E20 Vs E85 ఫ్యూయల్ - ఏది ఎక్కువ మైలేజ్ ఇస్తుంది? ఫ్లెక్స్ ఫ్యూయల్ బైక్ టెస్ట్‌లో తేలిన నిజం

E20, E85 ఇంధనాల్లో ఏది ఎక్కువ మైలేజ్ ఇస్తుంది? Suzuki Gixxer SF 250 ఫ్లెక్స్ ఫ్యూయల్ బైక్‌పై నిర్వహించిన రియల్ వరల్డ్ టెస్ట్‌లో E85 మైలేజ్, ఖర్చు, ప్రయోజనాలపై ఆసక్తికర విషయాలు వెల్లడయ్యాయి.

తెలుగులో ఆటోమొబైల్‌ వార్తలు

Source : https://x.com/

E85 vs E20: భారత్‌లో ఇథనాల్ మిశ్రమ ఇంధనాల వినియోగాన్ని పెంచేందుకు కేంద్ర ప్రభుత్వం వేగంగా చర్యలు తీసుకుంటోంది. ఇటీవలే E85 ఇంధనాన్ని మార్కెట్లో ప్రవేశపెట్టగా, ఇది సాధారణ E20 పెట్రోల్ కంటే లీటర్‌ కంటే దాదాపు రూ.20 తక్కువ ధరకు అందుబాటులోకి వచ్చింది. దీంతో చాలామందిలో ఒకే ప్రశ్న మొదలైంది. E85 నిజంగా చౌకైన ఇంధనమేనా? లేక తక్కువ ధర వెనుక మరో కథ ఉందా?

ఈ సందేహానికి సమాధానం కనిపెట్టేందుకు, ఎక్స్‌పర్ట్‌లు ఫ్లెక్స్ ఫ్యూయల్ టెక్నాలజీతో వచ్చిన సుజుకి గిక్సర్ SF 250 FFV బైక్‌పై ప్రత్యేక రియల్ వరల్డ్ టెస్ట్ నిర్వహించారు. ఈ బైక్‌కు E20, E85 రెండు రకాల ఇంధనాలపైనా నడిచే సామర్థ్యం ఉంది.

ముందుగా E85తో పరీక్ష

పరీక్ష కోసం బైక్ ట్యాంక్‌లోని పాత ఇంధనాన్ని పూర్తిగా తొలగించి, E85తో నింపారు. ఢిల్లీలోని వివిధ రహదారులపై సుమారు 80 కిలోమీటర్ల ప్రయాణం చేశారు. నగర ట్రాఫిక్, ఓపెన్ రోడ్లు రెండింటినీ కలిపి సగటున గంటకు 29 కిలోమీటర్ల వేగంతో ప్రయాణం సాగింది.

ఈ టెస్ట్ పూర్తయ్యాక బైక్ 2.79 లీటర్ల E85 వినియోగించింది. అంటే, E85 ఫ్యూయల్‌తో ఈ బండి లీటరుకు 28.81 కిలోమీటర్ల మైలేజ్ ఇచ్చింది.

E20తో మళ్లీ పరీక్ష

తర్వాత, ట్యాంక్‌ను మళ్లీ పూర్తిగా ఖాళీ చేసి E20 పెట్రోల్ నింపి అదే మార్గంలో, అదే సమయానికి, దాదాపు ఒకే విధమైన ట్రాఫిక్ పరిస్థితుల్లో మరోసారి టెస్ట్ నిర్వహించారు.

ఈసారి 80 కిలోమీటర్ల ప్రయాణానికి కేవలం 1.93 లీటర్ల ఇంధనం మాత్రమే అవసరమైంది. అంటే, E20తో ఈ బైక్ లీటరుకు 38.1 కిలోమీటర్ల మైలేజ్ ఇచ్చింది.

ఎంత తేడా వచ్చింది?

ఈ రెండు టెస్టుల ఫలితాలను పరిశీలిస్తే E85 ఇంధనంతో మైలేజ్ గణనీయంగా తగ్గినట్లు స్పష్టమైంది. E20తో పోలిస్తే E85 మైలేజ్ లీటరుకు 9 కిలోమీటర్ల పైనే తగ్గింది, దాదాపు 24.4 శాతం తక్కువగా నమోదైంది.

