Ennenno Janmalabandham October 24th: యష్, వేద మధ్య అగాథం- పాత మొగుడి మీద మోజుతో అభిమన్యుకి హ్యాండ్ ఇస్తున్న మాళవిక

ఆదిత్య కోసం మాళవికని రక్షించాలని నిర్ణయించుకుంటాడు యశోధర్. ఈరోజు ఎపిసోడ్లో ఏం జరిగిందంటే..

Image Credit: Disney Plus Hotstar/ Star Maa

మాళవిక అర్థరాత్రి యష్ కి ఫోన్ చేస్తుంది. యష్ వేదకి నిజం చెప్తాను అని మాళవికతో అంటాడు. అప్పుడే వేద నిద్ర లేచి యష్ కోసం వెతుకుతూ బయటకి వస్తుంది. పరిస్థితి అర్థం చేసుకుంటుంటుందని క్షమించగల గొప్ప మనసు తనకి ఉంది. వేద నాకు భార్య నేను తనని మోసం చేయలేను అని యష్ అంటాడు. వేద నీకు భార్య కానీ ఆదికి తల్లి కాదు కదా నన్ను కాపాడుకోవడం నీకు చాలా ముఖ్యం, నీ ఒక్కగానొక్క కొడుకు కోసం అయిన నువ్వు చెయ్యాలి. మధ్యలో ఆ వేద ఎవర్తి అని సీరియస్ అవుతుంది. యష్ కూడా ఏంటి బెదిరిస్తున్నావా అని నేను ఆది గురించి ఆలోచించాను కాబట్టే ఇలా ఉన్నా అని కోపంగా అంటుంటే అప్పుడే వెనుక వేద ఉంటుంది. వేదని చూసి యష్ మాట మార్చి ఆఫీసు ఫోన్ వేళాపాళా లేదని తిట్టుకుంటూ వెళతాడు. ఫోన్ అక్కడే పెట్టడంతో మాళవిక మెసేజ్ చేస్తుంది.

మాళవిక నీకు అండగా ఉంటాను అన్నారు, ఆ ఒక్క మాట చాలు యష్ నాకు కొండంత బలం వచ్చింది, నాకు అండగా తోడుగా నువ్వు నిలబడితే అంతకంటే కోరుకునేది ఇంకేముంటుంది అని మాళవిక పంపిన మెసేజ్ ని వేద చూస్తుంది. అసలు ఏం జరుగుతుంది, ఆయన ఫోన్ మాట్లాడింది మాళవికతోనా మరి వసంత్ అని అబద్ధం చెప్పారు ఏంటి నాకు అబద్ధం చెప్పాల్సిన అవసరం ఏంటి అని వేద బాధపడుతుంది. తెలిసే తప్పు చేస్తున్నాన ఇది వేదకి నాకు మధ్య ఎంత అగాథం సృష్టిస్తుందో అని అటు యష్ కూడా ఆలోచిస్తూ ఉంటాడు. యష్ గతంలో తనకి కొనిచ్చిన డ్రెస్ చూసుకుని మాళవిక మురిసిపోతుంది. ఇది నీకు బాగా ఇష్టమైన డ్రెస్, ఇది వేసుకుని నిన్ను గతంలోకి తీసుకుని వెళ్ళాలి కదా ఆనాటి పాత యష్ ని బయటకి రప్పించాలి కదా, ఈ డ్రెస్లో నా అందాన్ని చూసి నువ్వు పడిపోవడం ఖాయం. నిన్ను మళ్ళీ లొంగదీసుకోవడానికి అందానికి మించి ఆయుధం నా దగ్గర లేదని మాళవిక  అంటుంది.

వేద నిద్రలేవకపోయేసరికి ఖుషి వచ్చి నిద్రపేందుకు చూస్తుంది. యష్ మాత్రం వద్దు నేను ఉన్నా కదా నిన్ను స్కూల్ కి రెడీ చేస్తాను అని తనకి అన్నీ పనులు చేస్తాడు. మాళవిక యష్ కి ఇష్టమైన కలర్ డ్రెస్ వేసుకున్నా అని రెడీ అవుతూ మురిసిపోతుంటే అభిమన్యు వస్తాడు. ఎవరిని మర్డర్ చెయ్యడానికి ఇంతగా ముస్తాబు అయ్యావు అని అడుగుతాడు. ఈరోజు ఆది స్కూల్ రీఓపెన్ డే వాడిని స్కూల్లో డ్రాప్ చేసి వస్తాను అని అంటే నేను వస్తాను తర్వాత మనం ఇద్దరం కలిసి బయటకి వెళ్ళి ఎంజాయ్ చేద్దాం చాలా రోజులైందని అభి అంటాడు. కానీ మాళవిక మాత్రం ఇప్పుడు కాదు అని వెళ్లిపోయేసరికి ఏదో తేడా కొడుతుందని అనుమానపడతాడు. ఇక యష్ ఖుషిని తీసుకుని స్కూల్ దగ్గర డ్రాప్ చేస్తాడు. ఖుషి అప్పుడు యష్ ని పిలిచి నువ్వు అమ్మని ఏమైనా అన్నావా, తను ఎందుకో అప్సెట్ అయ్యింది అందుకే తను ఇంకా నిద్రలేవలేదు.. అమ్మని నువ్వు ఏమి అనకు ప్లీజ్ అని అడుగుతుంది. వేద అమ్మని బాగా చూసుకో, తనకి ఇష్టం లేని పని ఏది చెయ్యొద్దు అని చెప్తుంది.