Bengal governor resigns : బెంగాల్ రాజకీయాల్లో పెను మార్పు - గవర్నర్ ఆనంద బోస్ రాజీనామా!

Bengal governor: బెంగాల్ గవర్నర్ ఆనంద్ బోస్ తన పదవికి రాజీనామా చేశారు. ఇప్పటికే చాలా రోజులు పదవిలో ఉన్నానని ఆయన చెబుతున్నారు.

బెంగాల్ రాజకీయాల్లో పెను మార్పు - గవర్నర్ ఆనంద బోస్ రాజీనామా!

Source : PTI

CV Ananda Bose resigns from Bengal governor position:   పశ్చిమ బెంగాల్ గవర్నర్ సి.వి. ఆనంద బోస్ గురువారం తన పదవికి రాజీనామా చేశారు. ఢిల్లీ పర్యటనలో ఉన్న ఆయన, రాష్ట్రపతికి తన రాజీనామా లేఖను సమర్పించారు. 2022 నవంబర్‌లో బాధ్యతలు చేపట్టిన ఆయన, సుమారు మూడున్నరేళ్ల పాటు పదవిలో కొనసాగారు. రాజీనామా అనంతరం ఆయన స్పందిస్తూ, గవర్నర్ కార్యాలయంలో నేను తగినంత సమయం గడిపాను అని క్లుప్తంగా వ్యాఖ్యానించారు. అయితే, రాష్ట్రంలో త్వరలో జరగనున్న అసెంబ్లీ ఎన్నికల  తరుణంలో ఈ నిర్ణయం తీసుకోవడం వెనుక లోతైన రాజకీయ కారణాలు ఉన్నాయని విశ్లేషకులు భావిస్తున్నారు.

మమతతో నిరంతర యుద్ధం 

ఆనంద బోస్ పదవీకాలం మొదటి నుంచి అధికార తృణమూల్ కాంగ్రెస్‌తో విభేదాలతోనే సాగింది. ముఖ్యంగా యూనివర్సిటీల వైస్ ఛాన్సలర్ల నియామకం, రాష్ట్ర ఆవిర్భావ దినోత్సవ వేడుకలు,  పంచాయతీ ఎన్నికల హింస వంటి అంశాలపై ముఖ్యమంత్రి మమతా బెనర్జీతో ఆయన నేరుగా తలపడ్డారు. ప్రభుత్వం పంపిన పలు బిల్లులను పక్కన పెట్టడం ద్వారా ఆయన రాజ్‌భవన్‌ను ఒక  సమాంతర ప్రభుత్వం లా నడుపుతున్నారని టీఎంసీ నేతలు తీవ్రంగా విమర్శించేవారు. ఈ క్రమంలో మమతా బెనర్జీపై ఆయన పరువు నష్టం దావా కూడా వేయడం రాజకీయంగా పెను దుమారం రేపింది.

చుట్టుముట్టిన లైంగిక వేధింపుల ఆరోపణలు 

ఆనంద బోస్ పదవిలో ఉండగానే అత్యంత వివాదాస్పదమైన లైంగిక వేధింపుల ఆరోపణలను ఎదుర్కోవాల్సి వచ్చింది. 2024 మే నెలలో రాజ్‌భవన్‌కు చెందిన ఓ తాత్కాలిక మహిళా ఉద్యోగిని, గవర్నర్ తనను వేధించారని కోల్‌కతా పోలీసులకు ఫిర్యాదు చేయడం దేశవ్యాప్తంగా చర్చనీయాంశమైంది. ఈ ఘటనపై మమతా బెనర్జీ స్పందిస్తూ,  రాజ్‌భవన్‌లో మహిళలకు భద్రత లేదు అని ఘాటుగా విమర్శించారు. దీనికి ప్రతిగా గవర్నర్ తన నిజాయితీని నిరూపించుకోవడానికి రాజ్‌భవన్ సీసీటీవీ ఫుటేజీని బహిరంగంగా ప్రదర్శించి ఆరోపణలను ఖండించినప్పటికీ, ఆ మచ్చ ఆయన పదవీకాలాన్ని వెంటాడింది.              

West Bengal CM Mamata Banerjee tweets, "I am shocked and deeply concerned by the sudden news of the resignation of C. V. Ananda Bose, the Governor of West Bengal. The reasons behind his resignation are not known to me at this moment...Union Home Minister just informed me that… pic.twitter.com/FN58mH9lUb

— ANI (@ANI) March 5, 2026

 ఎన్నికల వేళ కీలక పరిణామం 

బెంగాల్ అసెంబ్లీ ఎన్నికలకు రంగం సిద్ధమవుతున్న తరుణంలో ఆనంద బోస్ నిష్క్రమణ ప్రాధాన్యత సంతరించుకుంది. రాజ్యాంగ బద్ధమైన పదవిలో ఉంటూనే రాజకీయంగా తీవ్ర విమర్శలు ఎదుర్కోవడం, మరోవైపు కేంద్రం పంపే కొత్త గవర్నర్ ఎవరనే దానిపై ఇప్పుడు సర్వత్రా ఉత్కంఠ నెలకొంది. మమతా బెనర్జీ ప్రభుత్వంపై నిరంతరం ఒత్తిడి పెంచుతూ వచ్చిన ఆనంద బోస్, పదవికి దూరమవ్వడం టీఎంసీకి కొంత ఊరటనిచ్చే అంశమైనప్పటికీ, ఎన్నికల వ్యూహాల్లో ఇది ఎలాంటి ప్రభావం చూపుతుందో చూడాలి.