేపలు
చేపలలో కాల్షియంతో పాటు విటమిన్ డి కూడా ఉంటుంది. ఇది శరీరంలోని కాల్షియంను సరిగ్గా గ్రహించడానికి సహాయపడుతుంది. ఒమేగా-3 ఫ్యాటీ యాసిడ్లు.. ఎముకలు, కీళ్ల నొప్పులను తగ్గించి.. శరీరాన్ని చురుకుగా ఉంచడంలో సహాయపడతాయి.
బాదం
బాదంలో కాల్షియం, ప్రోటీన్, ఆరోగ్యకరమైన కొవ్వులు పుష్కలంగా ఉంటాయి. ఇవి ఎముకలను, కండరాలను బలపరుస్తాయి. ప్రతిరోజూ 5-8 నానబెట్టిన బాదాలను తినడం ఎముకలకు చాలా మేలు జరుగుతుంది. బాదం పాలు కూడా ఒక మంచి ఎంపిక.
చియా సీడ్స్
చియా గింజలు, గసగసాలు, అవిసె గింజల వంటి చిన్న విత్తనాల్లో పోషకాలు పుష్కలంగా ఉంటాయి. వీటిలో కాల్షియం, మెగ్నీషియం, ఫైబర్ పుష్కలంగా ఉంటాయి. చియా సీడ్స్, గసగసాలు ఎముకల పెరుగుదలను, బలాన్ని ప్రోత్సహిస్తాయి. ఇవి శరీరంలోని ఖనిజాల సమతుల్యతను కూడా మెరుగుపరుస్తాయి.
కాబట్టి ఈ ఫుడ్స్ మీరు రెగ్యులర్గా తీసుకుంటే ఆరోగ్యానికే కాకుండా.. ఎముకలకు కూడా మేలు జరుగుతుంది. అలాగే కాల్షియం లెవెల్స్, విటమిన్ డి లెవెల్స్ తగ్గకుండా చూసుకోవాలి. లోపం ఉంటే వైద్యుల సూచనలతో సప్లిమెంట్స్ తీసుకుంటే మంచి ఫలితాలు ఉంటాయి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
