Atmakuru polling : ఆత్మకూరులో పోలింగ్ స్టేషన్ల వద్ద కొవిడ్ ప్రొటోకాల్- అలా చేస్తేనే పోలింగ్ బూత్‌లోకి ఎంట్రీ

ఆత్మకూరు ఉప ఎన్నికల్లో అధికారులు అన్ని ముందస్తు జాగ్రత్తలు తీసుకున్నారు. పోలింగ్ స్టేషన్ల వద్ద కొవిడ్ ప్రొటోకాల్ పాటిస్తున్నారు. పోలింగ్ కోసం వస్తున్న ఓటర్లకు శానిటైజర్, మాస్క్ లు అందిస్తున్నారు. ఆశా వర్కర్లు ప్రాథమిక చికిత్స కిట్ లు అక్కడే ఉంచుకుని విధులు నిర్వహిస్తున్నారు. 

పోలింగ్ శాతంపై అనుమానం.. 
ఓవైపు పోలింగ్ మొదలైనా.. ఓటర్ల బారులు కనిపించడంలేదు. ఒక్కొక్కరే నిదానంగా పోలింగ్ స్టేషన్లకు చేరుకుంటున్నారు. మరోవైపు కూలి పనులకోసం వెళ్లే మహిళళు..ఉదయాన్నే ఆత్మకూరులోని పలు కూడళ్లలో కనిపించారు. వారంతా తమ ఓటు హక్కు వినియోగించుకోవడానికి ఆసక్తి చూపించడంలేదు. పొలం పనులకోసం మహిళలు వెళ్తున్నారు. 

రాత్రి వర్షానికి పోలింగ్ స్టేషన్లు బురదమయం కావడంతో.. తెల్లవారగానే అధికారులు హడావిడి పడుతూ పనులు పూర్తి చేస్తున్నారు. పోలింగ్ స్టేషన్లకు ఇసుక తరలించారు. బురద లేకుండా చూస్తున్నారు. రాత్రి అకస్మాత్తుగా కురిసిన వర్షాలకు చాలా చోట్ల షామియానాలు తడిసిపోయాయి. 

ఆత్మకూరు ప్రశాంతంగానే కనిపిస్తున్నా.. పోలింగ్ కేంద్రాల్లో 44 శాతం సమస్యాత్మకమైనవేనని అధికారులు నిర్థారించారు. మొత్తం 6 మండలాల్లో 279 పోలింగ్ కేంద్రాలు ఉండగా.. అందులో 123 కేంద్రాలు సమస్యాత్మకమైనవిగా గుర్తించిన అధికారులు  అక్కడ అదనపు బలగాలను మోహరించారు. టీడీపీ పోటీలో లేకపోవడంతో గొడవలు జరిగే అవకాశం లేదని అనుకున్నా.. స్థానికంగా ఉన్న గ్రూపు రాజకీయాలతో ఎలాంటి పరిణామాలు ఉంటాయోనని పోలీసులు ముందు జాగ్రత్త తీసుకున్నారు. 123 కేంద్రాల వద్ద వెబ్ క్యాస్టింగ్ ద్వారా పోలింగ్ సరళిని పరిశీలిస్తున్నారు. 

పోలింగ్ శాతంపై సందేహం.. 
విజయంపై ఇప్పటికే ధీమాగా ఉన్న అధికార వైసీపీ.. లక్ష మెజార్టీ టార్గెట్ గా పెట్టుకుంది. పోలింగ్ శాతం వీలైనంత మేర పెంచేందుకు అధికార పార్టీ నేతలు, కార్యకర్తలు కష్టపడుతున్నారు. 2019 సార్వత్రిక ఎన్నికల్లో ఆత్మకూరులో 83.38 శాతం పోలింగ్ జరిగింది. ఈసారి ఆ స్థాయిలో పోలింగ్ కి జనం ఆశక్తి చూపిస్తారా లేదా అనేది సందేహమే. ఇప్పటికే పల్లెల్లో చాలామంది నర్రవాడలో జరిగే వెంగమాంబ బ్రహ్మోత్సవాలకు తరలి వెళ్లారు. హైదరాబాద్, చెన్నై, బెంగళూరులో ఉన్నవారు కూడా గత ఎన్నికలకోసం తరలి వచ్చినట్టు ఈసారి రావడంలేదు. దీంతో పోలింగ్ శాతం తగ్గుతుందనే అంచనాలున్నాయి. 

వాతావరణంలో మార్పు.. 
నిన్న మొన్నటి వరకు ఎండలు మండిపోతున్నా.. రాత్రి నుంచి వాతావరణంలో స్పష్టమైన మార్పు వచ్చింది. ఉన్నట్టుండి భారీ వర్షం పడింది. ఈరోజు కూడా ఆకాశం మేఘావృతమై ఉంది. అక్కడక్కడ చెదురుమదురు జల్లులు పడుతున్నాయి. భారీ వర్షం పడితే ఓటింగ్ శాంత తగ్గడానికి అది కూడా ఓ కారణం అయ్యే అవకాశముంది.