Back Pain After 40 in Women : 40 ఏళ్ల తర్వాత మహిళల్లో నడుము నొప్పి ఎందుకు పెరుగుతుంది.. ఈ నివారణ చిట్కాలు ట్రై చేయండి

Back Pain After 40 : వయసు పెరిగేకొద్దీ మహిళల్లో కొన్ని ఆరోగ్య సమస్యలు మొదలవుతాయి. వాటిలో నడుము నొప్పి ఒకటి. 40 ఏళ్ల తర్వాత చాలామంది మహిళలు నడుము నొప్పితో ఇబ్బంది పడతారట. ఎందుకంటే..

మహిళల్లో వెన్నునొప్పికి కారణాలు ఇవే

40 ఏళ్ల వయస్సు తర్వాత చాలా మంది మహిళల్లో మెనోపాజ్‌ స్టేజ్ మొదలవుతుంది. ఆ సమయంలో ఈస్ట్రోజెన్ హార్మోన్ స్థాయిలు తగ్గుతాయి. దీనివల్ల ఎముకలు, కండరాల బలం క్షీణించి, నడుము నొప్పికి ప్రధాన కారణం కావచ్చు.

వయసు పెరిగే కొద్దీ ఎముకల సాంద్రత తగ్గి.. కండరాలు కూడా బలహీనపడతాయి. శరీరంలో కాల్షియం, విటమిన్ డి లోపం ఉంటే నడుము నొప్పి వచ్చే అవకాశాలు పెరుగుతాయి.

ఆఫీసులో కూర్చోవడం, ఇంటి పనులు చేసేటప్పుడు తప్పుగా వంగడం, లేదా బరువైన వస్తువులను ఎత్తడం వంటి అలవాట్లు నడుముపై అదనపు ఒత్తిడిని కలిగిస్తాయి. తగినంత శారీరక శ్రమ లేకపోవడం కూడా నొప్పిని పెంచుతుంది.

అందుకే ప్రతిరోజూ 30 నిమిషాలు నడవడం, యోగా చేయడం, స్ట్రెచింగ్, కోర్ స్ట్రెంగ్తెనింగ్ వ్యాయామాలు చేయడం వెన్నుకు మంచిదని చెప్తున్నారు నిపుణులు. అలాగే ఏదైనా కొత్త వ్యాయామాన్ని ప్రారంభించే ముందు నిపుణుడిని సంప్రదించడం మంచిదని అంటున్నారు.

డైట్లో కాల్షియం, విటమిన్ డి, ప్రోటీన్, మెగ్నీషియం అధికంగా ఉండే ఫుడ్స్ చేర్చుకోవాలి. అలాగే తగినంత నీరు తాగడం.. బరువును అదుపులో ఉంచుకోవడం మంచిదని చెప్తున్నారు.

నడుము నొప్పి ఎక్కువ కాలం కొనసాగినా.. కాళ్ళలో తిమ్మిర్లు, నీరసం, లేదా నడవడంలో ఇబ్బంది వంటివి ఉంటే.. మీరు ఎముకల లేదా వెన్నెముక నిపుణుడిని సంప్రదిస్తే మంచిది. సకాలంలో రోగ నిర్ధారణ, చికిత్స తీసుకోవడం వల్ల తీవ్రమైన సమస్యలను నివారించవచ్చు.