Rains In AP: కోనసీమలో భారీ వర్షాలు.. ఆగిపోయిన కోడి పందేలు

బంగాళాఖాతంలో ఏర్పడిన అల్పపీడన ద్రోణి ప్రభావంతో కోనసీమ వ్యాప్తంగా  వర్షాలు కురుస్తున్నాయి. 

వర్షంతో నిలిచిపోయిన కోడి పందేలు

కోనసీమలో వర్షాలు కురుస్తు్న్నాయి. భోగి పండుగ రోజైన శుక్రవారం ఉదయం నుంచి మబ్బులతో ఉంది వాతావరణం. సాయంత్రం అయ్యే సరికి ఒక్కసారిగా ఈదురు గాలులతో కూడిన భారీ వర్షం కురవడంతో పండుగ వాతావరణం అంతా ఒక్కసారిగా చెదిరి పోయింది. సంక్రాంతిని పురస్కరించుకుని నిర్వహించ తలపెట్టిన కోడిపందేలపై వర్షం  ప్రభావం తీవ్రంగా పడింది. ఇంటి ముంగిట అలంకరించుకున్న రంగవల్లులు అన్ని కూడా వర్షానికి కొట్టుకుపోయాయి.

సంక్రాంతిని పురస్కరించుకొని పలు ఆలయాల వద్ద ఏర్పాటు చేసిన సాంస్కృతిక కార్యక్రమాలు కూడా వర్షం ప్రభావంతో ఆగిపోయాయి. ఇక ఈ అకాల వర్షం కానుమ రోజున జరగనున్న జగ్గన్నతోట తీర్థంపై కూడా తీవ్రంగా పడే అవకాశాలు కనిపిస్తున్నాయి. ఓడలరేవు బీచ్ లో లో నిర్వహించిన కైట్ ఫెస్టివల్ పైనా వర్ష ప్రభావం పడింది. అక్కడకు వచ్చినవారు తిరిగి వెళ్లిపోయారు. సాయంత్రం వరకు జరగాల్సిన కైట్ ఫెస్టివల్ మధ్యాహ్నంతో ముగిసింది. కోడి పందేల బరులు కూడా చిత్తడిగా మారాయి.

అయితే కొన్ని ప్రాంతాల్లో.. వర్షాలు పడినా.. కోడి పందేలు కొనసాగించారు. నిన్నటి వరకూ ప్రచార ఆర్భాటం చేసిన పోలీసులు తీరా కోడి పందేలు అడ్డు చెప్పకపోవడంతో కొంతమంది అలాగే కొనసాగించారు. అధికార పార్టీ నాయకుల అండదండలతో  కోడిపందేలు జరుగుతున్నాయని ఆరోపణలు వస్తున్నాయి.  ముమ్మిడివరం  నియోజక వర్గం నాలుగు మండలాల్లో కోడి పందేలు జోరుగా సాగాయి. కాట్రేనికోన మండలం పళ్ళంకుర్రులోనూ జోరుగానే పందేలు జరిగాయి. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి