HYDRAA Restores Uppal Nalla Cheruvu Lake | ఉప్పల్ నల్లచెరువుకు కొత్త జలకళ

ఉప్పల్ నల్లచెరువు పూర్వ వైభవాన్ని సంతరించుకుని జలకళతో ఉప్పొంగిపోవడంపై సీఎం రేవంత్ రెడ్డి హర్షం వ్యక్తం చేశారు. నగరంలో చెరువుల పునరుజ్జీవనంతో హైదరాబాద్ రూపురేఖలు మారిపోతుండటం తనకు ఎంతో సంతృప్తిని ఇస్తోందన్నారు. క్యూర్‌ (CURE) పరిధిలోని చెరువులన్నింటికీ హైడ్రా కొత్త జీవం పోస్తోందని అన్నారు. హైడ్రా యంత్రాంగాన్ని, అధికారులను సీఎం రేవంత్ రెడ్డి ప్రత్యేకంగా అభినందించారు. ఈ సందర్భంగా ఆయన ఎక్స్ లో పోస్ట్ చేశారు. చెరువులను పరిరక్షించడం అంటే 'కేవలం నీటి వనరులను కాపాడుకోవడమే కాదని, భావి తరాల భవిష్యత్తును భద్రపరచడం కూడా' అని వ్యాఖ్యానించారు. నగరంలో ప్రతి ఒక్క చెరువును కాపాడుకుంటూ, ప్రజా ఆస్తులను సంరక్షించడంలో అందరూ భాగస్వాములై ముందుకు సాగాలని ప్రజలకు పిలుపునిచ్చారు.

ఉప్పల్ నల్లచెరువు విస్తరణలో భాగంగా హైడ్రా సుమారు 10 ఎకరాలకు పైగా ఉన్న ఆక్రమణలను తొలగించింది. దీంతో చెరువు విస్తీర్ణం దాదాపు 70 ఎకరాల వరకు పెరిగింది. దాదాపు రూ. 20 కోట్ల అంచనా వ్యయంతో ఈ చెరువును మోడల్ జలాశయంగా తీర్చిదిద్దుతున్నారు. నాచారం చెరువు, పరిసర ప్రాంతాల నుండి వరద నీరు చేరడానికి రెండు ఇన్లెట్లను, చెరువు నిండిన తర్వాత అదనపు నీరు సాఫీగా మూసీ నదికి వెళ్లేలా అవుట్‌లెట్‌ను క్రమబద్ధీకరించారు.