Petrol Pump Scam: ఇప్పుడు 0 కాదు.. పెట్రోల్- డీజిల్ సాంద్రతతో మోసం చేస్తున్న పెట్రోల్ పంపులు!

పెట్రోల్ లేదా డీజిల్ నింపేటప్పుడు సున్నా మాత్రమే చూస్తే సరిపోదు. పెట్రోల్ బంక్ మోసాల నుండి తప్పించుకోవడానికి మరికొన్ని విషయాలు గమనించాలి.

పెట్రోల్ పంపులో ఈ విషయాలను గుర్తుంచుకోండి

Source : Pixabay

పెట్రోల్ పంపులో మీ వెహికల్‌లో ఫ్యూయల్ నింపేటప్పుడు, మనకు తెలియకుండానే కొన్నిచోట్ల మోసం జరుగుతుంది. చాలాసార్లు మనం మీటర్లో 0.00 అని చూస్తాం. ఇతర విషయాలపై అంతగా ఫోకస్ చేయం. అలాంటి పరిస్థితిలో మీరు మోసపోతారు. కానీ ఆ విషయం వాహనదారులకు ఏమీ తెలియదు. అందుకే పెట్రోల్ లేదా డీజిల్ కొట్టించేటప్పుడు సున్నా చూడటం మాత్రమే సరిపోదని గ్రహించండి. మీరు ఏదైనా ఫ్యూయల్ చీటింగ్ బారిన పడకుండా ఉండేందుకు కొన్ని ఇతర ముఖ్యమైన విషయాలు గుర్తుంచుకోవాలి. కొన్నిసార్లు అసలు మోసం డెన్సిటీ మీటర్ ద్వారా జరుగుతుంది. 

వాస్తవానికి, డెన్సిటీ మీటర్ మీ వాహనంలోకి నింపుతున్న పెట్రోల్ లేదా డీజిల్ నాణ్యత, స్వచ్ఛతను చూపుతుంది. అర్థమయ్యేలా చెప్పాలంటే, ఇది ఫ్యూయల్ సాంద్రతను, దాని నాణ్యతను కొలుస్తుంది. ఇది నిర్ణీత పరిమితి కంటే ఎక్కువ లేదా తక్కువ విలువను చూపిస్తే, ఆ పెట్రోల్, డీజిల్ కల్తీ ఉండవచ్చు. కల్తీ ఇంధనం మీ వాహనం ఇంజిన్‌ను తక్కువ ఏళ్లకే దెబ్బతీస్తుంది. 

ఈ పరిస్థితిలో జాగ్రత్తగా ఉండటం ముఖ్యం

మీరు తెలుసుకోవాల్సిన విషయం ఏమిటంటే, పెట్రోల్ సాంద్రత సుమారు 730 నుండి 800 కిలోగ్రాముల వరకు ఉండాలి. అదే విధంగా డీజిల్ సాంద్రత 830 నుండి 900 కిలోగ్రాముల వరకు ఉంటుంది. వాటి సాంద్రత ఈ నిర్ణీత పరిధికి మించి కనిపిస్తే, ఆ సమయంలో మీరు జాగ్రత్తగా ఉండాలి. పెట్రోల్ పంప్ వద్ద కూడా దీన్ని మాన్యువల్‌గా చెక్ చేయవచ్చు. నిబంధనల ప్రకారం, దేశంలోని ప్రతి పౌరుడికి పెట్రోల్ స్వచ్ఛతను కొలిచే, తెలుసుకునే హక్కు ఉంటుంది.

మీరు స్పెషల్ ఫోకస్ చేయాల్సిన అంశం మరొకటి ఉంది. మీరు మీటర్లో సున్నా చూసినప్పుడు, పెట్రోల్ నింపడం ప్రారంభించినప్పుడు, అదే మీటర్ పై ఫోకస్ చేయండి. మీటర్ 0 నుండి నేరుగా 10కి వెళితే మధ్యలో చిన్న సంఖ్యలు కనిపించకపోతే, ఇది మీటర్లో ఫిక్స్ చేసిన ఫ్రాడ్ కు సంకేతం కావచ్చు. కనుక పెట్రోల్, డీజిల్ కొట్టించే సమయంలో ఈ విషయాలు గమనిస్తే మీకు అది క్వాలిటీదా కాదా తెలియడంతో పాటు సరైన మోతాదు ఫ్యూయల్ నింపుతున్నారో లేదో అర్ధమవుతుంది.