Maruti Brezza 2026: మారుతి బ్రెజ్జాలో బడ్జెట్ ఫ్రెండ్లీ వేరియంట్ ఇదే! - తగ్గిన ధర, పెరిగిన ఫీచర్లు
2026 మారుతి బ్రెజ్జా పూర్తి ధరల జాబితా విడుదలైంది. కొత్త టర్బో పెట్రోల్ ఇంజిన్, 6 స్పీడ్ గేర్బాక్స్, తగ్గిన ధర, పెరిగిన ఫీచర్లతో వచ్చిన ఈ SUV ధరలు, ఇంజిన్ ఎంపికలు & పూర్తి వివరాలు తెలుసుకోండి.
2026 Maruti Brezza Price And Features Telugu: భారత కార్ల మార్కెట్లోకి కొత్త లాంచ్ చేసిన కాంపాక్ట్ SUV - 2026 మారుతి బ్రెజ్జా పూర్తి ధరల జాబితాను మారుతి సుజుకి అధికారికంగా ప్రకటించింది. జులై 24న కొత్త టర్బో పెట్రోల్ బేస్ వేరియంట్ ధరను వెల్లడించిన సంస్థ, ఇప్పుడు అన్ని వేరియంట్ల ధరలను ప్రకటించింది. కొత్త బ్రెజ్జా ప్రారంభ ధర రూ.7.40 లక్షలుగా ఉండగా, టాప్ వేరియంట్ ధర రూ.13.55 లక్షల వరకు ఉంది. ఇవి ఎక్స్షోరూమ్ ధరలు.
2026 బ్రెజ్జాలో అతిపెద్ద ఆకర్షణ కొత్త 1.0 లీటర్ డైరెక్ట్ ఇంజెక్షన్ టర్బో పెట్రోల్ ఇంజిన్. ఈ ఇంజిన్కు తక్కువ GST వర్తించడం వల్ల మారుతి ప్రారంభ ధరను గణనీయంగా తగ్గించగలిగింది. దీంతో ఈ SUV గత మోడల్తో పోలిస్తే మరింత పోటీ ధరలో అందుబాటులోకి వచ్చింది.
కొత్త ధరల ప్రకారం 1.0 MTలో LXi రూ.7.40 లక్షలు, VXi రూ.8.55 లక్షలు, ZXi రూ.9.85 లక్షలు & ZXi+ రూ.11.16 లక్షలుగా నిర్ణయించారు. 1.5 MT శ్రేణిలో LXi రూ.8.30 లక్షలు, VXi రూ.9.26 లక్షలు, ZXi రూ.10.50 లక్షలుగా ఉన్నాయి. 1.5 CNG MTలో LXi రూ.9.30 లక్షలు, VXi రూ.9.99 లక్షలు, ZXi రూ.11.50 లక్షలుగా ధరలు నిర్ణయించారు. 1.5 ATలో VXi రూ.10.61 లక్షలు, ZXi రూ.11.85 లక్షలు & ZXi+ రూ.13.55 లక్షలకు లభిస్తుంది.
ఈ నవీకరణతో 1.5 లీటర్ పెట్రోల్ వేరియంట్ల ధరలు గరిష్ఠంగా రూ.69,000 వరకు పెరిగాయి. CNG వేరియంట్లలో కూడా ఎక్కువ శాతం ధరలు పెరిగినప్పటికీ, VXi CNG మాత్రం గతంతో పోలిస్తే రూ.18,000 తక్కువ ధరకు అందుబాటులోకి రావడం కొనుగోలుదారులకు ఊరటనిచ్చే అంశం.
కొత్త బ్రెజ్జా మైలేజ్ కూడా ఆకర్షణీయంగానే ఉంది. వేరియంట్ను బట్టి 19.96 kmpl నుంచి 26.9 kmpl వరకు ఇంధన సామర్థ్యాన్ని అందిస్తోంది. దీంతో నగర ప్రయాణాలతో పాటు దూర ప్రయాణాలకు కూడా ఈ SUV మంచి ఎంపికగా నిలవనుంది.
