Male Fertility : మగవారిలో స్పెర్మ్ నాణ్యత(Sperm Quality) తగ్గించే అలవాట్లు ఇవే.. ఇప్పటికైనా మార్చుకుంటే మంచిదంటోన్న నిపుణులు

Sperm Quality : ఈ మధ్యకాలంలో యువతలో స్పెర్మ్ క్వాలిటీ తగ్గుతుందని అనేక అధ్యయనాలు చెప్తున్నాయి. సంతానోత్పత్తి సమస్యలు రాకుండా ఉండాలంటే కొన్ని అలవాట్లకు దూరంగా ఉండాలని అంటున్నారు.

స్పెర్మ్ క్వాలిటీ తగ్గడానికి ఈ అలవాట్లే కారణమా

రోజంతా కూర్చునే జీవనశైలి వల్ల బరువు పెరగడం, మెటబాలిక్ సమస్యలకు దారితీస్తాయి. ఇవి హార్మోన్ల సమతుల్యతను ప్రభావితం చేసి స్పెర్మ్ నాణ్యతపై పరోక్షంగా ప్రభావం చూపే అవకాశం ఉందని నిపుణులు చెప్తున్నారు.

సిగరెట్‌లోని రసాయనాలు ఆక్సిడేటివ్ స్ట్రెస్‌ను పెంచవచ్చు. దీనివల్ల స్పెర్మ్ కౌంట్, నాణ్యత, ఆకృతి వంటి అంశాలు ప్రభావితమయ్యే అవకాశం ఉంది. అందుకే పొగతాగడం తగ్గించడం లేదా పూర్తిగా మానేయడం స్పెర్మ్ ఆరోగ్యానికి మంచిదని నిపుణులు సూచిస్తున్నారు.

తరచూ లేదా ఎక్కువ మోతాదులో మద్యం తీసుకోవడం వల్ల టెస్టోస్టెరాన్ వంటి హార్మోన్లపై ప్రభావం పడుతుంది. దీంతో స్పెర్మ్ ఉత్పత్తి, నాణ్యత దెబ్బతినే అవకాశం ఉంటుంది.

రోజూ తగినంత నిద్ర లేకపోవడం వల్ల హార్మోన్ల సమతుల్యత దెబ్బతింటుంది. దీర్ఘకాలిక నిద్రలేమి పురుషుల పునరుత్పత్తి ఆరోగ్యంపై కూడా ప్రతికూల ప్రభావం చూపే అవకాశం ఉంది.

ఎక్కువకాలం ఉండే ఒత్తిడి హార్మోన్ల సమతుల్యతను ప్రభావితం చేయవచ్చు. దీని వల్ల లైంగిక ఆరోగ్యంతో పాటు స్పెర్మ్ ఉత్పత్తి, నాణ్యత కూడా ప్రభావితమయ్యే అవకాశం ఉంది.

అధికంగా ప్రాసెస్ చేసిన ఫుడ్స్, ఫాస్ట్‌ఫుడ్, చక్కెర, అనారోగ్యకరమైన కొవ్వులు ఉన్న ఆహారాన్ని తీసుకుంటూ.. పండ్లు, కూరగాయలు, నట్స్, తగినంత ప్రోటీన్ వంటి పోషకాలను తీసుకోకుంటే మొత్తం పునరుత్పత్తి ఆరోగ్యంపై ప్రభావం పడుతుంది.

కొన్ని మందులు, ముఖ్యంగా టెస్టోస్టెరాన్ లేదా అనాబాలిక్ స్టెరాయిడ్స్ వంటి వాటిని వైద్యుల సూచన లేకుండా తీసుకుంటే స్పెర్మ్ ఉత్పత్తి గణనీయంగా తగ్గిపోవచ్చు. అందుకే పిల్లలు కావాలనుకునే వారు.. ఇలాంటి మందులను స్వయంగా తీసుకోకూడదని వైద్యులు సూచిస్తున్నారు.

స్పెర్మ్ కౌంట్ లేదా క్వాలిటీ తగ్గడానికి జీవనశైలితో పాటు హార్మోన్ల సమస్యలు, ఇన్ఫెక్షన్లు, వేరికోసీల్, కొన్ని వైద్య పరిస్థితులు వంటి అనేక కారణాలు ఉండవచ్చు. కాబట్టి సంతానోత్పత్తికి సంబంధించిన సమస్యలతో ఇబ్బంది పడుతుంటే యూరాలజిస్ట్ లేదా అండ్రాలజిస్ట్‌ను సంప్రదిస్తే మంచిది.