E85 ఇంధనంతో నడిచే ఫ్లెక్స్-ఫ్యూయల్ బైక్‌ Yamaha FZ Blue వచ్చేసింది.. ధర, ఫీచర్లు ఇవే

Flex Fuel Bike: ఈ బైక్‌ను E20 నుండి E85 వరకు ఇథనాల్ మిశ్రమ ఇంధనాన్ని ఉపయోగించేలా తయారు చేశారు. E85 అంటే ఈ ఇంధనంలో 85 శాతం ఇథనాల్ మరియు 15 శాతం పెట్రోల్ ఉంటుంది.

E85 ఇంధనంతో నడిచే ఫ్లెక్స్-ఫ్యూయల్ బైక్‌

Source : Yamaha Motors

Show Quick Read

Key points generated by AI, verified by newsroom

• యమహా FZ బ్లూ ఫ్లెక్స్ బైక్ భారత్‌లో విడుదలైంది.
• ఇది సాధారణ పెట్రోల్, E85 ఫ్లెక్స్ ఇంధనంతో నడుస్తుంది.
• పెట్రోల్ ధరలు, కాలుష్యం తగ్గించడం ప్రధాన లక్ష్యంగా ఉంది.
• 149cc ఇంజిన్, ABS, డిస్క్ బ్రేక్ వంటి ఫీచర్లున్నాయి.

Flex Fuel Bike: భారత్‌లో పెట్రోల్ ధరల పెరుగుదల, గాలి కాలుష్యాన్ని తగ్గించడానికి కేంద్ర ప్రభుత్వం ఇథనాల్ మిశ్రమ ఇంధనాన్ని ప్రోత్సహిస్తోంది. ఈ క్రమంలో యమహా భారత మార్కెట్లో తన కొత్త FZ బ్లూ ఫ్లెక్స్ (FZ Blue Flex) మోటార్‌సైకిల్‌ను లాంచ్ చేసింది. సాధారణ పెట్రోల్‌తో పాటు E85 ఫ్లెక్స్ ఫ్యూయల్తో నడవగల కంపెనీ తీసుకొచ్చిన మొదటి బైక్ ఇది. ఇప్పుడు వినియోగదారుల అవసరాలకు అనుగుణంగా పెట్రోల్, E20 పెట్రోల్ లాంటి వివిధ రకాల ఇంధనాలను ఉపయోగించుకునే అవకాశం ఉంటుంది.

కంపెనీ FZ Blue Flex బైక్ ప్రారంభ ఎక్స్-షోరూమ్ ధరను రూ. 1.24 లక్షలుగా నిర్ణయించింది. ఈ బైక్ అతిపెద్ద ప్రత్యేకత దీని ఫ్లెక్స్-ఫ్యూయల్ సాంకేతికత అని చెప్పవచ్చు. సాధారణంగా భారత్‌లో విక్రయించే బైక్‌లు కేవలం పెట్రోల్ లేదా పరిమితంగా ఇథనాల్ మిశ్రమ ఇంధనంపై మాత్రమే నడుస్తాయి.

యమహా FZ బ్లూ ఫ్లెక్స్ (Yamaha FZ Blue Flex) బైక్‌ను E20 నుండి E85 వరకు ఇథనాల్ మిశ్రమ ఇంధనంతో నడిచేలా డిజైన్ చేశారు. E20 అంటే 20 శాతం ఇథనాల్, 80 శాతం పెట్రోల్ మిశ్రమం ఉంటుంది. E85 అంటే ఈ ఇంధనంలో దాదాపు 85 శాతం ఇథనాల్, 15 శాతం పెట్రోల్ ఉంటుంది. ఇథనాల్‌ను చెరకు, ఇతర వ్యవసాయ పంటల నుండి తయారు చేస్తారు. ఇది పెట్రోల్‌తో పోలిస్తే పర్యావరణానికి మరింత అనుకూలమైనదిగా భావిస్తున్నారు. 

బైక్ ప్రత్యేకతలు 

బైక్ ఇంజిన్ విషయానికి వస్తే కొత్త యమహా FZ బ్లూ ఫ్లెక్స్‌లో 149cc ఎయిర్ కూల్డ్, సింగిల్ సిలిండర్, ఫ్యూయల్ ఇంజెక్టెడ్ ఇంజిన్ అందించారు. ఈ ఇంజిన్ దాదాపు 11.5 BHP పవర్, 12.8Nm టార్క్‌ను ఉత్పత్తి చేస్తుంది. దీంతో పాటు 5 స్పీడ్ గేర్‌ బాక్స్ వస్తుంది. ఇంజిన్ పవర్ గతంలోలాగే ఉన్నప్పటికీ, ఎక్కువ ఇథనాల్ ఉన్న ఇంధనంపై కూడా ఎలాంటి ఇబ్బంది లేకుండా పనిచేసేలా ఇందులో టెక్నికల్ మార్పులు చేశారు.

డిజైన్, ఫీచర్లు ఎలా ఉన్నాయంటే

కొత్త FZ బ్లూ ఫ్లెక్స్ చాలా వరకు ప్రస్తుత FZ సిరీస్ తరహాలోనే కనిపిస్తుంది. ఇందులో మస్కులర్ ఫ్యూయల్ ట్యాంక్, LED హెడ్‌లైట్, మంచి గ్రాఫిక్స్, స్పోర్టీ లుక్ ఇచ్చారు. ఇవి యువతను ఆకట్టుకుంటున్నాయి. బైక్‌లో సౌకర్యవంతమైన సీటు, మెరుగైన రైడింగ్ పొజిషన్, స్ట్రాంగ్ బాడీ కూడా లభిస్తాయి. దీనివల్ల రోజువారీ వాడకంతో పాటు లాంగ్ జర్నీని కూడా తేలిక చేస్తాయి.

Yamaha FZ Blue Flex ఫీచర్ల విషయానికి వస్తే, ఈ బైక్‌లో డిజిటల్ ఇన్‌స్ట్రుమెంట్ క్లస్టర్, LED లైటింగ్, సింగిల్ ఛానల్ ABS, రెండు వీల్స్‌కు  డిస్క్ బ్రేక్‌లు, టెలిస్కోపిక్ ఫ్రంట్ ఫోర్క్స్, రియర్ మోనోషాక్ సస్పెన్షన్ వంటి ఫీచర్లు ఇచ్చారు. ఈ సౌకర్యాలన్నీ బైక్‌ను సురక్షితంగా, సౌకర్యవంతంగా మారుస్తాయి. ట్రాఫిక్ ఉండే సిటీ రోడ్ల నుండి హైవేల వరకు ప్రతి రకమైన రోడ్డు రైడింగ్‌లోనూ బెటర్ ఎక్స్‌పీరియన్స్ ఇచ్చేలా యమహా ఈ బైక్‌ను డిజైన్ చేసింది.

మరిన్ని చదవండి

బైక్ నడిపేవారు హెల్మెట్‌ పెట్టుకునేటప్పుడ్డు జాగ్రత్త! ఈ పొరపాట్లు చేస్తే చలాన్ ఖాయం!

మార్కెట్‌లో అందుబాటులో ఉన్న హై స్పీడ్ ఎలక్ట్రిక్ బైక్స్‌ ఇవే! ధర ఫీచర్లు గురించి తెలుసుకోండి!