Morning Salt Water : ఉదయం ఖాళీ కడుపుతో ఉప్పు నీరు తాగితే ఏమవుతుంది? తెలుసుకోవాల్సిన విషయాలు ఇవే

Salt Water on an Empty Stomach : ఉదయాన్నే పరగడుపున ఉప్పు నీరు తాగితే శరీరం డిటాక్స్ అవుతుందని.. జీర్ణక్రియ మెరుగుపడుతుందని.. బరువు తగ్గుతారని సోషల్ మీడియాలో వీడియోలు కనిపిస్తుంటాయి. వీటిలో నిజమెంత?

సాల్ట్ వాటర్ తాగడం ఆరోగ్యానికి మంచిదేనా?

ఉప్పు నీరు తాగితే శరీరంలోని విషపదార్థాలు, టాక్సిన్స్ బయటకు వెళ్లిపోతాయని చాలామంది నమ్ముతారు. కానీ ఆరోగ్యవంతమైన వ్యక్తుల్లో ఈ పనిని ప్రధానంగా కాలేయం, కిడ్నీలు సహజంగానే చేస్తాయి. కాబట్టి ఉప్పు నీటిని డిటాక్స్ డ్రింక్గా భావించకూడదు.

గోరువెచ్చని నీటిలో చాలా తక్కువ మోతాదులో ఉప్పు కలిపి తాగడం వల్ల కొందరికి జీర్ణక్రియ మెరుగుపడినట్లు అనిపించవచ్చు. అయితే దీనిపై మరింత పరిశోధనలు అవసరం. మలబద్ధకానికి ఇది చికిత్స కాదని గుర్తించుకోవాలి.

ఉప్పులో ఉండే సోడియం శరీరంలో ద్రవాల సమతుల్యాన్ని కాపాడటానికి అవసరం అవుతుంది. అయితే సాధారణ ఆహారం ద్వారానే చాలామందికి అవసరమైన సోడియం లభిస్తుంది. అదనంగా ఉప్పు నీరు తాగాల్సిన అవసరం చాలా మందికి ఉండదు.

రోజూ అధిక మోతాదులో ఉప్పు నీరు తాగితే రక్తపోటు పెరగడం, శరీరంలో నీరు నిల్వ ఉండటం, కిడ్నీలపై అదనపు ఒత్తిడి పడటం వంటి సమస్యలు రావచ్చు. ముఖ్యంగా హైబీపీ, గుండె జబ్బులు, కిడ్నీ వ్యాధులు ఉన్నవారు దీన్ని అలవాటుగా చేసుకోకూడదు.

ఒకవేళ తాగాలనుకుంటే ఒక గ్లాస్ గోరువెచ్చని నీటిలో చిటికెడు ఉప్పు మాత్రమే కలపాలి. ఎక్కువ ఉప్పు వేయడం మంచిది కాదు. రోజూ తాగే అలవాటు చేసుకునే ముందు వైద్యుల సలహా తీసుకోవడం ఉత్తమం.

హైబీపీ ఉన్నవారు, కిడ్నీ వ్యాధులతో బాధపడేవారు, గుండె జబ్బులు ఉన్నవారు, గర్భిణులు శరీరంలో వాపు సమస్యలు ఉన్నవారు తాగకపోవడమే మంచిది. అలాగే ఉప్పు నీరు తాగితే బరువు తగ్గుతారని చెప్పే శాస్త్రీయ ఆధారాలు లేవు కాబట్టి దీనిపైనే ఫోకస్ చేయకూడదు.

అలాగే ఉప్పు నీరు తాగిన తర్వాత తల తిరగడం, వాంతులు, అధిక దాహం వంటి లక్షణాలు కనిపిస్తే వెంటనే వైద్యుడిని సంప్రదించండి.