ఈ వ్యత్యాసానికి కారణం ఇథనాల్ స్వభావం. సాధారణ పెట్రోల్‌తో పోలిస్తే ఇథనాల్‌లో శక్తి సాంద్రత తక్కువగా ఉంటుంది. అందువల్లే ఎక్కువ ఇంధనం వినియోగించాల్సి వస్తుంది.

ఖర్చు పరంగా ఏది లాభం?

ప్రస్తుతం ఢిల్లీలో E85 ధర లీటరుకు రూ.82.12 కాగా, E20 ధర రూ.102.12గా ఉంది. అంటే E85 సుమారు 20 శాతం చౌక.

అయితే, మైలేజ్ తగ్గిపోవడం వల్ల ఆ ధర ప్రయోజనం పూర్తిగా వినియోగదారుడికి అందడం లేదు. లెక్కల ప్రకారం సుజుకి గిక్సర్ SF 250 FFVలో E20పై కిలోమీటరుకు సుమారు రూ.2.68 ఖర్చవుతుండగా, E85పై కిలోమీటరుకు రూ.2.85 ఖర్చవుతోంది. అంటే, E85తోనే ఖర్చు ఎక్కువ అవుతుంది.

ఇంకా సింపుల్‌గా చెప్పాలంటే, 10,000 కిలోమీటర్ల ప్రయాణానికి, E20తో పోలిస్తే, E85ని ఉపయోగించినప్పుడు సుమారు రూ.1,700 వరకు అదనంగా ఖర్చయ్యే అవకాశం ఉంది.

ఫ్లెక్స్ ఫ్యూయల్ వాహనాలు కూడా ఖరీదే

ఇంకో ముఖ్యమైన విషయం ఏమిటంటే ఫ్లెక్స్ ఫ్యూయల్ వాహనాల ధరలు కూడా సాధారణ వాహనాల కంటే ఎక్కువగా ఉంటాయి. ఉదాహరణకు గిక్సర్ SF 250 ఫ్లెక్స్ ఫ్యూయల్ వెర్షన్ ధర రూ.1.98 లక్షలు కాగా, సాధారణ వెర్షన్ ధర రూ.1.89 లక్షలుగా ఉంది.

భవిష్యత్తులో పరిస్థితి మారుతుందా?

ప్రస్తుతం ఢిల్లీ-ఎన్‌సీఆర్, ముంబై-పుణే-నాగ్‌పూర్ కారిడార్‌లలో E85, E100 ఇంధన స్టేషన్లను ఏర్పాటు చేసే ప్రణాళికలు కొనసాగుతున్నాయి. 2026 చివరి నాటికి 500 స్టేషన్లు, 2027 నాటికి దేశవ్యాప్తంగా 5,000 స్టేషన్లు ఏర్పాటు చేయాలని కేంద్ర ప్రభుత్వం లక్ష్యంగా పెట్టుకుంది.

అయితే ఫ్లెక్స్ ఫ్యూయల్ వాహనాలు నిజంగా ప్రజాదరణ పొందాలంటే E85 ధర మరింత తగ్గి, E20 కంటే తక్కువ రన్నింగ్ కాస్ట్‌ను అందించాల్సి ఉంటుందని నిపుణులు అభిప్రాయపడుతున్నారు. ప్రస్తుతం ఉన్న ధరల ప్రకారం మాత్రం E85 చౌకగా కనిపించినా, వాస్తవ వినియోగంలో E20నే ఆర్థికంగా మెరుగైన ఎంపికగా నిలుస్తోంది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

E20కి బై బై!, E25 ఫ్యూయల్‌కు కేంద్రం గ్రీన్ సిగ్నల్ ఇచ్చిందా, అందుకేనా ఆ నిర్ణయం?

రోజూ ఆఫీసుకు వెళ్లే వారికి ఈ 4 స్కూటర్లు బెస్ట్, మీకు ఏది సెట్ అవుతుంది