Chinnareddy Politics: 48 ఏళ్ల రాజకీయ జీవితం నాశనం, జీవన్‌రెడ్డిలా కాంగ్రెస్ పార్టీపై తిరగబడతా!: చిన్నారెడ్డి

డబ్బులకు ఆశపడి ఎమ్మెల్యే టికెట్ వేరే వారికి కేటాయించి తన 48 ఏళ్ల రాజకీయ జీవితాన్ని దెబ్బ తీశారని కాంగ్రెస్ అధిష్టానంపై పార్టీ సీనియర్ నేత జి చిన్నారెడ్డి సంచలన వ్యాఖ్యలు చేశారు.

కాంగ్రెస్ పార్టీ సీనియర్ నేత

Source : social media

Show Quick Read

Key points generated by AI, verified by newsroom

• కాంగ్రెస్ టికెట్ల పంపిణీపై చిన్నారెడ్డి తీవ్ర అసంతృప్తి వ్యక్తం చేశారు.
• డబ్బు కోసం తన టికెట్‌ను పక్కన పెట్టారని చిన్నారెడ్డి ఆరోపించారు.
• పార్టీ తప్పులు సరిదిద్దకుంటే జీవన్‌రెడ్డిలా పోరాడతానని హెచ్చరించారు.
• వనపర్తి అభివృద్ధిని అడ్డుకుంటున్నారని కొత్త టికెట్ హోల్డర్‌పై ఆరోపించారు.

Chinna Reddy Latest News | వనపర్తి: కాంగ్రెస్ పార్టీ సీనియర్ నేత, రాష్ట్ర ప్రణాళిక సంఘం ఉపాధ్యక్షుడు జి. చిన్నారెడ్డి పార్టీలోని ప్రస్తుత పరిణామాలపై తీవ్ర అసహనం వ్యక్తం చేశారు. గతంలో ఎన్నడూ కాంగ్రెస్ జెండా పట్టని వారికి, పదేళ్ల పాటు బీఆర్ఎస్ (అప్పటి టీఆర్ఎస్) ప్రభుత్వంలో ఉండి అన్ని రకాల ప్రయోజనాలు పొంది తిరిగి వచ్చిన వారికి పార్టీలో పెద్దపీట వేయడాన్ని ఆయన తప్పుబట్టారు. ఇదా కాంగ్రెస్ పార్టీ? ఇదా రాజకీయం? అని ప్రశ్నిస్తూ, గన్‌పూర్ వంటి నియోజకవర్గాల్లో కూడా ఇవే తప్పులు జరుగుతున్నాయని ఆయన ఆవేదన వ్యక్తం చేశారు. 

సహనం కోల్పోతే మరో జీవన్ రెడ్డిలా మారతా.. 

కాంగ్రెస్ పార్టీలో తీసుకుంటున్న తప్పుడు నిర్ణయాలను భరిస్తూ ఊరుకుంటున్నానిని, ఒకవేళ తాను సహనం కోల్పోతే మరో టి. జీవన్ రెడ్డి కావాల్సి వస్తుందని ఆయన  హెచ్చరించారు. తప్పు చేస్తున్న వారిని పార్టీ వదిలిపెట్టే వరకు పోరాటం చేస్తానన్నారు. పార్టీని నమ్ముకున్న తనలాంటి వారిని కాదని, డబ్బులకు ఆశపడి తన టికెట్‌ను పక్కన పెట్టారని చిన్నారెడ్డి సంచలన ఆరోపణలు చేశారు. టికెట్ పొందిన వ్యక్తి (మేఘారెడ్డి) నుంచి డబ్బులకు ఆశపడి తనను పక్కన పెట్టడం ఏంటని ప్రశ్నించారు. 

రేవంత్ రెడ్డి పీసీసీ అధ్యక్షుడిగా ఉన్నప్పుడే కాంగ్రెస్ పార్టీ గెలవబోతోందని, ఆయనే ముఖ్యమంత్రి అవుతారని తాను నిర్భయంగా చెప్పానని చిన్నారెడ్డి గుర్తు చేశారు. ఆ విషయాన్ని అంత నిర్భయంగా చెప్పిన తనకు ఇంకా భయమెందుకు ఉంటుందన్నారు. అయినప్పటికీ, డబ్బులకు ఆశపడి మరో వ్యక్తికి టికెట్ కేటాయించి, కొంతమంది స్వార్థ ప్రయోజనాల కోసం తన 48 ఏళ్ల రాజకీయ జీవితాన్ని ఒక్క వేటుతో దెబ్బతీశారని ఆయన ఆవేదన వ్యక్తం చేశారు. 

వనపర్తి నియోజకవర్గం నాశనం అయిపోతోందని ఆవేదన

తన వ్యక్తిగత నష్టం పక్కన పెడితే, ఈ నిర్ణయం వల్ల వనపర్తి నియోజకవర్గం పూర్తిగా నాశనమైందని ఆయన పేర్కొన్నారు. తాను ఎమ్మెల్యేగా గెలిచి ఉంటే, ప్రస్తుత ప్రభుత్వంలో మంత్రిగా నియమితులయ్యేవాడినని, తద్వారా వనపర్తి నియోజకవర్గానికి ఎంతో అభివృద్ధి జరిగేదని చిన్నారెడ్డి అభిప్రాయపడ్డారు. పార్టీలో తప్పులు చేస్తున్న వారిని బయటకు పంపే వరకు తాము వదిలిపెట్టే ప్రసక్తే లేదని స్పష్టం చేశారు. తన రాజకీయ భవిష్యత్తును దెబ్బతీసినా పర్వాలేదు కానీ, పార్టీ నైతిక విలువలను కాపాడాలన్నదే తన ఉద్దేశమని చిన్నారెడ్డి పేర్కొన్నారు. 

ఎమ్మెల్యేనే అభివృద్ధిని అడ్డుకుంటున్నారా!

నియోజకవర్గంలో అభివృద్ధి పనులు ఎందుకు ఆగిపోయాయని మంత్రులను కలిసి అడిగితే, మీ ఎమ్మెల్యే పనులకు అడ్డుపడుతున్నాడని వినిపిస్తోంది. కాంట్రాక్టులు తన మనుషులకు రాలేదని, పనులు ఆపుతున్నాడని, కాంట్రాక్టులు రద్దు చేయాలని చెప్పాడని మంత్రుల ద్వారా తెలిసిందని చిన్నారెడ్డి చేసిన వ్యాఖ్యలు దుమారం రేపుతున్నాయి. మేఘారెడ్డి తన అనుచరులను కూడా ఇబ్బంది పెడుతున్నాడని, పరిస్థితి ఇలాగే కొనసాగితే జీవన్ రెడ్డి లాగా తాను కూడా పార్టీపై తిరగబడాల్సి వస్తుందని సన్నిహితులతో చెప్పినట్లు తెలుస్తోంది.

మరిన్ని చదవండి

సనత్‌నగర్ టిమ్స్‌ నేడు ప్రారంభం! ప్రత్యేకతలు ఏంటో తెలుసా?

సెప్టెంబర్‌లో అసెంబ్లీ సమావేశాలు.. ఎవరేం చేశారో చర్చకు సిద్ధమా కేసీఆర్: సీఎం రేవంత్ రెడ్డి