Virat Kohli: ఆగని విరాట్ మంట.. జట్టును నాశనం చేయడం సులభం అన్న మాజీ క్రికెటర్!

విరాట్ కోహ్లీని వన్డే కెప్టెన్సీ నుంచి తొలగించినందుకు మాజీ క్రికెటర్ మదన్ లాల్ సెలక్టర్లపై విరుచుకుపడ్డారు.

విరాట్ కోహ్లీ (ఫైల్ ఫొటో)

టీమిండియాలో విరాట్ మంట ఇప్పుడిప్పుడే చల్లారేలా లేదు. దీనిపై ఫ్యాన్స్, క్రికెట్ విశ్లేషకులు ఇప్పటికీ చర్చించుకుంటూనే ఉన్నారు. బీసీసీఐ బుధవారం రోహిత్ శర్మను కొత్త వన్డే కెప్టెన్‌గా నియమించిన సంగతి తెలిసిందే. అయితే టెస్టులకు మాత్రం కోహ్లీనే కొనసాగనున్నాడు.

2021 టీ20 వరల్డ్ కప్ తర్వాత టీ20 కెప్టెన్సీ వదులుకున్న కోహ్లీ వన్డేలు, టెస్టులకు కెప్టెన్‌గా ఉండాలని కోరుకున్నాడు. 2023 వన్డే వరల్డ్ కప్ వరకు అయినా కెప్టెన్‌గా ఉండాలని కోహ్లీ కోరుకున్నాడు. కానీ బీసీసీఐ ప్రణాళికలు మాత్రం వేరుగా ఉండటంతో కోహ్లీకి ఉద్వాసన తప్పలేదు.

ఈ వివాదంపై 1983 వరల్డ్ కప్ విజేత జట్టులో సభ్యుడైన మదన్ లాల్ కూడా స్పందించారు. విరాట్‌ను కెప్టెన్సీ నుంచి తప్పించడంపై సెలక్టర్లపై భారీ విమర్శలు గుప్పించారు. కోహ్లీ కెప్టెన్సీలో జట్టు ఎంతో బాగా పెర్ఫార్మ్ చేస్తున్నా మార్చడం మంచిది కాదన్నారు.

కోహ్లీ నేతృత్వంలో సత్ఫలితాలు వస్తున్నప్పుడు ఇటువంటి నిర్ణయం తీసుకోవడం దేనికని ప్రశ్నించారు. సెలక్టర్లు దీని గురించి ఆలోచించారో లేదో తెలియడం లేదని తెలిపారు. మిగతా రెండు ఫార్మాట్లపై దృష్టి పెట్టడానికే టీ20 కెప్టెన్సీ నుంచి కోహ్లీ తప్పుకున్నాడని అర్థం చేసుకోవచ్చని, కానీ మిగతా రెండు ఫార్మాట్లలో కోహ్లీ విజయవంతంగా కోహ్లీని తొలగించడం, తనని రెచ్చగొట్టడం అవుతుందని అభిప్రాయపడ్డారు.

2023 వరల్డ్ కప్ వరకు విరాట్ కోహ్లీని వన్డేలకు కెప్టెన్‌గా ఉండనివ్వాల్సింది అన్నారు. ఇప్పటికిప్పుడు జట్టును రూపొందించడం కష్టం కానీ.. దాన్ని నాశనం చేయడం మాత్రం చాలా సులభం అని పేర్కొన్నాడు. విరాట్ కోహ్లీ తప్పుకోవడానికి నిరాకరించినందునే ఈ నిర్ణయం తీసుకున్నట్లు బీసీసీఐ ప్రెసిడెంట్ సౌరవ్ గంగూలీ తెలిపారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి