Warner Pushpa Video: పుష్పగా మారిన వార్నర్.. కోహ్లీ కామెంట్ చూస్తే నవ్వాగదు!

పుష్ప సినిమాలో ‘ఏ బిడ్డా.. ఇది నా అడ్డా..’ పాటకు వార్నర్ చేసిన ఇన్‌స్టాగ్రాం వీడియో చాలా వైరల్ అవుతుంది. ఈ వీడియోకి విరాట్ కోహ్లీ కూడా కామెంట్ చేశాడు.

By: ABP Desam | Updated at : 11 Dec 2021 05:05 PM (IST)

Edited By: Eleti Saketh Reddy

David Warner Instagram Post Eyy Bidda Went Viral Check Virat Kohli Response on That

పుష్పగా డేవిడ్ వార్నర్ (Source: Warner Instagram)

ఆస్ట్రేలియన్ క్రికెటర్ డేవిడ్ వార్నర్‌కి, టాలీవుడ్‌కి ఉన్న అనుబంధం గురించి ప్రత్యేకంగా చెప్పక్కర్లేదు. బాహుబలి, సరిలేరు నీకెవ్వరు, అల వైకుంఠపురంలో సినిమాలకు సంబంధించి డేవిడ్ భాయ్ చేసిన టిక్ టాక్ వీడియోలు, ఇన్‌స్టా రీల్స్ ఫ్యాన్స్‌లో జోష్ నింపడంతో పాటు ఎంతో వైరల్ అయిన సంగతి తెలిసిందే.

అయితే డేవిడ్ వార్నర్ హైదరాబాద్ ఫ్రాంచైజీని వీడటంతో ఇక వార్నర్ తెలుగు సినిమాలకు సంబంధించిన వీడియోలు చేయడేమోనని అందరూ అభిప్రాయపడ్డారు. కానీ పుష్పలో సూపర్ హిట్ అయిన ‘ఏ బిడ్డా.. ఇది నా అడ్డా..’ పాటకు సంబంధించి డేవిడ్ వార్నర్ పోస్ట్ చేసిన వీడియో వైరల్ అవుతుంది.

ఫేస్ యాప్ సాయంతో అల్లు అర్జున్ బదులు డేవిడ్ వార్నర్ ఫేస్ ఉన్న వీడియోను వార్నర్ పోస్ట్ చేయగా.. దాని కింద విరాట్ ‘మిత్రమా.. బానే ఉన్నావా?’ అని కామెంట్ చేశాడు. పక్కన పగలబడి నవ్వుతున్న ఎమోజీ కూడా ఉండటంతో ఫ్యాన్స్ ఆ వీడియోతో పాటు ఈ కామెంట్‌ను కూడా ఎంజాయ్ చేస్తున్నారు.

డేవిడ్ వార్నర్‌ను మెగా ఆక్షన్‌లో రాయల్ చాలెంజర్స్ బెంగళూరు ఫ్రాంచైజీ సొంతం చేసుకోనుందని ప్రచారం జరుగుతోంది. ఇటీవల వార్నర్ పునీత్ రాజ్‌కుమార్ వీడియోను టిక్ టాక్ చేయడంతో పాటు ఇప్పుడు పెట్టిన వీడియోకు విరాట్ కామెంట్ చేయడం ఈ వాదనకు బలం చేకూరుస్తుంది.

అసలు వార్నర్ మెగా ఆక్షన్ వరకు వస్తాడా? వస్తే ఏ ఫ్రాంచైజీ సొంతం చేసుకుంటుంది? వంటి విషయాలకు మరో నెలరోజుల్లోనే సమాధానం దక్కనుంది.