Mrunal Thakur: ఆ సమయంలో చనిపోవాలనుకున్న మృణాల్ - ‘సీతారామం’ సక్సెస్ వరకు ‘సీత’ పడిన కష్టాలెన్నో!
సినిమా ఇండస్ట్రీలో సక్సెస్ కావాలంటే అంత ఈజీకాదు. ఎన్నో అవమానాలను, మరెన్నో సవాళ్లను తట్టుకుని నిలబడినప్పుడే విజయం చెంతకు చేరుతుంది. ‘సీతారామం’ నటీమణి మృణాల్ ఠాకూర్ సైతం ఎన్నో సినిమా కష్టాలను పడింది!
తాజాగా విడుదలై చక్కటి విజయాన్ని అందుకున్న సినిమా ‘సీతారామం’. ఈ చిత్రంలో హీరోయిన్ గా నటించిన మృణాల్ ఠాకూర్.. తన పాత్రలో ఇట్టే ఒదిగిపోయింది. తన దర్పంతో పాటు ప్రేమ, సిగ్గును మేళవించి జీవించిన తీరు ప్రేక్షకులను ఎంతగానో ఆకట్టుకుంది. ఈ సినిమాతో నటిగా సినిమా పరిశ్రమలో తనకంటూ ఓ ప్రత్యేక గుర్తింపు తెచ్చుకున్నది. అయితే, మృణాల్ ఈ స్థాయికి చేరేందుకు ఎన్నో అవస్థలు పడింది. సినిమాలో సీత మాదిరిగానే ఎన్నో కష్టాలు ఎదుర్కొన్నది. ఒకానొక సమయంలో చనిపోవాలనే కఠిన నిర్ణయానికి వచ్చింది. ఇంతకీ తనకు ఆ పరిస్థితి ఎందుకొచ్చిందో తెలుసుకుందాం..
మృణాల్ పుట్టి పెరిగిందంతా మహారాష్ట్రలోని ధులెలో. తండ్రి బ్యాంకు ఉద్యోగి. నిత్యం ట్రాన్స్ ఫర్స్ అయ్యేవి. ఇంటర్ వరకే పది స్కూళ్లు మారింది. ఇంటర్ తర్వాత డెంటిస్ట్ కావాలని ఉండేది. ఎంట్రన్స్ ఎగ్జామ్ రాసి మంచి ర్యాంకు తెచ్చుకున్నా.. మీడియాలోకి రావాలనుకుంది. ఇంట్లో ఒప్పుకోలేదు. అయినా, నచ్చిన పనే చేయాలని భావించి.. ‘3 ఇడియట్స్‘ సినిమా చూపించి తల్లిదండ్రులను ఒప్పించింది. మళ్లీ తన తండ్రి బదిలీ కావడంతో ముంబైలో ఒంటరిగా ఉండాల్సి వచ్చింది. అప్పుడు చాలా ఒంటరిగా ఫీలయ్యేది. చదువు మీద ఫోకస్ పెట్టలేకపోయేది. మీడియా తనకు కరెక్ట్ కాదనుకుంది. పలు ఆలోచనలతో డిప్రెషన్లోకి వెళ్లింది. పలుమార్లు చనిపోవాలనే ఆలోచన వచ్చేది. కానీ, తల్లిదండ్రుల కోసం వెనక్కి తగ్గింది.
అదే సమయంలో మృణాల్ సినిమాల్లోకి రావాలి అనుకున్నది. చదువుకుంటూనే మోడలింగ్ లోకి అడుగు పెట్టింది. ఓ షోలో తనను చూసిన ఓ దర్శకుడు 2012లో ‘ముఝే కుఛ్ కెహ్తీ హై ఖామోషియా’ అనే సీరియల్లో ఛాన్స్ ఇచ్చాడు. ఆ తర్వాత ‘కుంకుమ భాగ్య’ సీరియల్ తో పలు భాషల్లో మంచి గుర్తింపు తెచ్చుకుంది. సీరియల్స్ చేస్తూనే సినిమా ఆడిషన్స్కూ వెళ్లేది. చాలా చోట్ల తనకు అవమానాలు ఎదురయ్యాయి. చివరకు ‘సుల్తాన్’లో అవకాశం వచ్చింది. సల్మాన్ ఖాన్ పక్కన అనుష్క పోషించిన పాత్రలో ఈమె నటించాల్సి ఉన్నా, ఎందుకో చేజారిపోయింది. ఆ తర్వాత ‘లవ్ సోనియా’లో అవకాశం వచ్చింది. వ్యభిచార రొంపిలోకి దిగిన మహిళల బాధలను ఇతివృత్తంగా తీసుకుని చేసిన సినిమా ఇది. ఇందులో తను వ్యభిచార కూపంలో చిక్కుకున్న యువతిగా నటించింది. ఈ సినిమా తన కెరీర్ లో ఓ మైలురాయిగా నిలిచింది. చాలా దేశాల ఫిల్మ్ ఫెస్టివల్స్ లో ఈ సినిమాను ప్రదర్శించారు. విమర్శకుల నుంచి ప్రశంసలు వచ్చాయి.
‘లవ్ సోనియా’ తరవాత మృణాల్ కు మంచి అవకాశాలు వచ్చాయి. ‘సూపర్ 30’, ‘బాట్లా హౌస్’, ‘తూఫాన్’, ’ధమాకా’, ‘జెర్సీ’ల్లో నటించింది. పలు వెబ్సిరీస్లూ చేసింది. తాజాగా వచ్చిన ‘సీతారామం’ తన కెరీర్ లోనే మర్చిపోలేని మెమరబుల్ విజయాన్ని అందించింది. చిన్నప్పుడు ఈమెకు హృతిక్ రోషన్, షాహిద్ కపూర్ అంటే ఎంతో ఇష్టపడేదట. వాళ్ల ఫొటోల్ని చించి పుస్తకాల్లో పెట్టుకుని చూసుకునేదట. వాళ్లతో సినిమాలు చేసే అవకాశం వస్తే ఎంతో సంతోష పడతానని చెప్పింది మృణాల్ ఠాకూర్. ఇవన్నీ మృణాల్ ఓ ప్రముఖ పత్రికకు ఇచ్చిన ఇంటర్వ్యూలో పేర్కొంది.
టాప్ హెడ్ లైన్స్
ట్రెండింగ్ వార్తలు
