Broadband Tariff Update: టెలికాం బాటలో బ్రాడ్‌బ్యాండ్‌ కంపెనీలు.. త్వరలోనే ఇంటర్నెట్‌ ధరల పెంపు?

బ్రాడ్‌బ్యాండ్‌ ధరలు పెరిగే సూచనలు కనిపిస్తున్నాయి. సంబంధిత కంపెనీలు 15-20 శాతం వరకు ధరలను సవరించే అవకాశం ఉందని విశ్లేషకులు అంటున్నారు.

ఇంటర్నెట్‌

బ్రాడ్‌బ్యాండ్‌ యూజర్లకు షాకిచ్చే వార్త!! ఎందుకంటే మున్ముందు బ్రాడ్‌బ్యాండ్‌ ధరలు పెరిగే సూచనలు కనిపిస్తున్నాయి. సంబంధిత కంపెనీలు 15-20 శాతం వరకు ధరలను సవరించే అవకాశం ఉందని విశ్లేషకులు అంటున్నారు. వ్యాపారాలు కొనసాగాలంటే టారిఫ్‌లు పెంచక తప్పదని కొందరు పేర్కొంటున్నారు.

టెలికాం టారిఫ్‌ ధరలను ఈ మధ్య పెంచిన సంగతి తెలిసిందే. ఎయిర్‌టెల్‌, వొడాఫోన్‌ ఐడియా, జియో కంపెనీలు ప్రీపెయిడ్‌ ప్లాన్లపై 20 శాతం వరకు ధరలు పెంచాయి. బ్రాడ్‌బ్యాండ్‌ కంపెనీలూ ఇప్పుడు అదే బాటలో పయనించనున్నాయి.

'టెలికాం తరహాలోనే బ్రాడ్‌బ్యాండ్‌ కంపెనీల ఇంటర్నెట్‌ సర్వీసెస్‌ ఏఆర్‌పీయూ (ఒక వినియోగదారుడిపై సగటు రాబడి) సవరించాల్సిన అవసరం ఉంది. ఎందుకంటే వినియోగదారులను ఆకట్టుకొనే యుద్ధంలో సర్వీస్‌ ప్రొవైడర్లు ఇప్పటికే నష్టపోయారు! సేవలు అందించాలంటే కనీసం 15-20 శాతం ధరలను పెంచాలి' అని మేఘ్‌బెలా బ్రాడ్‌బ్యాండ్‌ సహ వ్యవస్థాపకుడు తపబ్రత ముఖర్జీ అన్నారు.

ఇప్పుడు మార్కెట్‌ ట్రెండ్‌ను అనుసరించి ఓటీటీ స్ట్రీమింగ్‌ సేవలనూ ఇంటర్నెట్‌ సర్వీస్‌ ప్రొవైడర్లు అందిస్తున్నారు. వీటి భారమూ వారిపై ఎక్కువగానే ఉందని ముఖర్జీ పేర్కొన్నారు. అయితే ఎయిర్‌టెల్‌, జియో వంటి జాతీయ టెలికాం సంస్థలూ బ్రాడ్‌బ్యాండ్‌ ధరలు సవరించాలని లేదంటే చిన్న కంపెనీలు ఇబ్బందుల పడతాయని అంటున్నారు. ఇప్పటికైతే వారి నుంచి ఎలాంటి స్పందన లేదు.