EVలకు తగ్గని డిమాండ్ - జులైలో 32 వేలకుపైగా అమ్మకాలు, ఏ కంపెనీ ఎన్ని కార్లను విక్రయించిందంటే..?
జులై 2026లో దేశంలో ఎలక్ట్రిక్ కార్ల అమ్మకాలు వరుసగా రెండో నెల కూడా 30 వేల యూనిట్లను దాటాయి. జులైలో EVల పూర్తి అమ్మకాల వివరాలు తెలుసుకోండి.
July 2026 EV sales report: దేశంలో ఎలక్ట్రిక్ కార్లకు డిమాండ్ ఏమాత్రం తగ్గడం లేదు. జూన్లో తొలిసారిగా నెలవారీ అమ్మకాలు 30 వేల యూనిట్లను దాటిన తర్వాత, జులైలో కూడా అదే జోరు కొనసాగింది. 'వాహన్' గణాంకాల ప్రకారం, జులై 2026లో దేశవ్యాప్తంగా మొత్తం 32,609 ఎలక్ట్రిక్ ప్యాసింజర్ కార్లు అమ్ముడయ్యాయి. గత ఏడాది ఇదే నెలతో పోలిస్తే ఇది 83 శాతం వృద్ధి. 2026 జూన్లో నమోదైన రికార్డు 33,307 యూనిట్ల తర్వాత, వరుసగా రెండో నెల కూడా 30 వేల మార్కును దాటడం భారత EV మార్కెట్ వేగంగా విస్తరిస్తోందనే సంకేతాలను ఇస్తోంది.
టాప్ పొజిషన్లో టాటా
ఎలక్ట్రిక్ కార్ల అమ్మకాల్లో టాటా మోటార్స్ మరోసారి అగ్రస్థానాన్ని నిలబెట్టుకుంది. జులైలో కంపెనీ అత్యధికంగా 13,578 కార్లను విక్రయించింది. గత ఏడాది జులైతో పోలిస్తే ఇది 102 శాతం అధికం. జూన్తో పోల్చినా మరో 6 శాతం వృద్ధి నమోదైంది. సియెర్రా EV విడుదల తర్వాత కంపెనీ విక్రయాలు మరింత ఊపందుకున్నాయి. Nexon EV ఇప్పటికీ కంపెనీకి అత్యధిక అమ్మకాల మోడల్గా కొనసాగుతుండగా, అప్డేటెడ్ Tiago EV & Punch EVలకు కూడా మంచి స్పందన లభిస్తోంది. దీంతో టాటా మార్కెట్ వాటా మళ్లీ 40 శాతానికి పైగా చేరుకుంది.
రెండో స్థానంలో మహీంద్రా నిలిచింది. జులైలో కంపెనీ 7,677 ఎలక్ట్రిక్ SUVలను విక్రయించింది. ఇది గత ఏడాదితో పోలిస్తే 125 శాతం వృద్ధి. వరుసగా రెండో నెల కూడా 7 వేలకుపైగా విక్రయాలు నమోదు చేసింది. BE 6, XEV 9e మోడళ్లకు బలమైన డిమాండ్ కొనసాగుతుండగా, ఇటీవల విడుదలైన మూడు వరుసల సీట్లతో వచ్చిన XEV 9S కూడా కంపెనీ EV శ్రేణిని మరింత బలోపేతం చేసింది. ప్రస్తుతం మహీంద్రా మార్కెట్ వాటా 22 శాతానికి చేరుకుంది.
ఇది కూడా చదవండి: తక్కువ ఇంధన ఖర్చు, అద్భుతమైన మైలేజ్.. త్వరలో మార్కెట్లోకి Baleno Facelift 2026
మూడో స్థానంలో JSW MG మోటార్ ఇండియా నిలిచింది. జులైలో కంపెనీ 5,642 ఎలక్ట్రిక్ కార్లను విక్రయించింది. అయితే ఇది గత ఏడాదితో పోలిస్తే 4 శాతం తగ్గుదల. కంపెనీకి Windsor EV ఇప్పటికీ అత్యధికంగా అమ్ముడవుతున్న మోడల్గా కొనసాగుతోంది.
మారుతి సుజుకి జులైలో 1,590 e Vitara కార్లను విక్రయించింది. వరుసగా ఐదో నెల కూడా నాలుగు అంకెల అమ్మకాలు నమోదు చేసింది. ఇప్పటివరకు ఉత్పత్తిలో ఎక్కువ భాగం ఎగుమతులకు కేటాయించడంతో దేశీయ విక్రయాలు పరిమితంగానే ఉన్నాయి. అయితే గుజరాత్లోని హన్సల్పూర్ ప్లాంట్లో నాలుగో ఉత్పత్తి లైన్ ప్రారంభం కావడంతో రాబోయే నెలల్లో దేశీయ సరఫరా పెరిగే అవకాశముంది.
వియత్నాంకు చెందిన విన్ఫాస్ట్ ఇండియా జులైలో 1,478 కార్లను విక్రయించి ఐదో స్థానాన్ని దక్కించుకుంది. కంపెనీ చరిత్రలో ఇదే అత్యధిక నెలవారీ అమ్మకాలు. BYD ఇండియా 742 కార్లను విక్రయించి 47 శాతం వార్షిక వృద్ధిని నమోదు చేసింది. హ్యుందాయ్ 565 కార్లు, కియా ఇండియా 464 కార్లు, టయోటా కిర్లోస్కర్ మోటార్ 123 Urban Cruiser Ebella కార్లను విక్రయించాయి.
ఇది కూడా చదవండి: రూ.10-15 లక్షల్లో ఐదుగురికి హాయిగా సరిపోయే ఆటోమేటిక్ కారు, మంచి మైలేజ్ కూడా.. ఈ కారు బెస్ట్ ఛాయిస్!
లగ్జరీ ఎలక్ట్రిక్ కార్లు
లగ్జరీ ఎలక్ట్రిక్ కార్ల విభాగంలో కూడా మంచి వృద్ధి కనిపించింది. జులైలో మొత్తం 699 లగ్జరీ EVలు అమ్ముడై, గత ఏడాదితో పోలిస్తే 60 శాతం పెరిగాయి. ఇందులో BMW 367 కార్లతో అగ్రస్థానంలో నిలవగా, మెర్సిడెస్ బెంజ్ 163 కార్లు విక్రయించింది. అమెరికాకు చెందిన టెస్లా, భారత మార్కెట్లో తొలిసారి 100 యూనిట్ల మార్కును దాటి 115 Model Y కార్లను విక్రయించింది. ఇటీవల Model Y ధరను రూ.9 లక్షలు తగ్గించడం కంపెనీ విక్రయాలకు ఊతమిచ్చింది. వోల్వో 48 కార్లను విక్రయించగా, పోర్షే 6 కార్లను అమ్మింది. ఆడి, రోల్స్ రాయిస్ & JLR జులైలో ఒక్క ఎలక్ట్రిక్ కారును కూడా విక్రయించలేదు.
మొత్తంగా చూస్తే భారత EV మార్కెట్ వేగంగా విస్తరిస్తున్నట్లు తాజా గణాంకాలు స్పష్టం చేస్తున్నాయి. కొత్త మోడళ్ల విడుదల, ఛార్జింగ్ మౌలిక సదుపాయాల విస్తరణ & వినియోగదారుల ఆసక్తి పెరగడం వల్ల రాబోయే నెలల్లో కూడా ఎలక్ట్రిక్ కార్ల అమ్మకాలు మరింత పెరిగే అవకాశాలు ఉన్నాయని మార్కెట్ విశ్లేషకులు అంచనా వేస్తున్నారు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