ఇది కూడా చదవండి: రోడ్డు మీద హీరో కావాలంటే స్పీడ్ కాదు.. సేఫ్టీ ముఖ్యం! ప్రతి డ్రైవర్ తప్పక తెలుసుకోవాల్సిన టిప్స్
ఇంజిన్ ఆప్షన్లు
ఇప్పటికే అందుబాటులో ఉన్న 1.5 లీటర్ NA 4-సిలిండర్ పెట్రోల్ ఇంజిన్ కొనసాగుతోంది. ఇది 103 hp శక్తి & 139 Nm టార్క్ను ఉత్పత్తి చేస్తుంది. ఇదే ఇంజిన్ CNG కిట్తో కూడా లభిస్తుంది. CNG మోడ్లో ఇది 88 hp శక్తి & 121.5 Nm టార్క్ను అందిస్తుంది.
కొత్తగా యాడ్ చేసిన 1.0 లీటర్ డైరెక్ట్ ఇంజెక్షన్ టర్బో పెట్రోల్ ఇంజిన్ 110 hp శక్తి & 170 Nm టార్క్ను ఉత్పత్తి చేస్తుంది. ఇది పాత ఇంజిన్ కంటే ఎక్కువ పనితీరును అందిస్తుంది. అన్ని వేరియంట్లలో ఇప్పుడు కొత్త 6 స్పీడ్ మాన్యువల్ గేర్బాక్స్ను అందిస్తున్నారు. గతంలో ఉన్న 5 స్పీడ్ గేర్బాక్స్ స్థానంలో ఇది వచ్చింది. ఆటోమేటిక్ను కోరుకునే వారికి 1.5 లీటర్ పెట్రోల్ ఇంజిన్తో మాత్రమే 6 స్పీడ్ టార్క్ కన్వర్టర్ AT అందుబాటులో ఉంటుంది.
కొత్త టర్బో పెట్రోల్ వేరియంట్ల ధరలు 1.5 లీటర్ పెట్రోల్ మోడళ్ల కంటే తక్కువగా ఉండటం విశేషం. దీనికి ప్రధాన కారణం ఈ ఇంజిన్పై కేవలం 18 శాతం GST మాత్రమే వర్తించడం. ఇక 1.5 లీటర్ శ్రేణిపై మాత్రం 40 శాతం GST కొనసాగుతోంది. గతంలో బేస్ 1.5 LXi MT ధర రూ.8.26 లక్షలు ఉండగా, ఇప్పుడు కొత్త 1.0 LXi MT రూ.7.40 లక్షలకు అందుబాటులోకి రావడంతో ప్రారంభ ధర ఏకంగా రూ.86,000 తగ్గింది.
ఇది కూడా చదవండి: కొత్త బ్రెజ్జాలో అదిరిపోయే 6 మార్పులు - టర్బో పవర్, వెంటిలేటెడ్ సీట్లు, 5 స్టార్ రేటింగ్తో మరింత బలంగా మారుతి SUV
పోటీ విషయానికి వస్తే, 2026 మారుతి బ్రెజ్జా భారత మార్కెట్లో టాటా నెక్సాన్, హ్యుందాయ్ వెన్యూ, మహీంద్రా XUV 3XO, స్కోడా కైలాక్ & కియా సోనెట్ వంటి ప్రముఖ కాంపాక్ట్ SUVలకు నేరుగా పోటీ ఇస్తోంది. తక్కువ ప్రారంభ ధర, కొత్త టర్బో పెట్రోల్ ఇంజిన్, మెరుగైన పనితీరు, 6 స్పీడ్ గేర్బాక్స్ & విశ్వసనీయతతో 2026 మారుతి బ్రెజ్జా ఈ విభాగంలో మరింత బలమైన పోటీదారుగా నిలవనుంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
