Kaikala Satyanarayana: ఆస్పత్రిలో కైకాల... ఆందోళన లేదన్న కుటుంబ సభ్యులు

ప్రస్తుతం సీనియర్ నటుడు కైకాల సత్యనారాయణ ఆస్పత్రిలో ఉన్నారు. అయితే... ఆయన ఆరోగ్య పరిస్థితిపై ఆందోళన చెందాల్సిన అవసరం లేదని కుటుంబ సభ్యులు తెలిపారు.

కైకాల సత్యనారాయణ

సీనియర్ నటుడు కైకాల సత్యనారాయణ ఆస్పత్రిలో ఉన్నారిప్పుడు. శనివారం రాత్రి సికింద్రాబాద్ లోని ఓ ప్రయివేట్ ఆస్పత్రిలో జాయినయ్యారు. అయితే... ఆయన ఆరోగ్య పరిస్థితిపై ఆందోళన చెందాల్సిన అవసరం లేదని కుటుంబ సభ్యులు పేర్కొన్నారు. అసలు, కైకాలకు ఏమైంది? అనే వివరాల్లోకి వెళితే...

ఐదు రోజుల క్రితం కైకాల సత్యనారాయణ ఇంట్లో జారిపడ్డారు. పెద్దగా గాయాలు ఏమీ కాలేదు. అయితే, నొప్పులు ఉన్నాయట. శనివారం రాత్రి నొప్పులు ఎక్కువ కావడంతో కుటుంబ సభ్యులు ఆస్పత్రికి తీసుకువెళ్లారు. వైద్యుల పర్యవేక్షణలో కైకాల చికిత్స తీసుకుంటున్నారు. ప్రస్తుతం ఆయనకు అంతా బావుందని, ఆరోగ్య పరిస్థితిపై ఆందోళన చెందాల్సిన అవసరం లేదని కుటుంబ సభ్యులు తెలియజేశారు.

వయసురీత్యా కొన్ని రోజుల నుంచి కైకాల సత్యనారాయణ బయటకు రావడం లేదు.  సినిమాలకు కూడా దూరంగా ఉన్నారు. ఇంట్లోనే విశ్రాంతి తీసుకుంటున్నారు. అప్పుడప్పుడూ కొందరు ప్రముఖులు ఆయన్ను ఇంటికి వెళ్లి కలిసి వస్తున్నారు. మొన్నామధ్య మెగాస్టార్ చిరంజీవి దంపతులు వెళ్లి వచ్చారు. కైకాల పుట్టినరోజు (జూలై 25న) సతీసమేతంగా ఆయన ఇంటికి వెళ్లిన చిరంజీవి కాసేపు ముచ్చటించి వచ్చారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి